Israel Power Change / ଇସ୍ରାଏଲରେ ବଦଳିବ ସରକାର; ଏଇସେନକଟ୍‌ଙ୍କୁ ମିଳିଲା ସରକାର ଗଠନ ପାଇଁ ପ୍ରଥମ ସୁଯୋଗ

ଜେରୁଜେଲମ: ଇସ୍ରାଏଲରେ ସରକାର ପରିବର୍ତ୍ତନକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି । ଦେଶର ରାଷ୍ଟ୍ରପତି ଆଇଜାକ୍ ହର୍ଜୋଗ୍ ‘ୟାଶାର୍’ ପାର୍ଟିର ମୁଖ୍ୟ ତଥା ପୂର୍ବତନ ପ୍ରତିରକ୍ଷା ବାହିନୀ ମୁଖ୍ୟ ଏଇସେନକଟ୍‌ଙ୍କୁ ସରକାର ଗଠନ ପାଇଁ ପ୍ରଥମ ସୁଯୋଗ ଦେଇଛନ୍ତି । ଏହା ଦୀର୍ଘଦିନ ଧରି କ୍ଷମତାରେ ଥିବା ବେଞ୍ଜାମିନ୍ ନେତାନ୍ୟାହୁଙ୍କ ପାଇଁ ଏକ ବଡ଼ ରାଜନୈତିକ ଝଟକା ବୋଲି କୁହାଯାଉଛି । ସେପଟେ ଆଜି (ରବିବାର) ଜେରୁଜେଲମସ୍ଥିତ ରାଷ୍ଟ୍ରପତି ଭବନରେ ଏକ ଔପଚାରିକ ସମାରୋହରେ ଏଇସେନକଟ୍‌ଙ୍କୁ ସରକାର ଗଠନର ଦାୟିତ୍ୱ ପ୍ରଦାନ କରାଯିବାର କାର୍ଯ୍ୟକ୍ରମ ରହିଛି ।

ଅକ୍ଟୋବର ୨୭ରେ ହୋଇଥିବା ନିର୍ବାଚନରେ କୌଣସି ଦଳ କିମ୍ବା ମେଣ୍ଟକୁ ସ୍ପଷ୍ଟ ସଂଖ୍ୟାଗରିଷ୍ଠତା ମିଳିନଥିଲା । ଇସ୍ରାଏଲର ୧୨୦ ଆସନ ବିଶିଷ୍ଟ ସଂସଦରେ ସରକାର ଗଠନ ପାଇଁ ଆବଶ୍ୟକ ସମର୍ଥନ ହାସଲ କରିବା ଏବେ ଏଇସେନକଟ୍‌ଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ । ରାଷ୍ଟ୍ରପତି ହର୍ଜୋଗ୍ ସପ୍ତାହବ୍ୟାପୀ ବିଭିନ୍ନ ରାଜନୈତିକ ଦଳ ସହ ଆଲୋଚନା କରିବା ପରେ ଏହି ନିଷ୍ପତ୍ତି ନେଇଛନ୍ତି । ନିର୍ବାଚିତ ପ୍ରତିନିଧିଙ୍କ ମଧ୍ୟରୁ ୬୭ ଜଣ ଏଇସେନକଟ୍‌ଙ୍କୁ ସମର୍ଥନ ଜଣାଇଥିବାବେଳେ ୪୬ ଜଣ ନେତାନ୍ୟାହୁଙ୍କ ସପକ୍ଷରେ ମତ ଦେଇଥିଲେ । ଅନ୍ୟ ୭ ଜଣ କୌଣସି ପକ୍ଷକୁ ସମର୍ଥନ କରିନଥିଲେ।

• ଜାତୀୟ ଏକତା ସରକାର ଗଠନ ଉପରେ ଗୁରୁତ୍ୱ

ଇସ୍ରାଏଲର ରାଷ୍ଟ୍ରପତି ହର୍ଜୋଗ୍ ଏକ ଜାତୀୟ ଏକତା ସରକାର ଗଠନ ସପକ୍ଷରେ ମତ ଦେଇଛନ୍ତି । ଏଭଳି ସରକାରରେ ବିଭିନ୍ନ ରାଜନୈତିକ ବିଚାରଧାରାର ଯିହୁଦୀ ଇସ୍ରାଏଲୀଙ୍କୁ ସାମିଲ କରିବାକୁ ସେ ଚାହୁଁଛନ୍ତି । ଅନ୍ୟପଟେ, ନେତାନ୍ୟାହୁ ମଧ୍ୟ ଏକତା ସରକାର ଗଠନ ପାଇଁ ଆହ୍ୱାନ ଦେଇଛନ୍ତି । କିନ୍ତୁ ବିରୋଧୀ ମେଣ୍ଟ ତାଙ୍କୁ କ୍ଷମତାରୁ ହଟାଇବା ପରେ ହିଁ ଏଭଳି ସରକାର ଗଠନ ନେଇ ଆଲୋଚନା କରିବ ବୋଲି ସ୍ପଷ୍ଟ କରିଛି । ନେତାନ୍ୟାହୁଙ୍କ ବିରୋଧରେ ଦୁର୍ନୀତି ମାମଲା ରହିଛି, ଯାହା ତାଙ୍କ ରାଜନୈତିକ ଭବିଷ୍ୟତକୁ ପ୍ରଭାବିତ କରିପାରେ । ତେଣୁ ତାଙ୍କର କ୍ଷମତାରୁ ବିଦାୟ ଇସ୍ରାଏଲର ରାଜନୀତିରେ ଏକ ବଡ଼ ପରିବର୍ତ୍ତନ ଆଣିପାରେ ।

ପଢନ୍ତୁ ଏହି ଖବର: ଆମେରିକା ମଧ୍ୟବର୍ତ୍ତୀ ନିର୍ବାଚନରେ ଟ୍ରମ୍ପଙ୍କୁ ଝଟକା, ଭାରତ ପାଇଁ କମିଲା ଟ୍ରେଡ୍ ଡିଲ୍‌ର ଚାପ

• ଯୁଦ୍ଧ ନୀତିରେ ହେବ କି ପରିବର୍ତ୍ତନ ?

ଇସ୍ରାଏଲରେ ନେତୃତ୍ୱ ପରିବର୍ତ୍ତନ ହେଲେ ଦେଶର ଚାଲିଥିବା ଯୁଦ୍ଧ ଓ ସୁରକ୍ଷା ନୀତିରେ ପରିବର୍ତ୍ତନ ଆସିବ କି ନାହିଁ, ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଗାଜାରେ ଚାଲିଥିବା ଯୁଦ୍ଧ ଏବଂ ଇରାନ ସହ ବଢ଼ୁଥିବା ଉତ୍ତେଜନା ଇସ୍ରାଏଲର ସୁରକ୍ଷା ନୀତିକୁ ପ୍ରଭାବିତ କରୁଛି । ଏପରି ସ୍ଥିତିରେ ଏଇସେନକଟ୍‌ଙ୍କ ରାଜନୈତିକ ମେଣ୍ଟ ଓ ଆଞ୍ଚଳିକ ସୁରକ୍ଷା ପ୍ରତି ତାଙ୍କର ଆଭିମୁଖ୍ୟ ଆଗାମୀ ଦିନରେ ଗୁରୁତ୍ୱପୂର୍ଣ୍ଣ ହେବ । ଏବେ ଏଇସେନକଟ୍‌ଙ୍କ ସମ୍ମୁଖରେ ସବୁଠାରୁ ବଡ଼ ଆହ୍ୱାନ ହେଉଛି ବିଭିନ୍ନ ଦଳକୁ ଏକାଠି କରି ଏକ ସ୍ଥିର ମେଣ୍ଟ ସରକାର ଗଠନ କରିବା । ଏଥିରେ ସେ ସଫଳ ହେବେ କି ନାହିଁ, ତାହା ଆଜି ସନ୍ଧ୍ୟା ସୁଦ୍ଧା ସ୍ପଷ୍ଟ ହେବ ।