ଜାକର୍ତ୍ତା: ନବମ ଶତାବ୍ଦୀରେ ନିର୍ମିତ ଇଣ୍ଡୋନେସିଆର ପ୍ରସିଦ୍ଧ ପ୍ରାମ୍ବନାନ ମନ୍ଦିରରେ ପାଳିତ ହୋଇଛି ଜାଗର ଉତ୍ସବ । ଇଣ୍ଡୋନେସିଆର ୟୋଗ୍ୟକାର୍ତ୍ତାରେ ରହିଛି ଏହି ପ୍ରାମ୍ବାନାନ ମନ୍ଦିର । ଯେଉଁଠି ବ୍ରହ୍ମା, ବିଷ୍ଣୁ ଓ ମହେଶ୍ଵର ତ୍ରିମୂର୍ତ୍ତି ପୂଜା ପାଆନ୍ତି । ଏଠାରେ ରହିଛି ୪୭ ମିଟର ସୁଉଚ୍ଚ ଶିବ ମନ୍ଦିର ।

ପ୍ରାମ୍ବନାନ ମନ୍ଦିର ପରିସରରେ ମୋଟ ୨୪୦ ମନ୍ଦିର ରହିଛି । ଏହି ମନ୍ଦିରର ୮ଟି ମୁଖ୍ୟ ଦ୍ଵାର ସହ ୮ଟି କ୍ଷୁଦ୍ର ମନ୍ଦିର ରହିଛି । ଯେଉଁଥିରେ ରାମାୟଣ ସମ୍ବନ୍ଧରେ ବିଭିନ୍ନ କଥା ଉଲ୍ଲେଖ ରହିଛି । ଓପାକ ନଦୀ କୂଳରେ ଥିବା ଏହି ମନ୍ଦିର ୟୋଗ୍ୟକାର୍ତ୍ତା ଓ କେନ୍ଦ୍ରୀୟ ଜାଭା ସୀମାରେ ରହିଛି ।

ଏଥିସହ ପଢ଼ନ୍ତୁ: ନିର୍ଦ୍ଧାରିତ ସମୟ ପୂର୍ବରୁ ଲିଙ୍ଗରାଜରେ ଉଠିଲା ମହାଦୀପ; ହୁଳହୁଳିରେ କମ୍ପିଲା ଦେବାଳୟ

୮୫୦ ଖ୍ରୀଷ୍ଟାଦ୍ଧରେ ନିର୍ମିତ ଏହି ମନ୍ଦିରକୁ ୟୁନେସ୍କୋ (UNESCO) ବିଶ୍ଵ ଐତିହ୍ୟ ସ୍ଥଳୀ ମାନ୍ୟ ମିଳିଛି । ଶତାବ୍ଦୀ ପରେ ପ୍ରାମ୍ବନାନ ମନ୍ଦିରରେ ପାଳିତ ହୋଇଛି ମହାଶିବରାତ୍ରୀ । ଯାହାକି ଇଣ୍ଡିନେସିଆରେ ବିଶ୍ଵାସ, ସଂସ୍କୃତି ଓ ପର୍ଯ୍ୟଟନର ସେତୁକୁ ଆହୁରି ମଜଭୁତ କରିଛି ।

ରବିବାର ଇଣ୍ଡୋନେସିଆର ପ୍ରାମ୍ବନାନ ମନ୍ଦିରରେ ମହାଶିବରାତ୍ରୀ ପାଳନ କରାଯାଇଛି । ଯେଉଁଥିରେ ଇଣ୍ଡୋନେସିଆର ଉପ ପର୍ଯ୍ୟଟନ ମନ୍ତ୍ରୀ ନି ଲୁହ ପୁଷ୍ପା ଯୋଗ ଦେଇଥିଲେ । ଏହି ଅବସରରେ ପ୍ରାମ୍ବନାନ ମନ୍ଦିରର ପର୍ଯ୍ୟଟନ ପାର୍କରେ ଜାଗରରେ ୧ ହଜାର ୮ ଦୀପ ପ୍ରଜ୍ଵଳନ ସହ ମଧ୍ୟରାତ୍ରୀରେ ମହାଭିଷେକ କରାଯାଇଛି । ଇଣ୍ଡୋନେସିଆର ଉପ ପର୍ଯ୍ୟଟନ ମନ୍ତ୍ରୀ ନି ଲୁହ ପୁଷ୍ପା ଆଧ୍ୟାତ୍ମିକ ପର୍ଯ୍ୟଟନ ଉପରେ ମତ ରଖିବା ସହ ମନ୍ଦିରର ଉନ୍ନତି ଉପରେ ଗୁରୁତ୍ଵ ଦେଇଛନ୍ତି ।

ଇଣ୍ଡୋନେସିଆରେ ଅବସ୍ଥାପିତ ଭାରତର ରାଷ୍ଟ୍ରଦୂତ ସନ୍ଦୀପ ଚକ୍ରବର୍ତ୍ତୀ ଜାଗର ଅବସରରେ ପ୍ରାମ୍ବନାନ ମନ୍ଦିର ପରିଦର୍ଶନ କରିଛନ୍ତି । ସେ କହିଛନ୍ତି, "ପ୍ରାମ୍ବନାନ ମନ୍ଦିରରେ ଶତାବ୍ଦୀ ପରେ ମହାଶିବରାତ୍ରୀ ପାଳନ କରାଯାଉଛି । ଏହି ମନ୍ଦିର ମହାଶିବଗ୍ରହ ନାଁରେ ଜଣାଶୁଣା । ଏଠାକୁ ସମଗ୍ର ଇଣ୍ଡୋନେସିଆରୁ ହିନ୍ଦୁ ଆସି ପୂଜାର୍ଚ୍ଚନା କରୁଛନ୍ତି ।"

ପ୍ରାମ୍ବନାନ ମନ୍ଦିର ପରିସରରେ ଥିବା ବିଭିନ୍ନ ମନ୍ଦିରର ଉନ୍ନତିକରଣ କରାଯିବ । ଯେଉଁଥିରେ ଭାରତ ସହଯୋଗ କରିବ ବୋଲି କହିଛନ୍ତି ଇଣ୍ଡୋନେସିଆରେ ଅବସ୍ଥାପିତ ଭାରତର ରାଷ୍ଟ୍ରଦୂତ ସନ୍ଦୀପ ଚକ୍ରବର୍ତ୍ତୀ । ସେ କହିଛନ୍ତି, "ଏବେ ସୁଦ୍ଧା ୧୬ଟି ମନ୍ଦିରର ଉନ୍ନତିକରଣ କରାଯାଇଛି, ସମସ୍ତ ମନ୍ଦିରର ଉନ୍ନତିକରଣ ପରେ ଏହା ବିଶ୍ଵ ଆଧ୍ୟାତ୍ମିକ ମାନଚିତ୍ରରେ ସ୍ଵତନ୍ତ୍ର ସ୍ଥାନ ପାଇବ ।"

ଏଥିସହ ପଢ଼ନ୍ତୁ: ଆସନ୍ତାକାଲି ଆକାଶରେ ଦେଖାଯିବ 'ଅଗ୍ନି ବଳୟ': କ'ଣ କରିବେ କ'ଣ କରିବେନି...

ପ୍ରଥମଥର ପାଇଁ ଇଣ୍ଡୋନେସିଆରେ ମହାଶିବରାତ୍ରୀ ବେଶ୍ ଧୁମଧାମରେ ପାଳିତ ହୋଇଛି । ଯେଉଁଥିଲେ ଡମ୍ବୁରୁର ଧ୍ଵନି ଭକ୍ତିର ପରିବେଶ ସୃଷ୍ଟି କରିଥିଲା । ପ୍ରାମ୍ବନାନ ମନ୍ଦିର ହେଉଛି ଇଣ୍ଡୋନେସିଆର ସର୍ବବୃହତ୍ତ ହିନ୍ଦୁ ମନ୍ଦିର ।

ମହାଶିବରାତ୍ରୀ ଅବସରରେ ପ୍ରାମ୍ବନାନ ମନ୍ଦିରରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହୋଇଥିଲା । ଏଥିପାଇଁ ଇଣ୍ଡୋନେସିଆର ୩୬ଟି ପ୍ରଦେଶ ଏବଂ ୯ଟି ମନ୍ଦିରରୁ ଜଳ ଅଣାଯାଇଥିଲା । ଯାହାକୁ ଇଣ୍ଡୋନେସିଆର ସର୍ବୋଚ୍ଚ ପୂଜାରୀ (Sulinggih) ମନ୍ତ୍ର ଉଚ୍ଚାରଣ କରି ପବିତ୍ର କରିଥିଲେ ।