ଶୁକ୍ରବାର ଜାପାନରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି । ଜାପାନର ରାଜଧାନୀ ଟୋକିଓର ଏକ ପ୍ରାଥମିକ ବିଦ୍ୟାଳୟରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ବେଶ୍ ଆତଙ୍କ ସୃଷ୍ଟି ହୋଇଥିଲା । ସ୍କୁଲରେ ନିଆଁ ଲାଗିବା ସମୟରେ ପ୍ରାୟ ୩୩୦ ଜଣ ଛାତ୍ରଛାତ୍ରୀ ଓ ଶିକ୍ଷକ ଉପସ୍ଥିତ ଥିଲେ । କିନ୍ତୁ ସୌଭାଗ୍ୟବଶତଃ ସମସ୍ତଙ୍କୁ ସୁରକ୍ଷିତ ଭାବେ ବାହାରକୁ ସ୍ଥାନାନ୍ତର କରାଯାଇଥିଲା । ଯାହାଫଳରେ କୌଣସି ବଡ଼ ଧରଣର କ୍ଷତି ହୋଇନାହିଁ ।

ଏହି ଘଟଣା ଟୋକିଓର କିଟା ୱାର୍ଡର ଟାକିନୋଗାୱା ଡାଇସାନ ପ୍ରାଥମିକ ବିଦ୍ୟାଳୟରେ ଘଟିଛି । ଟୋକିଓ ଅଗ୍ନିଶମ ବିଭାଗ ଅନୁଯାୟୀ, ସ୍କୁଲର ଚାରି ମହଲା କୋଠାର ଉପର ମହଲାରେ ଥିବା ସଙ୍ଗୀତ କୋଠରୀ ନିକଟରେ ନିଆଁ ଲାଗିଥିଲା । ଚତୁର୍ଥ ମହଲାର ପ୍ରାୟ ୨୦୦ ବର୍ଗ ମିଟର ଅଞ୍ଚଳକୁ ନିଆଁ ଖୁବ୍ ଶୀଘ୍ର ବ୍ୟାପିଥିଲା ।

Fire Erupts at Tokyo : Elementary School; Hundreds Evacuated Safely

A fire broke out at an elementary school in Tokyo, Japan, prompting a large-scale emergency response amid initial fears that children were trapped inside. Authorities later confirmed that approximately 300… pic.twitter.com/u3QASAjFYc

— Dharm (@dhram00) June 19, 2026

ଘଟଣାର ଭିଡିଓ ଏବଂ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏଥିରେ ସ୍କୁଲର ଝରକାରୁ କଳା ଧୂଆଁ ବାହାରୁଥିବା ଦେଖିବାକୁ ମିଳୁଛି । ଘଟଣାସ୍ଥଳରେ ଏକାଧିକ ଦମକଳ ଗାଡ଼ି ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ଅଗ୍ନିକାଣ୍ଡ ସମୟରେ କିଛି ଛାତ୍ର ଏବଂ ଜଣେ ଶିକ୍ଷକ କୋଠା ଭିତରେ ଫସି ରହିଥିଲେ । ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସେମାନଙ୍କୁ ସୁରକ୍ଷିତ ଉଦ୍ଧାର କରିଥିଲେ ।

ସ୍ଥାନୀୟ ଅଧିକାରୀଙ୍କ ଅନୁଯାୟୀ, ଦୁର୍ଘଟଣାରେ ମୋଟ ୧୦ ଜଣ ଆହତ ହୋଇଛନ୍ତି । ଧୂଆଁ ଶ୍ୱାସକ୍ରିୟା ଯୋଗୁଁ ସାତ ଜଣ ଛାତ୍ର ପ୍ରଭାବିତ ହୋଇଥିଲେ, ଜଣେ ଛାତ୍ର ଖସିପଡ଼ି ଆହତ ହୋଇଥିଲେ ଏବଂ ଦୁଇଜଣ ଶିକ୍ଷକ ମଧ୍ୟ ଆହତ ହୋଇଥିଲେ। ସମସ୍ତଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି ଏବଂ କାହାରି ଜୀବନ ପ୍ରତି ବିପଦ ନାହିଁ ।
ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ପଞ୍ଚମ ଶ୍ରେଣୀର ଛାତ୍ରମାନେ ସଙ୍ଗୀତ ଶ୍ରେଣୀରେ ଥିବା ସମୟରେ ଅଗ୍ନିକାଣ୍ଡ ଘଟିଥିଲା । ତେବେ ଅଗ୍ନିକାଣ୍ଡର ସଠିକ୍ କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି ।