Israel attack / ଯୁଦ୍ଧବିରତି ସତ୍ତ୍ଵେ ଲେବାନନ ଉପରେ ଇସ୍ରାଏଲର ଭୟଙ୍କର ଆକ୍ରମଣ; ଛାରଖାର ଦେଶ

ପଶ୍ଚିମ ଏସିଆରେ ଯୁଦ୍ଧବିରତି ସାରା ବିଶ୍ଵକୁ ଆଶ୍ଵସ୍ତି ଦେଇଥିଲା । ମାତ୍ର ବୁଧବାର ରାତିରେ ଲେବାନନ ଉପରେ ଇସ୍ରାଏଲ ସିରିଜ୍ ବିମାନ ଆକ୍ରମଣ କରିଛି । ଆମେରିକା ଓ ଇରାନ ମଧ୍ୟରେ ଯୁଦ୍ଧ ବିରତି ଘୋଷଣାର କିଛି ଘଣ୍ଟା ମଧ୍ୟରେ ଇସ୍ରାଏଲ ଏହି ମିସାଇଲ ମାଡ଼ କରିଛି । ୧୦ ମିନିଟ୍ ମଧ୍ୟରେ ପ୍ରାୟ ୧୦୦ ମିସାଇଲ ମାଡ଼ ଯୋଗୁଁ ଲେବାନନରେ ୨୫୦ରୁ ଅଧିକ ଲୋକଙ୍କ ମୃତ୍ୟୁ ଘଟିଛି ଓ ୧୧୦୦ରୁ ଊର୍ଦ୍ଧ୍ଵ ଆହତ ହୋଇଛନ୍ତି ।

ବୁଧବାର ଅପରାହ୍ନରେ ପ୍ରଥମେ ବେରୁତ ରାସ୍ତା ଉପରେ ଗୋଟିଏ ପରେ ଗୋଟିଏ ବଡ଼ ଧମାକା ହୋଇଥିଲା । ସଙ୍ଗେ ସଙ୍ଗେ ଆକାଶ ଧୂଆଁମୟ ହୋଇଯାଇଥିଲା । ଇସ୍ରାଏଲ ଏହି ଆକ୍ରମଣ ଲେବାନନ୍ ସଶସ୍ତ୍ର ଗୋଷ୍ଠୀ ହିଜବୋଲାର କମାଣ୍ଡ ସେଣ୍ଟର ଓ ସୈନ୍ୟ ଠିକଣା ଉପରେ ହୋଇଛି । ଲେବାନନର ସିଭିଲ ଡିଫେନ୍ସ ସର୍ଭିସ ଅନୁସାରେ, ଇସ୍ରାଏଲ ଆକ୍ରମଣରେ ୨୫୪ ଜଣଙ୍କ ମୃତ୍ୟୁ ଘଟିଛି, ଯେଉଁଥିରେ କେବଳ ବେରୁତରୁ ୯୧ ଜଣ ଅଛନ୍ତି । ସେପଟେ ସ୍ଵାସ୍ଥ୍ୟ ମନ୍ତ୍ରଣାଳୟ ୧୮୨ ଜଣଙ୍କ ମୃତ୍ୟୁ ହୋଇଥିବା କହିଛି, କିନ୍ତୁ ଏହି ସଂଖ୍ୟା ଆହୁରି ବଢିପାରେ ବୋଲି ସ୍ପଷ୍ଟ କରିଛି ।

• ଯୁଦ୍ଧବିରତି ନିଷ୍ପତ୍ତି ମାନିଥିଲା ହିଜବୋଲା

ରଏଟର୍ସର ଏକ ରିପୋର୍ଟ ଅନୁସାରେ, ଲେବାନନର ଏହି ସଶସ୍ତ୍ର ଗୋଷ୍ଠୀ ହିଜବୋଲା ଯୁଦ୍ଧବିରତିକୁ ସମର୍ଥନ କରିବା ସହ ଆକ୍ରମଣ ବନ୍ଦ କରିଦେଇଥିବାବେଳେ ଇସ୍ରାଏଲ ଏହି ଆକ୍ରମଣ କରିଛି । ଇରାନ ଓ ଆମେରିକା ମଧ୍ୟରେ ଦୁଇ ସପ୍ତାହ ଧରି ଘୋଷଣା ହୋଇଥିବା ଯୁଦ୍ଧବିରତିକୁ ଇସ୍ରାଏଲ ସମର୍ଥନ କରୁଛି, କିନ୍ତୁ ଲେବାନନ ଉପରେ ଆକ୍ରମଣ ଜାରି ରଖିବ ବୋଲି ସ୍ପଷ୍ଟ କରିଛି । ସେପଟେ ହ୍ଵାଇଟ ହାଉସ୍ ମଧ୍ୟ ସମାନ କଥା ଦୋହରାଇଛି । ଆମେରିକା ଉପରାଷ୍ଟ୍ରପତି ଜେଡି ଭେନ୍ସ କହିଛନ୍ତି ଯେ ଏହା ଇରାନର ଭୁଲ ବୁଝାମଣା ଥିଲା ଯେ ଏହି ଯୁଦ୍ଧବିରତିରେ ଲେବାନନ ସାମିଲ ।

• ଆକ୍ରମଣ ପରେ ଲେବାନନ ଧ୍ଵସ୍ତ

ଇସ୍ରାଏଲ ଆକ୍ରମଣରେ ଲେବାନନର ଅନେକ ବଡ଼ ଅଟ୍ଟାଳିକା ଧ୍ଵଂସ ହୋଇଯାଇଛି । ସେହି ବଡ଼ ବଡ଼ ଅଟ୍ଟାଳିକାରେ ଫସିଥିବା ଲୋକଙ୍କୁ କ୍ରେନରେ ଉଦ୍ଧାର କରାଯାଉଛି । ଏହି ଆକ୍ରମଣରେ ଲେବାନନର ଦକ୍ଷିଣାଞ୍ଚଳକୁ ଦେଶ ସହିତ ସଂଯୋଗ କରୁଥିବା ଶେଷ ପୋଲକୁ ବି ଉଡ଼ାଇ ଦେଇଛି । ଆକ୍ରମଣ ଯୋଗୁଁ ଲେବାନନରେ ପ୍ରାୟ ୧୨ ଲକ୍ଷ ନିଜ ଘର ଛାଡ଼ିଛନ୍ତି । ଏହି ଆକ୍ରମଣକୁ ଲେବାନନ ରାଷ୍ଟ୍ରପତି ଜୋସେଫ ଓନ୍ କଡ଼ା ନିନ୍ଦା କରିଛନ୍ତି ।

ପଢନ୍ତୁ ଏହି ଖବର: ଇରାନ ଉପରେ ଆକ୍ରମଣ ସ୍ଥଗିତ! ୨ ସପ୍ତାହର ଯୁଦ୍ଧବିରତି ଘୋଷଣା କଲେ ଟ୍ରମ୍ପ

ହିଜବୋଲା ମଧ୍ୟ ଏହି ଆକ୍ରମଣକୁ "ଅସ୍ତ୍ରବିରତିର ଏକ ଗମ୍ଭୀର ଉଲ୍ଲଂଘନ" ବୋଲି କହିଛି ଏବଂ ଆକ୍ରମଣ ଜାରି ରହିଲେ ପରିଣାମ ଭୋଗିବାକୁ ଚେତାବନୀ ଦେଇଛି । ଇରାନର ରିଭୋଲ୍ୟୁସନରୀ ଗାର୍ଡ ମଧ୍ୟ ଲେବାନନରେ ଇସ୍ରାଏଲର କାର୍ଯ୍ୟକଳାପ ବନ୍ଦ ନ ହେଲେ "କଡ଼ା ଜବାବ" ଦିଆଯିବ ବୋଲି ଚେତାବନୀ ଦେଇଛି ।