Nuclear Site Attack / ନତାଞ୍ଜ ପରମାଣୁ କେନ୍ଦ୍ର ଉପରେ ଭୟଙ୍କର ଏୟାର ଷ୍ଟ୍ରାଇକ୍, ବଢ଼ିଲା ବିକିରଣ ଚିନ୍ତା

ପରମାଣୁ ଯୁଦ୍ଧ ମୁହାଁ ଇରାନ ଆମେରିକା-ଇସ୍ରାଏଲ ମହାଯୁଦ୍ଧ । ମଧ୍ୟପ୍ରାଚ୍ୟ ଯୁଦ୍ଧର ୨୨ ଦିନରେ ଥରିଲା ଇରାନର ନତାଞ୍ଜ ପରମାଣୁ କେନ୍ଦ୍ର । ଏହି ପରମାଣୁ କେନ୍ଦ୍ର ଉପରେ ହୋଇଛି ଏୟାର ଷ୍ଟ୍ରାଇକ୍ । ତେବେ ବିକିରଣ ହୋଇଛି କି ନାହିଁ ତାହା ସ୍ପଷ୍ଟ ହୋଇନାହିଁ । ଅନ୍ୟପଟେ ସୁପର ପାୱାର ଆମେରିକାକୁ ଦୋହଲାଇ ଦେଇଛି ଇରାନ । ତେହେରାନଠାରୁ ୪୦୦୦ କିଲୋମିଟର ଦୂରରେ ଡିଏଗୋ ଗାର୍ସିଆରେ ଥିବା ଆମେରିକା-ବ୍ରିଟେନର ସେନା ବେସ୍‌ ଉପରେ ବାଲିଷ୍ଟିକ୍ ମିସାଇଲ୍ ମାଡ଼ କରିଛି ଇରାନ । ଏତେ ଦୂରଗାମୀ ମିସାଇଲ ଦେଖି ଛାନିଆ ଆମେରିକା ।

ପରମାଣୁ ଯୁଦ୍ଧ ମୁହାଁ ଇରାନ ଆମେରିକା-ଇସ୍ରାଏଲ ମହାଯୁଦ୍ଧ । ସମୟ ଗଡ଼ିବା ସହ ବଢ଼ୁଛି ଆକ୍ରମଣ । କିଏ କାହାକୁ ଛାଡ଼ିବା ସ୍ଥିତିରେ ନାହାନ୍ତି । ଏଭଳି ସମୟରେ ଆଜି ଇରାନର ନତାଞ୍ଜ ପରମାଣୁ ସମୃଦ୍ଧକରଣ କେନ୍ଦ୍ର ଉପରେ ହୋଇଛି ଏୟାର ଷ୍ଟ୍ରାଇକ୍ । IAEA ମଧ୍ୟ ଆକ୍ରମଣ ହୋଇଥିବା ସ୍ପଷ୍ଟ କରିଛି । ତେବେ ଏହି ଆକ୍ରମଣ ଯୋଗୁ ପରମାଣୁ ବିକିରଣ ହୋଇଛି କି ନାହିଁ ତାହା ସ୍ପଷ୍ଟ ହୋଇନି ।

ଆମେରିକା ଓ ଇସ୍ରାଏଲକୁ କଡ଼ା ଜବାବ ଦେଉଛି ଇରାନ । ଯୁଦ୍ଧର ୨୨ତମ ଦିନରେ ଇରାନ ନିଜ ବାଲାଷ୍ଟିକ ମିସାଇଲର କ୍ଷମତା ଦେଖାଇ ଟ୍ରମ୍ପଙ୍କ ନିଦ ଉଡ଼ାଇ ଦେଇଛି । ଇରାନଠାରୁ ୪୦୦୦ କିଲୋମିଟର ଦୂରରେ ଡିଏଗୋ ଗାର୍ସିଆରେ ଥିବା ଆମେରିକା-ବ୍ରିଟେନର ଏକ ସେନା ବେସ୍‌ ଉପରେ ଦୁଇଟି ମଧ୍ୟବର୍ତ୍ତୀ-ଦୂରଗାମୀ ବାଲିଷ୍ଟିକ୍ ମିସାଇଲ୍ ମାଡ଼ କରିଛି ଇରାନ । ଏତେ ଦୂରଗାମୀ ବାଲାଷ୍ଟିକ ମିସାଇଲ ଦେଖି ଛାନିଆ ଆମେରିକା ।

ସୂଚନା ଅନୁଯାୟୀ ଇରାନ ପାଖରେ ସର୍ବାଧିକ ୨ ହଜାର କିଲୋମିଟର ଲକ୍ଷ୍ୟଭେଦୀ ମିସାଇଲ ରହିଛି । ତେବେ ଏତେ ଦୂରଗାମୀ ମିସାଇଲ ମାଡ଼ ପରେ ଯୁଦ୍ଧର ଆକାର ଓ ପ୍ରକାର ବଦଳିଯାଇଛି । କାରଣ ଡିଏଗୋ ଗାର୍ସିଆ ଆମେରିକାର ବିଶ୍ୱସ୍ତରୀୟ ଶକ୍ତି ପ୍ରଦର୍ଶନର ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର । ଏଠାରେ ଆମେରିକାର ଭାରୀ ବୋମାବର୍ଷୀ ବିମାନ ଏବଂ ନଜର ରଖିବା ପାଇଁ ଗୁପ୍ତଚର ବିମାନଗୁଡ଼ିକ ରହିଥାଏ । ଏହି ଆକ୍ରମଣ କରି ଇରାନ ଆମେରିକାକୁ ଏକ ବଡ଼ ଚ୍ୟାଲେଂଜ ଦେଇଛି ।

ଯୁଦ୍ଧ ଶେଷ ପାଇଁ କହୁଥିବା ଟ୍ରମ୍ପ ମଧ୍ୟପ୍ରାଚ୍ୟକୁ ଅଧିକ ୩ଟି ଯୁଦ୍ଧ ଜାହାଜ ଓ ୨ ହଜାର ୫ ଶହ ଅତିରିକ୍ତ ମେରାଇନ ସୈନ୍ୟ ପଠାଇଛନ୍ତି । ସେପଟେ ଯୁଦ୍ଧ ଯୋଗୁଁ ଅଶୋଧିତ ତୈଳ ଦର ବଢ଼ୁଥିବାରୁ ଏହାକୁ ନିୟନ୍ତ୍ରଣ ପାଇଁ ଟ୍ରମ୍ପ ପ୍ରଶାସନ ଇରାନୀ ତୈଳ ଉପରୁ କିଛି କଟକଣା କୋହଳ କରିଛନ୍ତି ।

ଯୁଦ୍ଧର ଘନଘଟା ଭିତରେ ଇରାନରେ ୧୩ ଶହରୁ ଅଧିକ ଲୋକଙ୍କ ଜୀବନ ଯାଇଥିବା ବେଳେ ଲେବାନନରେ ହଜାରେରୁ ଅଧିକ ଲୋକଙ୍କ ମୃତ୍ୟୁ ହେଲାଣି । ସେହିପରି ଇସ୍ରାଏଲରେ ୧୯ ଓ ଆମେରିକାର ୧୩ ଜଣ ସୈନିକ ପ୍ରାଣ ହରାଇଛନ୍ତି ।