Nepal Teacher Saves Students / କିଛି ମିନିଟ୍‌ର ନିଷ୍ପତ୍ତି, ବଞ୍ଚିଗଲା ୧୬୪୩ ଛାତ୍ରଛାତ୍ରୀଙ୍କ ଜୀବନ ! ନେପାଳର ଏହି ଶିକ୍ଷକ ହେଲେ ହିରୋ

ନେପାଳର ପାହାଡ଼ରୁ ତଳକୁ ମାଡ଼ି ଆସୁଥିଲା ପ୍ରଳୟ । ଆଉ ଠିକ୍‌ ଏହି ସମୟରେ ନେପାଳର ନୁୱାକୋଟ ଜିଲ୍ଲାର ତ୍ରିଶୂଳୀ ଉପତ୍ୟକାର ଏକ ସ୍କୁଲରେ ପାଠ ପଢ଼ୁଥିଲେ ୧,୬୪୩ ଜଣ ଛାତ୍ରଛାତ୍ରୀ । ଆଖି ଆଗରେ ବଦଳିଯାଉଥିଲା ପରିସ୍ଥିତି, ହାତରେ ଥିଲା ମାତ୍ର କିଛି ମିନିଟ୍‌ର ସମୟ । ସେତେବେଳେ ପ୍ରଧାନଶିକ୍ଷକ ରାଜେନ୍ଦ୍ର ଦବାଡ଼ୀ ନେଲେ ଏମିତି ଏକ ନିଷ୍ପତ୍ତି, ଯାହା ଲେଖିଦେଲା ୧,୬୪୩ଟି ପରିବାରର ନୂଆ ଜୀବନର କାହାଣୀ ।

ଗତ ବୁଧବାର ସକାଳ ପ୍ରାୟ ୯ଟା ୨୦ ମିନିଟ୍‌ରେ ପ୍ରଧାନ ଶିକ୍ଷକ ରାଜେନ୍ଦ୍ର ଦବାଡ଼ୀଙ୍କ ପାଖକୁ ଜଣେ ବନ୍ଧୁ ଫୋନ୍ କରିଥିଲେ । ଆଉ କହିଥିଲେ, ଗାଁଟି ଭୟଙ୍କର ନଦୀରେ ଭାସି ଯାଉଛି । ତୁରନ୍ତ ସେଠାରେ ପଳେଇ ଯିବାକୁ ସେ ସତର୍କ କରାଇଥିଲେ । ପ୍ରଥମେ ରାଜେନ୍ଦ୍ର ଦବାଡ଼ୀଙ୍କୁ ଲାଗିଥିଲା ଯେ ତ୍ରିଭୁବନ ତ୍ରିଶୂଳୀ ସେକେଣ୍ଡାରୀ ସ୍କୁଲ ସୁରକ୍ଷିତ । କାହିଁକି ନା ତିନି ମହଲାର ଏହି କୋଠାଟି ନଦୀଠାରୁ ପ୍ରାୟ ୬୦ ମିଟର ଉଚ୍ଚରେ ଥିଲା । କିନ୍ତୁ କିଛି ମୁହୂର୍ତ୍ତ ମଧ୍ୟରେ ପରିସ୍ଥିତି ବଦଳିବାକୁ ଲାଗିଲା ।

ସେ ତୁରନ୍ତ ସ୍କୁଲର ଘଣ୍ଟି ବଜାଇଦେଲେ । ଶିକ୍ଷକମାନଙ୍କୁ ପ୍ରତ୍ୟେକ କ୍ଲାସରୁମ୍ ଖାଲି କରିବାକୁ କହିଲେ । ବସ୍‌ ଡ୍ରାଇଭରମାନଙ୍କୁ ଫୋନ୍ କରି ଗାଡ଼ି ଫେରାଇ ଆଣିବାକୁ ନିର୍ଦ୍ଦେଶ ଦେଲେ । ଯଦିଓ ଗୋଟିଏ ବସ୍ ସେତେବେଳେ ପୋଲ ଅତିକ୍ରମ କରୁଥିବାରୁ ତାହାକୁ ଅଟକାଇବା ସମ୍ଭବ ହୋଇନଥିଲା ।

ସ୍କୁଲରେ ହଠାତ୍ ଆତଙ୍କ ଖେଳିଯାଇଥିଲା । ପିଲାମାନେ ଭୟରେ ଏଣେତେଣେ ଦୌଡ଼ିବାକୁ ଲାଗିଲେ । ଏମିତିକି ଜଣେ ଛାତ୍ରୀ ଭୟରେ ଅଚେତ ହୋଇଯିବା ଭଳି ଅବସ୍ଥାକୁ ଚାଲିଯାଇଥିଲେ । ତାଙ୍କୁ ତୁରନ୍ତ ଏକ ବାଇକ୍‌ ସାହାଯ୍ୟରେ ପାହାଡ଼ ଉପରକୁ ସୁରକ୍ଷିତ ସ୍ଥାନକୁ ପଠାଯାଇଥିଲା । ଅନ୍ୟ ପିଲାମାନେ ପାହାଡ଼ ଆଡ଼କୁ ଦୌଡ଼ିବାକୁ ଲାଗିଲେ । ଆଉ ସମସ୍ତଙ୍କ ପଛରେ ରହିଗଲେ ପ୍ରଧାନଶିକ୍ଷକ ରାଜେନ୍ଦ୍ର ଦବାଡ଼ୀ । କାରଣ ଯେପରି କୌଣସି ଜଣେ ବି ଛାତ୍ରଛାତ୍ରୀ ପଛରେ ନ ରହି ଯାଆନ୍ତି ସେ ତାହାକୁ ସ୍ପଷ୍ଟ କରିବାକୁ ଚାହୁଁଥିଲେ ।

କିଛି ମିନିଟ୍‌ ମଧ୍ୟରେ ସମସ୍ତ ୧,୬୪୩ ଜଣ ପିଲା ପାହାଡ଼ର ଉଚ୍ଚ ସ୍ଥାନରେ ପହଞ୍ଚିଗଲେ । ଆଉ ଠିକ୍ ସେତିକିବେଳେ ଆସିଲା ସେହି ଭୟଙ୍କର ମୁହୂର୍ତ୍ତ । ପ୍ରଚଣ୍ଡ ବେଗରେ ଆସିଥିବା ବନ୍ୟା ସ୍କୁଲକୁ ପରିସରକୁ ନିଜ ଆୟତ୍ତରେ ନେଇଗଲା । ଆଖି ପିଛୁଳାକେ ସ୍କୁଲର ସେହି ୩ ମହଲାର କୋଠାଟି ମଧ୍ୟ ପ୍ରଳୟଙ୍କାରୀ ସୁଅ ମଧ୍ୟରେ ଭାସିଗଲା । ଯେଉଁଠାରେ କିଛି ସମୟ ପୂର୍ବରୁ ଶହ ଶହ ପିଲା ପାଠ ପଢ଼ୁଥିଲେ, ସେଠାରେ ଏବେ ଥିଲା କେବଳ କାଦୁଅ, ପଥର, ମାଟି ଓ ଭୟଙ୍କର ବନ୍ୟାର ଚିହ୍ନ ।

ଆଉ ପ୍ରଧାନ ଶିକ୍ଷକ ରାଜେନ୍ଦ୍ର ଦବାଡ଼ୀଙ୍କ ସେହି କିଛି ମିନିଟ୍‌ର ନିଷ୍ପତ୍ତି ୧,୬୪୩ ଜଣ ପିଲାଙ୍କୁ ମୃତ୍ୟୁମୁଖରୁ ଟାଣି ଆଣିଥିଲା । କିନ୍ତୁ ଭୟଙ୍କର ଘଟଣାରେ ସ୍କୁଲର ଦୁଇଜଣ କର୍ମଚାରୀଙ୍କ ଜୀବନ ରକ୍ଷା ହୋଇପାରିଲା ନାହିଁ । ୩୨ ବର୍ଷୀୟ ଇତିହାସ ଶିକ୍ଷକ ସନ୍ତୋଷ ପରିୟାର ସକାଳେ ଖାଇବା ରାନ୍ଧିବା ପାଇଁ ନଦୀ କୂଳରେ ଥିବା ତାଙ୍କ ଭଡ଼ା ଘରକୁ ଯାଇଥବା ସମୟରେ ବନ୍ୟା ଜଳ ତାଙ୍କୁ ଭସାଇ ନେଇଥିଲା । ସେହିପରି ସ୍କୁଲର ଚୌକିଦାର ସୁଲତାନ ଲାମା ମଧ୍ୟ ପ୍ରାଣ ହରାଇଥିଲେ ।