୨୦୨୫ ପାଇଁ ନୋବେଲ ଶାନ୍ତି ପୁରସ୍କାର ଘୋଷଣା କରାଯାଇଛି । ନୋବେଲ ଶାନ୍ତି ପୁରସ୍କାର ଘୋଷଣା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଶକ୍ତ ଝଟକା ଲାଗିଛି । ଚଳିତ ଥର ଡୋନାଲ୍ଡ ଟ୍ରମ୍ପ ନୁହେଁ ବରଂ ଭେନେଜୁଏଲାର ମାରିଆ କୋରିନା ମଚାଡୋଙ୍କୁ ନୋବେଲ ଶାନ୍ତି ପୁରସ୍କାର ମିଳିଛି । ଭେନେଜୁଏଲାରେ ଗଣତନ୍ତ୍ର ପ୍ରତିଷ୍ଠାରେ ଗୁରୁତ୍ବପୂର୍ଣ୍ଣ ଭୂମିକା ପାଇଁ ତାଙ୍କୁ ନୋବେଲ ପୁରସ୍କାର ମିଳିଛି । ଏହି ପୁରସ୍କାର ପ୍ରତିବର୍ଷ ବିଶ୍ୱ ଶାନ୍ତି, ମାନବାଧିକାର ଏବଂ ସଂଘର୍ଷ ସମାଧାନରେ ଗୁରୁତ୍ୱପୂର୍ଣ୍ଣ ଅବଦାନ ଦେଇଥିବା ବ୍ୟକ୍ତି କିମ୍ବା ସଂଗଠନକୁ ପ୍ରଦାନ କରାଯାଏ ।

BREAKING NEWS
The Norwegian Nobel Committee has decided to award the 2025 #NobelPeacePrize to Maria Corina Machado for her tireless work promoting democratic rights for the people of Venezuela and for her struggle to achieve a just and peaceful transition from dictatorship to… pic.twitter.com/Zgth8KNJk9

— The Nobel Prize (@NobelPrize) October 10, 2025

ତେବେ ଚଳିତ ବର୍ଷ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନୋବେଲ ଶାନ୍ତି ପୁରସ୍କାର ଜିତିନାହାନ୍ତି । ବହୁ ଦିନ ଧରି କଳ୍ପନାଜଳ୍ପନା କରାଯାଉଥିଲା ଯେ ଟ୍ରମ୍ପଙ୍କୁ ବିଭିନ୍ନ ଆନ୍ତର୍ଜାତୀୟ ସଂଘର୍ଷରେ ମଧ୍ୟସ୍ଥତା ପାଇଁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରାଯାଇପାରେ । କିନ୍ତୁ ଶେଷରେ ଜୁରି ଏହି ବର୍ଷର ପୁରସ୍କାର ମଚାଡୋଙ୍କୁ ପ୍ରଦାନ କରିବାକୁ ନିଷ୍ପତ୍ତି ନେଇଥିଲେ ।

ତେବେ ପୂର୍ବରୁ ଟ୍ରମ୍ପ ନିଜେ ନୋବେଲ ଶାନ୍ତି ପୁରସ୍କାର ପାଇବାକୁ ଯୋଗ୍ୟ ବୋଲି ବାରମ୍ବାର ବିଭିନ୍ନ ମଞ୍ଚରେ କହୁଥିଲେ । ଏମିତି କି ସେ କହିଥିଲେ ପୂର୍ବତନ ଆମେରିକା ରାଷ୍ଟ୍ରପତି ବାରାକ୍ ଓବାମା କିଛି ନ କରି ନୋବେଲ ପାଇଛନ୍ତି ସେ ସାତଟି ଯୁଦ୍ଧ ସମାପ୍ତ କରିଛନ୍ତି । ତେଣୁ ତାଙ୍କୁ ନୋବେଲ ପୁରସ୍କାର ମିଳିବା ଉଚିତ୍ । ତେବେ ଗୋଟିଏ ନୁହେଁ ବରଂ ସେ ଏହା ମଧ୍ୟ କହିଥିଲେ କି ସାତଟି ଯୁଦ୍ଧ ସମାପ୍ତ କରିଥିବାରୁ ତାଙ୍କୁ ସାତଟି ନୋବେଲ ଶାନ୍ତି ପୁରସ୍କାର ମିଳିବା ଉଚିତ୍ ।

ଟ୍ରମ୍ପ ଅନେକ ଥର ଦାବି କରିଥିଲେ ଯେ, ସେ ଶାନ୍ତି ଚୁକ୍ତି ଏବଂ ଯୁଦ୍ଧ ବନ୍ଦ କରିଛନ୍ତି । ଆମେରିକା ରାଷ୍ଟ୍ରପତି ଦାବି କରିଛନ୍ତି, "ସେ ଭାରତ-ପାକିସ୍ତାନ, ଥାଇଲ୍ୟାଣ୍ଡ-କମ୍ବୋଡିଆ, ଆର୍ମେନିଆ-ଆଜରବାଇଜାନ, କୋସୋଭୋ-ସର୍ବିଆ, ଇସ୍ରାଏଲ-ଇରାନ, ମିଶର-ଇଥିଓପିଆ, ରୱାଣ୍ଡା-କଙ୍ଗୋ ଭଳି ଅନେକ ଯୁଦ୍ଧକୁ ରୋକିଛନ୍ତି । ସେଥିମଧ୍ୟରୁ ୬୦ ପ୍ରତିଶତ ଯୁଦ୍ଧ ବାଣିଜ୍ୟ ଯୋଗୁଁ ରୋକି ଦିଆଯାଇଛି ବୋଲି ସେ ବାରମ୍ବାର କହୁଥିଲେ । କିନ୍ତୁ ଏବେ ନୋବେଲ ଶାନ୍ତି ପୁରସ୍କାର ଘୋଷଣା ହେବା ପରେ ଟ୍ରମ୍ପଙ୍କ ନୋବେଲ ସ୍ବପ୍ନ, ସ୍ବପ୍ନରେ ରହିଯାଇଛି ।