Argus News - ଇରାନର ନତାଞ୍ଜ ପରମାଣୁ କେନ୍ଦ୍ର ଉପରେ ବଡ଼ ଆକ୍ରମଣ, ଆମେରିକା-ଇସ୍ରାଏଲର ବୋମା ବର୍ଷା

ଜଳୁଛି ମଧ୍ୟପ୍ରାଚ୍ୟ । ଇସ୍ରାଏଲର ଘନଘନ ମିସାଇଲ ମାଡ଼ରେ ଥରୁଛି ଇରାନ । ସେପଟେ ଇରାନ ମଧ୍ୟ ଇସ୍ରାଏଲ ଉପରେ ପ୍ରତିଆକ୍ରମଣ ଜାରି ରଖିଛି । ତେବେ ଏହାରି ମଧ୍ୟରେ ମଧ୍ୟପ୍ରାଚ୍ୟରେ ଉତ୍ତେଜନା ପୁଣି ଥରେ ଉଗ୍ର ରୂପ ନେଇଛି । ଇରାନର ସବୁଠାରୁ ସୁରକ୍ଷିତ ଏବଂ ସମ୍ବେଦନଶୀଳ ପ୍ରତିଷ୍ଠାନ ଭାବେ ବିବେଚିତ ନତାଞ୍ଜ ପରମାଣୁ କେନ୍ଦ୍ର ଉପରେ ବଡ଼ ଧରଣର ଆକ୍ରମଣ ହୋଇଛି । ରିପୋର୍ଟ ଅନୁଯାୟୀ ଆମେରିକା ଏବଂ ଇସ୍ରାଏଲ ମିଳିତ ଭାବରେ ଏହି ସ୍ଥାନରେ ବୋମା ପକାଇଛନ୍ତି । ଆଉ ଏହି ଆକ୍ରମଣ ପରେ ସମଗ୍ର ଅଞ୍ଚଳରେ ଭୟର ଲହରୀ ଖେଳିଯାଇଛି ।

ଇରାନୀ ଗଣମାଧ୍ୟମ ଅନୁଯାୟୀ, ଏହି ଆକ୍ରମଣର ତୀବ୍ରତା ଏତେ ଅଧିକ ଥିଲା ଯେ ଏହାର ପ୍ରତିଧ୍ୱନ ଦୂର ଦୂର ପର୍ଯ୍ୟନ୍ତ ଶୁଣାଯାଇଥିଲା । ତଥାପି, ପ୍ରାରମ୍ଭିକ ତଦନ୍ତ ପରେ ଇରାନୀ ଅଧିକାରୀମାନେ ଆଶ୍ୱସ୍ତିର ନିଶ୍ୱାସ ନେଇଛନ୍ତି, କାରଣ କୌଣସି ରେଡିଓଆକ୍ଟିଭ ସାମଗ୍ରୀ (ରେଡିଏସନ୍) ଲିକ୍ ହୋଇନାହିଁ ।

ଇରାନୀ ଗଣମାଧ୍ୟମ ଦାବି କରିଛି ଯେ ବିସ୍ଫୋରଣ ସତ୍ତ୍ୱେ ନିକଟବର୍ତ୍ତୀ ଆବାସିକ ଅଞ୍ଚଳର ବାସିନ୍ଦାମାନେ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି । ସରକାର ଏହି ସାମରିକ କାର୍ଯ୍ୟାନୁଷ୍ଠାନକୁ ଇରାନର ପରମାଣୁ କାର୍ଯ୍ୟକ୍ରମକୁ ବନ୍ଦ କରିବା ଲକ୍ଷ୍ୟରେ ଜାରି ଆମେରିକା-ଇସ୍ରାଏଲ ଅଭିଯାନର ଅଂଶ ଭାବରେ ବର୍ଣ୍ଣନା କରିଛି ।

ବାସ୍ତବରେ ନତାଞ୍ଜ ପରମାଣୁ କେନ୍ଦ୍ର ସର୍ବଦା ଶତ୍ରୁମାନଙ୍କ ଟାର୍ଗେଟ୍‌ରେ ରହିଥିଲା । ୨୦୨୫ ମସିହାରୁ ଏହି ସ୍ଥାନକୁ ଅନେକ ଥର ଟାର୍ଗେଟ କରାଯାଇଛି । ପ୍ରତ୍ୟେକ ଥର ଭିତ୍ତିଭୂମି ଏବଂ ଯନ୍ତ୍ରପାତି କ୍ଷତିଗ୍ରସ୍ତ ହୁଏ, କିନ୍ତୁ ସୌଭାଗ୍ୟବଶତଃ ଏପର୍ଯ୍ୟନ୍ତ କୌଣସି ଗୁରୁତ୍ୱପୂର୍ଣ୍ଣ କ୍ଷତି ହୋଇନାହିଁ ।

ସୂଚନା ଅନୁସାରେ, ଗତ ଜୁନ୍ ମାସରେ ଇସ୍ରାଏଲ ଏବଂ ଇରାନ ମଧ୍ୟରେ ହୋଇଥିବା ୧୨ ଦିନିଆ ଯୁଦ୍ଧରେ ନତାଞ୍ଜ ମଧ୍ୟ ଏକ ପ୍ରାଥମିକ ଟାର୍ଗେଟ ଥିଲା । ସେହି ସମୟରେ ଯୁକ୍ତରାଷ୍ଟ୍ର ମଧ୍ୟ ଏହି ସଂଘର୍ଷରେ ସିଧାସଳଖ ଜଡିତ ହୋଇଥିଲା । ଏହି ସ୍ଥାନରେ ବୋମା ବିସ୍ଫୋରଣ ପୁଣି ଥରେ ସୂଚାଇ ଦିଏ ଯେ ଆଗାମୀ ଦିନରେ ମଧ୍ୟପ୍ରାଚ୍ୟର ପରିସ୍ଥିତି ଆହୁରି ବିସ୍ଫୋରକ ହୋଇପାରେ ।