Indonesia Ship Missing / ଜାଭା ସାଗରରେ ବଡ଼ ଅଘଟଣ ! ୨୪୦ ଯାତ୍ରୀଙ୍କୁ ନେଇ ଯାଉଥିବା ଜାହାଜ ନିଖୋଜ

ଜାଭା ସାଗରରେ ୨୪୦ରୁ ଅଧିକ ଯାତ୍ରୀଙ୍କୁ ନେଇ ଯାଉଥିବା ଇଣ୍ଡୋନେସିଆ ଜାହାଜ ନିଖୋଜ । ଜାହାଜ ସହ ଯୋଗାଯୋଗ ବିଚ୍ଛିନ୍ନ ହେବା ପରେ ଚାଲିଛି ସର୍ଚ୍ଚ ଅପରେସନ । ଭିର୍ଗୋ ଟ୍ରାନ୍ସପୋର୍ଟ ୮ ନାମକ ଏହି ଜାହାଜ ପୂର୍ବ ଜାଭାରୁ ଦକ୍ଷିଣ କାଲିମନ୍ତାନ ପ୍ରଦେଶ ଅଭିମୁଖେ ଯାଉଥିଲା । ଜାଭା ସାଗରରେ ଜାହାଜଟି ଖରାପ ପାଗର ସମ୍ମୁଖୀନ ହେବା ପରେ ଏହା ସହ ଯୋଗାଯୋଗ ଛିନ୍ନ ହୋଇଥିବା ଜଣାପଡ଼ିଛି । ଏପର୍ଯ୍ୟନ୍ତ କାହାର ମୃତ୍ୟୁ କିମ୍ବା ଆହତ ହେବାର ଖବର ମିଳିନାହିଁ ।

ରାତି ପ୍ରାୟ ୨ଟାରେ ଯୋଗାଯୋଗ ବିଚ୍ଛିନ୍ନ

ସୂଚନା ଅନୁସାରେ, ରବିବାର ଭୋର ପ୍ରାୟ ୨ଟା ସମୟରେ ଜାହାଜ ସହ ଯୋଗାଯୋଗ ବିଚ୍ଛିନ୍ନ ହୋଇଥିବା ସୂଚନା ମିଳିଥିଲା । ଅଧିକାରୀଙ୍କ କହିବା ଅନୁସାରେ, ଯୋଗାଯୋଗ ଛିନ୍ନ ହେବାର ପ୍ରାୟ ଦୁଇ ଘଣ୍ଟା ପରେ ଘଟଣା ସମ୍ପର୍କରେ ସେମାନଙ୍କୁ ଜଣାଇ ଦିଆଯାଇଥିଲା ।

ଜାହାଜଟି ପୂର୍ବ ଜାଭା ପ୍ରଦେଶର ଦ୍ୱିତୀୟ ବୃହତ୍ତମ ସହର ସୁରବାୟାରୁ ବଞ୍ଜାରମାସିନ ଅଭିମୁଖେ ଯାତ୍ରା କରିଥିଲା । ଦକ୍ଷିଣ କାଲିମନ୍ତାନ ସନ୍ଧାନ ଏବଂ ଉଦ୍ଧାର କାର୍ଯ୍ୟାଳୟର ମୁଖ୍ୟ ଆଇ ପୁତୁ ସୁଦାୟନା ଏକ ଭିଡିଓ ବ୍ରିଫିଂରେ କହିଛନ୍ତି ଯେ, ଜାହାଜର ପରିଚାଳକ ହିଁ ଅଧିକାରୀମାନଙ୍କୁ ଏହି ଘଟଣା ବିଷୟରେ ଜଣାଇଥିଲେ । ପରିଚାଳକଙ୍କୁ ଜାହାଜଟି ଖରାପ ପାଗର ସମ୍ମୁଖୀନ ହେଉଥିବା ନେଇ ସୂଚନା ମିଳିଥିଲା ।

ବଞ୍ଜାରମାସିନଠାରୁ ୧୪୮ କିମି ଦୂରରେ ମିଳିଥିଲା ଶେଷ ଲୋକେସନ

ପ୍ରାଥମିକ ସୂଚନା ଅନୁସାରେ, ଜାହାଜର ଶେଷ ଲୋକେସନ୍‌ ଜାଭା ସାଗରରେ ବଞ୍ଜାରମାସିନର ଏକ ଘାଟଠାରୁ ପ୍ରାୟ ୧୪୮ କିଲୋମିଟର ଦୂରରେ ଥିଲା । ଜାହାଜର ମ୍ୟାନିଫେଷ୍ଟ ଅନୁସାରେ, ଏଥିରେ ୨୪୧ ଜଣ ଯାତ୍ରୀ ଥିଲେ । ତେବେ ଏପର୍ଯ୍ୟନ୍ତ କୌଣସି ଯାତ୍ରୀଙ୍କ ଜୀବନହାନିର ଖବର ମିଳିନାହିଁ ।

ଜାହାଜର ପରିଚାଳକ ପିଟି ଭିର୍ଗୋ ୟୋଏଲ ରିହି ମଧ୍ୟ ଯୋଗାଯୋଗ ବିଚ୍ଛିନ୍ନ ହେବା ଘଟଣାକୁ ସ୍ପଷ୍ଟ କରିଛନ୍ତି । କମ୍ପାନୀର ସୂଚନା ଅନୁସାରେ, ଭିର୍ଗୋ ଟ୍ରାନ୍ସପୋର୍ଟ ୮ ଶନିବାର ସ୍ଥାନୀୟ ସମୟ ସକାଳ ୧୦ଟା ୧୩ ମିନିଟରେ ସୁରବାୟାରୁ ଯାତ୍ରା ଆରମ୍ଭ କରିଥିଲା । ଘଟଣା ବିଷୟରେ ସୂଚନା ପାଇବା ପରେ ଏହି ଜାହାଜରେ ଥିବା ସମସ୍ତ ଯାତ୍ରୀଙ୍କୁ ସୁରକ୍ଷିତ ଉଦ୍ଧାର ପାଇଁ ରେସ୍କ୍ୟୁ ଅପରେସନ୍‌ ଜାରି ରହିଛି ।