ଦୁନିଆରେ ଅନେକ ଅଜବ ଏବଂ ଭୟଙ୍କର କାହାଣୀ ଆପଣ ଶୁଣିଥିବେ । କିନ୍ତୁ ୫୬ ବର୍ଷୀୟା ଇରାନୀ ମହିଳା କୋଲସୁମ ଆକବରୀଙ୍କ କାହାଣୀ ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ସତରେ କ'ଣ ଜଣେ ମହିଳା ଏତେ ନୃଶଂସ ଓ ଭୟଙ୍କର ହୋଇପାରେ । ଏହି ଇରାନୀ ମହିଳାଙ୍କ ବିରୋଧରେ ଗତ ୨୨ ବର୍ଷ ମଧ୍ୟରେ ତାଙ୍କ ୧୧ ସ୍ୱାମୀଙ୍କୁ ବିଷ ଦେଇ ହତ୍ୟା କରିବାର ଅଭିଯୋଗ ରହିଛି । ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଯେ ମହିଳା ଜଣକ ନିଜେ କହିଛନ୍ତି ଯେ ସେ ହୁଏତ ୧୩ କିମ୍ବା ୧୫ ଜଣଙ୍କୁ ହତ୍ୟା କରିଛନ୍ତି । ସଠିକ୍ ଭାବେ ସେ କେତେ ଜଣଙ୍କୁ ହତ୍ୟା କରିଛନ୍ତି ତାଙ୍କର ମନେ ନାହିଁ ।

ଇରାନୀ ମହିଳା କୋଲସୁମ ଆକବରୀଙ୍କ ପ୍ରଥମ ବିବାହ ୧୮ ବର୍ଷ ବୟସରେ ହୋଇଥିଲା । ତାଙ୍କର ପ୍ରଥମ ବିବାହ ଅଧିକ ଦିନ ଚାଲିପାରିନଥିଲା । ଦ୍ୱିତୀୟ ଥର ସେ ଜଣେ ବୃଦ୍ଧ ପୁରୁଷଙ୍କୁ ବିବାହ କରିଥିଲେ । ଯିଏ ତାଙ୍କୁ ପ୍ରତିଦିନ ମାଡ଼ ମାରୁଥିଲେ । ଏହା ପରେ ତାଙ୍କ ଭିତରେ ପ୍ରତିଶୋଧ ଏବଂ ଲୋଭ ଉଭୟ ସୃଷ୍ଟି ହୋଇଥିଲା । ତାଙ୍କ ଦ୍ୱିତୀୟ ସ୍ୱାମୀଙ୍କ ମୃତ୍ୟୁ ପରେ, କୋଲସୁମ ଏକ ଭୟଙ୍କର ରାସ୍ତା ବାଛିଥିଲେ । ସେ ବୃଦ୍ଧ, ଧନୀ ଏବଂ ଏକାକୀ ପୁରୁଷମାନଙ୍କୁ ବିବାହ କରିବା ଆରମ୍ଭ କଲେ ।

ଅଧିକ ପଢ଼ନ୍ତୁ: ଟ୍ରମ୍ପଙ୍କ `ଟାରିଫ୍' ଅଭିମାନ; କହିଲେ, `ଏବେ ବହୁତ ଡେରି ହୋଇଗଲାଣି, ଏସବୁ ଆଗରୁ କରିବାର ଥିଲା'

ବିବାହର କିଛି ଦିନ ପରେ ସେ ତାଙ୍କ ସ୍ୱାମୀଙ୍କୁ ଔଷଧ ଏବଂ ମଦରେ ବିଷ ମିଶାଇ ପିଇବାକୁ ଦେଉଥିଲେ । ଅନେକ ଥର ଯେତେବେଳେ ବିଷ କାମ କରୁନଥିଲା, ସେ ତା'ର ସ୍ବାମୀଙ୍କୁ ଏକ ତକିଆରେ ଶ୍ୱାସରୁଦ୍ଧ କରି ହତ୍ୟା କରୁଥିଲା । ଆଉ ପରେ ତା'ର ସ୍ବାମୀର ମୃତ୍ୟୁ ବୃଦ୍ଧାବସ୍ଥା ଓ ରୋଗ ପାଇଁ ହୋଇଥିବା କହି ସହଜରେ ଖସି ଯାଉଥିଲା । ଲୋକମାନେ ମଧ୍ୟ ଭାବୁଥିଲେ ବୃଦ୍ଧ ଜଣକ ରୋଗରେ ପଡ଼ି ମୃତ୍ୟୁବରଣ କରିଛନ୍ତି । କିନ୍ତୁ ପ୍ରକୃତରେ ଏହା ସ୍ବାଭାବିକ ମୃତ୍ୟୁ ନୁହେଁ ବରଂ ହତ୍ୟା ଥିଲା ।

ତେବେ କୋଲସୁମ କେବେ ବି ଗୋଟିଏ ସ୍ଥାନରେ ରହି ହତ୍ୟା କରୁନଥିଲା । ସେ ବିଭିନ୍ନ ସହରକୁ ଯାଉଥିଲେ, ସେଠାରେ ବିବାହ କରୁଥିଲେ ଏବଂ ପରେ ତାଙ୍କ ସ୍ୱାମୀଙ୍କୁ ହତ୍ୟା କରୁଥିଲେ । ଏହି କାରଣରୁ, ପୋଲିସ କେବେ କୋଲସୁମକୁ ସନ୍ଦେହ କରିନଥିଲା । ଲୋକମାନେ ଭାବୁଥିଲେ ଯେ ସେ ଜଣେ ଗରୀବ ବିଧବା ଯିଏ ବାରମ୍ବାର ତାଙ୍କ ସ୍ୱାମୀଙ୍କୁ ହରାଇବାର ଯନ୍ତ୍ରଣା ଭୋଗୁଛନ୍ତି । କିନ୍ତୁ ଏହି ସବୁ ମୃତ୍ୟୁ ପଛରେ କୋଲସୁମ ହିଁ ଥିଲା ନିଜେ ମାଷ୍ଟରମାଇଣ୍ଡ।

ତେବେ ସବୁ ସମୟରେ ଚୋର ଘର ଅନ୍ଧାର ନଥାଏ । ଶେଷରେ ୨୦୨୩ରେ କୋଲସୁମଙ୍କ ଅସଲ ଚେହେରା ପଦାରେ ପଡ଼ିଥିଲା । ତାଙ୍କର ଶେଷ ଶିକାର ହୋଇଥିଲେ ୮୨ ବର୍ଷୀୟ ଘୋଲାମରେଜା ବାବାଇ । ବାବାଇଙ୍କ ହଠାତ୍ ମୃତ୍ୟୁ ପରେ, ତାଙ୍କ ପୁଅ ସନ୍ଦେହପ୍ରକାଶ କରିଥିଲେ । ଆଉ ଶେଷରେ ସେ ଜାଣିବାକୁ ପାଇଥିଲେ ଯେ ତାଙ୍କ ବାପାଙ୍କ ମୃତ୍ୟୁ ପଛରେ ରହିଛି କୋଲସୁମଙ୍କ ହାତ । ଏହାପରେ ପୋଲିସ୍ ଯେତେବେଳେ କୋଲସୁମଙ୍କୁ ହତ୍ୟା ବାବଦରେ ପଚରାଉଚରା କରିଥିଲା, ପ୍ରଥମେ ସେ ମିଛ କହିଥିଲା । କିନ୍ତୁ ପରେ ସେ ନିଜେ ସ୍ୱୀକାର କରିଥିଲା ଯେ ସେ ତା'ର ଏକାଧିକ ସ୍ୱାମୀଙ୍କୁ ବିଷ ଦେଇ ହତ୍ୟା କରିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more