କାତାରରେ ଥିବା ବିଶ୍ୱର ବୃହତ୍ତମ LNG ପ୍ଲାଣ୍ଟ ଉପରେ ଇରାନର ମିସାଇଲ ମାଡ଼ । ଫଳରେ ସେଠାରେ ଭୟଙ୍କର ନିଆଁ ଲାଗିଯାଇଛି। ପାରସ୍ୟ ଉପସାଗରୀୟ ଅଞ୍ଚଳରେ ଥିବା ଶକ୍ତି କେନ୍ଦ୍ରଗୁଡ଼ିକ ଉପରେ କ୍ରମାଗତ ଆକ୍ରମଣ ଯୋଗୁଁ ଏହି ସଂଘର୍ଷ ଏବେ ଏକ ନୂଆ ମୋଡ଼ ନେଇଛି ।

ବିଶ୍ୱର ପ୍ରାୟ ଏକ-ପଞ୍ଚମାଂଶ LNG ଯୋଗାଣ କରୁଥିବା 'ରାସ ଲାଫାନ ଇଣ୍ଡଷ୍ଟ୍ରିଆଲ ସିଟି' ଇରାନର ମିସାଇଲ ମାଡ଼ରେ ବହୁଳ ଭାବେ କ୍ଷତିଗ୍ରସ୍ତ ହୋଇଛି । ଆକ୍ରମଣ ଯୋଗୁଁ ସେଠାରେ ନିଆଁ ଲାଗିଯାଇଛି, ଯାହାକୁ ନିୟନ୍ତ୍ରଣ କରିବାକୁ କାତାର କର୍ତ୍ତୃପକ୍ଷ ଚେଷ୍ଟା କରୁଛନ୍ତି। ଆବୁଧାବିର 'ହବଶାନ' ଗ୍ୟାସ ସୁବିଧା କେନ୍ଦ୍ର ଉପରେ ମଧ୍ୟ ଆକ୍ରମଣ ହୋଇଛି । ଯାହା ଫଳରେ ଏହାକୁ ବନ୍ଦ କରିବାକୁ ପଡ଼ିଛି ।

ସେହିପରି ସାଉଦି ଆରବର ପୂର୍ବ ପ୍ରାନ୍ତରେ ଥିବା ଏକ ଗ୍ୟାସ ପ୍ଲାଣ୍ଟ ଉପରେ ହୋଇଥିବା ଡ୍ରୋନ୍ ଆକ୍ରମଣକୁ ପ୍ରତିହତ କରାଯାଇଛି । ଏହି ଆକ୍ରମଣକୁ ସାର୍ବଭୌମତ୍ୱର ଉଲ୍ଲଂଘନ ଏବଂ ଆଞ୍ଚଳିକ ସ୍ଥିରତା ପ୍ରତି ଏକ ବିପଦ ବୋଲି ଦର୍ଶାଇଛି କାତାର । ପ୍ରତିକ୍ରିୟା ସ୍ୱରୂପ, କାତାର ସରକାର ଇରାନର ସାମରିକ ଏବଂ ସୁରକ୍ଷା ଅଧିକାରୀମାନଙ୍କୁ ୨୪ ଘଣ୍ଟା ମଧ୍ୟରେ ଦେଶ ଛାଡ଼ିବାକୁ ନିର୍ଦ୍ଦେଶ ଦେଇଛନ୍ତି ।

ସେପଟେ ଇରାନ ଯୁଦ୍ଧ ପାଇଁ ଆମେରିକା ରାଷ୍ଟ୍ରପତି ଟ୍ରମ୍ପ ଦାୟୀ । ଇରାନ ଯୁଦ୍ଧ ପ୍ରତିବାଦରେ ଇସ୍ତଫା ଦେବାର ଦିନକ ପରେ ଏଭଳି କହିଛନ୍ତି ଆମେରିକା ରାଷ୍ଟ୍ରପତିଙ୍କ ପୂର୍ବତନ କାଉଣ୍ଟର-ଟେରରିଜିମ୍ ମୁଖ୍ୟ ଜୋ କେଣ୍ଟ୍ । ଏହା ସହ ଇସ୍ରାଏଲକୁ ଏହି ଯୁଦ୍ଧ ପାଇଁ ଦାୟୀ କରିଛନ୍ତି ।

ଏଥିସହ ତେହେରାନ ପରମାଣୁ ଅସ୍ତ୍ରଶସ୍ତ୍ର ବିକାଶ କରୁନାହିଁ ବୋଲି ମଧ୍ୟ ସେ ଦାବି କରିଛନ୍ତି। ନ୍ୟାସନାଲ କାଉଣ୍ଟର-ଟେରରିଜିମ୍ ସେଣ୍ଟରର ନିର୍ଦ୍ଦେଶକ ଭାବେ କାର୍ଯ୍ୟ କରିଥିବା କେଣ୍ଟ୍ ଏକ ସାକ୍ଷାତକାରରେ କହିଛନ୍ତି ଇସ୍ରାଏଲୀମାନେ ହିଁ ଏହି ପଦକ୍ଷେପ ନେବାକୁ ନିଷ୍ପତ୍ତି ନେଇଥିଲେ । ଟ୍ରମ୍ପ ଏବଂ ତାଙ୍କ ପ୍ରଶାସନର କିଛି ବରିଷ୍ଠ ଅଧିକାରୀ ଦାବି କରିଛନ୍ତି ଯେ, ଫେବୃଆରୀ ୨୮ ରେ ଇରାନ ଉପରେ ଆକ୍ରମଣ କରିବା ଜରୁରୀ ଥିଲା କାରଣ ପରମାଣୁ କାର୍ଯ୍ୟକ୍ରମ ଆମେରିକାର ଜାତୀୟ ସୁରକ୍ଷା ପାଇଁ ଏକ ବିପଦ ଥିଲା ।

ଅନ୍ୟପଟେ ଟ୍ରମ୍ପଙ୍କ ପୂର୍ବତନ ଆତଙ୍କବାଦ ବିରୋଧୀ ମୁଖ୍ୟ କହିଛନ୍ତି ଯେ ୨୦୦୪ ମସିହାରୁ ଇରାନର ଇସଲାମିକ ଶାସନରେ ଏକ 'ଫତୱା' ବା ନିର୍ଦ୍ଦେଶାବଳୀ ଜାରି ରହିଛି । ଯାହା ସେମାନଙ୍କୁ ପରମାଣୁ ଅସ୍ତ୍ର ବିକାଶ କରିବାରେ ବାରଣ କରେ । ସେହି ଫତୱାକୁ ଅବମାନନା କରାଯାଉଥିବାର କୌଣସି ଗୁପ୍ତଚର ସୂଚନା ଆମ ପାଖରେ ନଥିଲା ।

ଏଥିସହ ପଢ଼ନ୍ତୁ:  ମୁହାଁମୁହିଁ ହେବେ Lancer vs Dancer; ମହାବିନାଶ ଆଡ଼କୁ ମୁହାଁଉଛି ମଧ୍ୟ ପ୍ରାଚ୍ୟ ସଂକଟ