Argus News - ଆମେରିକା ବାୟୁସେନାକୁ ବଡ଼ ଝଟକା ! A-10 ଲଢ଼ୁଆ ବିମାନକୁ ଖସାଇଥିବା ଦାବି କଲା ଇରାନ

ମଧ୍ୟପ୍ରାଚ୍ୟରେ ଚାଲିଛି ମହାଯୁଦ୍ଧ । ଦିନକୁ ଦିନ ବଢ଼ିବାରେ ଲାଗିଛି ଯୁଦ୍ଧର ଘନଘଟା । ଏହାରି ମଧ୍ୟରେ ଇରାନ ସେନା ଏକ ଆମେରିକୀୟ A-10 ଲଢ଼ୁଆ ବିମାନକୁ ଗୁଳି କରି ଖସାଇ ଦେଇଥିବା ଦାବି କରିଛି । ଜାତୀୟ ଗଣମାଧ୍ୟମର ସୂଚନା ଅନୁଯାୟୀ, ଏହି ଘଟଣା ବିଶ୍ୱର ଏକ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ହର୍ମୁଜ୍ ପ୍ରଣାଳୀ ନିକଟରେ ଘଟିଛି ।
ଇରାନ ଗଣମାଧ୍ୟମ ଏବଂ ତାସନିମ୍ ନ୍ୟୁଜ୍ ଏଜେନ୍ସି ଅନୁଯାୟୀ, ଏହି ରଣନୈତିକ ଜଳପଥର ଦକ୍ଷିଣ ଭାଗରେ ବିମାନକୁ ଟାର୍ଗେଟ କରାଯାଇଥିଲା । ତେବେ ଇରାନର ଏହି ଦାବିକୁ ଆମେରିକା ପକ୍ଷରୁ ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ନିଶ୍ଚିତ କରାଯାଇ ନାହିଁ। ପେଣ୍ଟାଗନ୍ କିମ୍ବା ହ୍ୱାଇଟ୍ ହାଉସ୍ ତୁରନ୍ତ ପ୍ରତିକ୍ରିୟା ଦେଇନାହାଁନ୍ତି ।

ଏହି ସମୟରେ ଆଉ ଏକ ଘଟଣା ପରିସ୍ଥିତିକୁ ଆହୁରି ତୀବ୍ର କରିଛି । ରିପୋର୍ଟ ଅନୁଯାୟୀ, ଆମେରିକାର ଏକ ବାୟୁସେନା F-15E ଷ୍ଟ୍ରାଇକ୍ ଇଗଲ୍ ଲଢ଼ୁଆ ବିମାନ ଇରାନ ଭିତରେ ଦୁର୍ଘଟଣାଗ୍ରସ୍ତ ହୋଇଛି । CNN ରିପୋର୍ଟ କରିଛି ଯେ ଜଣେ କ୍ରୁ ସଦସ୍ୟଙ୍କୁ ଆମେରିକୀୟ ସେନା ଦ୍ୱାରା ସୁରକ୍ଷିତ ଭାବରେ ଉଦ୍ଧାର କରାଯାଇଛି । ତଥାପି, ଅନ୍ୟ ସଦସ୍ୟଙ୍କ ସନ୍ଧାନ ଏପର୍ଯ୍ୟନ୍ତ ଜାରି ରହିଛି । F-15E ଦୁଇଜଣ ବ୍ୟକ୍ତି ଦ୍ୱାରା ପରିଚାଳିତ ହେଉଥିବା ଜଣାପଡ଼ିଛି। ଇରାନ ଗଣମାଧ୍ୟମ ଦ୍ୱାରା ପ୍ରକାଶିତ ଫଟୋ ଏବଂ ଭିଡିଓ ଆଧାରରେ CNN ନିଶ୍ଚିତ କରିଛି ଯେ ଭଗ୍ନାବଶେଷ ଏକ F-15 ବିମାନର ।

ଇରାନ ଭିତରେ ଆମେରିକୀୟ ବିମାନ ଦୁର୍ଘଟଣାଗ୍ରସ୍ତ

ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଏହି ଘଟଣାଟି ଚଳିତ ଯୁଦ୍ଧ ସମୟରେ ପ୍ରଥମ ଥର ପାଇଁ ଇରାନ ଭିତରେ ଆମେରିକୀୟ ବିମାନ ଦୁର୍ଘଟଣାଗ୍ରସ୍ତ ହୋଇଛି । କିଛି ଫଟୋରେ ମିଳିଥିବା ଭଗ୍ନାବଶେଷରୁ ଜଣାପଡୁଛି ଯେ ବିମାନଟି ବ୍ରିଟେନର RAF ଲାକେନହିଥ୍ ବେସରେ ନିୟୋଜିତ ୪୯୪ତମ ଫାଇଟର ସ୍କ୍ବାଡ୍ରନର ହୋଇପାରେ । ତଥାପି, ଏହି ଘଟଣାଗୁଡ଼ିକ ବିଷୟରେ ଅନେକ କଥା ଅସ୍ପଷ୍ଟ ରହିଛି । ଇରାନର A-10 ବିମାନକୁ ଗୁଳି କରି ଖସାଇ ଦେବାର ଦାବି ମଧ୍ୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।