ତେହରାନ: ଇରାନ ଓ ପାଶ୍ଚାତ୍ୟ ରାଷ୍ଟ୍ର ମଧ୍ୟରେରେ ତିକ୍ତତା ଏବେ ବିପଜ୍ଜନକ ଓ ବ୍ୟକ୍ତିଗତ ସ୍ତରରେ ପହଞ୍ଚିଛି । ତେହରାନ ମହାନଗର ନିଗମ ପକ୍ଷରୁ ଛପା ଯାଉଥିବା ଇରାନର କଟ୍ଟରପନ୍ଥୀ ଖବରକାଗଜ 'ହମଶହରୀ' ତାର ୱେବସାଇଟ୍‌ରେ ଏକ ବଡ଼ ବିବାଦୀୟ ଟାର୍ଗେଟ୍ ଲିଷ୍ଟ ପ୍ରକାଶ କରିଛି ।

ଯେଉଁ ତାଲିକାରେ ରହିଛି ବିଶ୍ଵର ୧୩ ଜଣ ବଡ଼ ନେତାଙ୍କ ନାଁ । ଆମେରିକା, ଇସ୍ରାଏଲ୍‌ରୁ ନେଇ ଏକାଧିକ ୟୁରୋପୀୟ ଦେଶର ୧୩ ଜଣ ବିଶ୍ଵ ନେତାଙ୍କ ଫଟୋ ମଧ୍ୟ ରହିଛି । ଯେଉଁମାନଙ୍କୁ ଇରାନର ଦିବଙ୍ଗତ ସର୍ବୋଚ୍ଚ ନେତା ଅୟୋତୁଲ୍ଲା ଅଲୀ ଖାମେନେଇଙ୍କ ମୃତ୍ୟୁ ପାଇଁ ଦାୟୀ କରାଯାଇଛି ।

ଏଥିସହ ପଢ଼ନ୍ତୁ: ଅକ୍ଟୋବର ୨୭ରେ ଇସ୍ରାଏଲ୍‌ ସାଧାରଣ ନିର୍ବାଚନ: ପିଏମ ନେତନ୍ୟାହୁଙ୍କ ପାଇଁ ବଡ଼ ଚ୍ୟାଲେଞ୍ଜ 

ମୋଜତବାଙ୍କ ପ୍ରଥମ ଓ କଡ଼ା ବାର୍ତ୍ତା

ଫେବ୍ରୁଆରୀ ୨୮ରେ ଆମେରିକା ଓ ଇସ୍ରାଏଲ୍ ମିଳିତ ଭାବେ ଇରାନ ଉପରେ ଆକ୍ରମଣ କରିଥିଲେ । ଯେଉଁଥିରେ ଖାମେନେଇଙ୍କ ମୃତ୍ୟୁ ପରେ ତାଙ୍କ ପୁଅ ମୋଜତବା ଖାମେନେଇ ହୋଇଥିଲେ ଇରାନର ପରବର୍ତ୍ତୀ ସର୍ବୋଚ୍ଚ ନେତା । କିନ୍ତୁ ଦେଶର ଦାୟିତ୍ଵ ନେବା ପରଠାରୁ ସର୍ବସମ୍ମୁଖକୁ ଆସି ନଥିଲେ ମୋଜତବା । କୁହାଯାଉଥିଲା, ଉକ୍ତ ଆକ୍ରମଣରେ ମୋଜତବା ମଧ୍ୟ ଆହତ ହୋଇଥିଲେ ।

ଏବେ ଖାମେନେଇଙ୍କ ଅନ୍ତିମ ସଂସ୍କାର ପରେ ଶନିବାର ମୋଜତବା ପ୍ରଥମଥର ଲିଖିତ ବୟାନ ଜାରି କରିଥିଲେ । କହିଥିଲେ, "ବଦ୍‌ଲା ନେବା ହେଉଛି ସମଗ୍ର ଦେଶର ଇଚ୍ଛା ଏବଂ ଏହାକୁ ନିଶ୍ଚିତ ଭାବେ ହାସଲ କରିବୁ । ଅପରାଧୀମାନଙ୍କ ତାଲିକା କରାଯାଇଛି । ସେମାନଙ୍କ ଶୋଇବା ଶେଜରେ ଶାନ୍ତିରେ ମରିବାର ଇଚ୍ଛାକୁ ନିଜ ସହ ମଶାଣିକୁ ନେଇଯିବେ ।"

ହିଟ୍ ଲିଷ୍ଟରେ କିଏ ?

ଯଦିଓ ମୋଜତବା ଖାମେନେଇ ତାଙ୍କ ଅଧିକାରୀକ ବୟାନରେ କୌଣସି ନେତାଙ୍କ ନାଁ ସିଧାସଳଖ ନେଇନାହାନ୍ତି ନାଁ ଇରାନ ସରକାର ଘୋଷଣା କରିଛନ୍ତି । ତଥାପି ଇରାରନ ଖବରକାଗଜ 'ହମଶହରୀ' ମୋଜତବାଙ୍କ ବୟାନର ଟିକ୍ ପରେ ବିଳମ୍ବିତ ରାତିରେ ୧୩ ବିଶ୍ଵ ନେତାଙ୍କ ତାଲିକା ଜାରି କରିଛି ।

ଏଥିସହ ପଢ଼ନ୍ତୁ: ହର୍ମୁଜ ପ୍ରଣାଳୀକୁ ଇରାନ ବନ୍ଦ କରିବାରୁ ଆମେରିକା ପୁଣି କଲା ଏୟାରଷ୍ଟ୍ରାଇକ୍ 

ଯେଉଁଥିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଇସ୍ରାଏଲ୍ ପ୍ରଧାନମନ୍ତ୍ରୀ ନେତାନ୍ୟାହୁଙ୍କୁ ବନ୍ଧୁକ ମୁନରେ ରଖାଯାଇଛି । ଅନ୍ୟ ନେତା କଏଦୀ ପୋଷାକରେ ଅଛନ୍ତି ।

ଆମେରିକା- ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ବିଦେଶ ମନ୍ତ୍ରୀ ମାର୍କୋ ଋବିୟୋ, ପ୍ରତିରକ୍ଷା ମନ୍ତ୍ରୀ ପିଟ ହେଗସେଥ୍
ଇସ୍ରାଏଲ୍- ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ, ପ୍ରତିରକ୍ଷା ମନ୍ତ୍ରୀ କାଟଜ, ଗିଦୋନ ସାର
ବ୍ରିଟେନ୍- ପ୍ରଧାନମନ୍ତ୍ରୀ କିର ଷ୍ଟାର୍ମର
ଫ୍ରାନ୍ସ- ରାଷ୍ଟ୍ରପତି ଇମ୍ମାନୁଏଲ୍ ମାକ୍ରୋନ
ଇଟାଲୀ- ପ୍ରଧାନମନ୍ତ୍ରୀ ଜିୟୋର୍ଜିଆ ମେଲୋନି
ଜର୍ମାନୀ- ଚାନ୍ସଲର ଫ୍ରେଡରିକ ମର୍ଜ