Nepal Flood Rescue Operation / ମୃତ୍ୟୁର ତାଣ୍ଡବ ପରେ ଜୀବନ ଖୋଜା, ନେପାଳରେ ନିଖୋଜଙ୍କ ପାଇଁ ଚାଲିଛି ବଡ଼ ଅପରେସନ

ନେପାଳ ପ୍ରଳୟ ପରେ ଚାଲିଛି ଜୀବନ ଖୋଜା । ବର୍ତ୍ତମାନ ସୁଦ୍ଧା ୬୮୨ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଥିବା ବେଳେ ହଜାର ହଜାର ଲୋକ ଏବେ ବି ନିଖୋଜ ଅଛନ୍ତି । ନିଖୋଜଙ୍କୁ ଖୋଜିବାକୁ ନେପାଳରେ ଚାଲିଛି ବଡ଼ ଧରଣର ରେସ୍କ୍ୟୁ ଅପରେସନ । ବିଶେଷକରି ରସୁଆ ଜିଲ୍ଲାର ଜଳବିଦ୍ୟୁତ୍ ପ୍ରକଳ୍ପଗୁଡ଼ିକରେ ଫସିରହିଥିବା ୫ ଶହରୁ ଅଧିକ ଲୋକଙ୍କୁ ଉଦ୍ଧାର କରିବା ପାଇଁ ଉଦ୍ଧାରକାରୀ ଦଳଗୁଡ଼ିକ ଖରାପ ପାଗ ଓ ଦୁର୍ଗମ ରାସ୍ତାର ସମ୍ମୁଖୀନ ହୋଇ ସଂଘର୍ଷ ଜାରି ରଖିଛନ୍ତି ।

ନେପାଳ ସେନା ଏବଂ ନେପାଳ ସଶସ୍ତ୍ର ପୋଲିସ ବାହିନୀ ମିଳିତ ଭାବେ ଏହି ଜଳବିଦ୍ୟୁତ୍ ପ୍ରକଳ୍ପଗୁଡ଼ିକରେ ଉଦ୍ଧାର କାର୍ଯ୍ୟ ଚଳାଇଛନ୍ତି । ପ୍ରଭାବିତ ଅଞ୍ଚଳରେ ସେନା ପ୍ରାୟ ୭ ହଜାର ଯବାନଙ୍କୁ ନିୟୋଜିତ କରାଯାଇଛି । ଏହାସହ NAPFର ୪ ହଜାର କର୍ମଚାରୀ ନିୟୋଜିତ ଅଛନ୍ତି । ଅପର ତ୍ରିଶୂଳୀ, ଅପର ତ୍ରିଶୂଳୀ-୧, ରସୁଆ ଜଳବିଦ୍ୟୁତ୍, ତ୍ରିଶୂଳୀ ୩ଏ, ଚିଲିମେ ଖୋଲା ଏବଂ ଲାଙ୍ଗଟାଙ୍ଗ ଜଳବିଦ୍ୟୁତ୍ ପ୍ରକଳ୍ପରେ ବିଶେଷ କ୍ଷୟକ୍ଷତି ହୋଇଛି । ଭିତରେ କେତେ ଜଣ ଲୋକ ଫସି ରହିଛନ୍ତି ତାହା ଏଯାଏଁ ସ୍ପଷ୍ଟ ହୋଇନାହିଁ । କିନ୍ତୁ ଅତିକମରେ ୫୦୦ ଜଣ ଫସି ରହିଥିବା ଅନୁମାନ କରାଯାଉଛି । ପାଗର ପ୍ରତିକୂଳ ଯୋଗୁ ଉଦ୍ଧାର କାର୍ଯ୍ୟ ବାରମ୍ବାର ବାଧାପ୍ରାପ୍ତ ହେଉଛି । ତେବେ ନେପାଳ ଭୟଙ୍କର ବନ୍ୟାରେ ଏବେ ବି ୨୭୫ ଜଣ ଭାରତୀୟ ନିଖୋଜ ଅଛନ୍ତି ।

ସେପଟେ ବିପର୍ଯ୍ୟୟ ବେଳେ ନେପାଳକୁ ଭାରତର ହୃଦୟ ଖୋଲା ସହାୟତା । ଚତୁର୍ଥ ରିଲିଫ୍ ବିମାନରେ ୧୧ ଟନ୍ ସହାୟତା ସହିତ ନେପାଳ ପଠାଇଛି ଭାରତ । ଭୀଷଣ ବନ୍ୟା ପରେ ଜାରି ରହିଥିବା ଉଦ୍ଧାର କାର୍ଯ୍ୟ ମଧ୍ୟରେ ଭାରତ ନେପାଳକୁ ସ୍ୱତନ୍ତ୍ର ଉଦ୍ଧାର ଏବଂ ଫୋରେନ୍ସିକ୍ ଦଳ ସହିତ ୧୧ ଟନ୍ ରିଲିଫ୍ ସାମଗ୍ରୀ ବହନ କରି ଚତୁର୍ଥ ରିଲିଫ୍ ବିମାନ ପଠାଇଛି । ଏହାସହ ବିଶେଷଜ୍ଞ କର୍ମଚାରୀ ଏବଂ ଉଦ୍ଧାର ତଥା ପରିଚୟ ସନ୍ଧାନ ପାଇଁ ଆବଶ୍ୟକୀୟ ଉପକରଣ ନେଇ ନେପାଳରେ ପହଞ୍ଚିଛି ଭାରତର ଚତୁର୍ଥ ରିଲିଫ୍ ବିମାନ । ଏହି ବିମାନରେ ୧୧ ଟନ୍ ରିଲିଫ୍ ସହାୟତା, ସନ୍ଧାନ ଓ ଉଦ୍ଧାର କାର୍ଯ୍ୟ ପାଇଁ ଉପକରଣ ସହିତ ଏକ ଟନେଲ୍ ବୈଷୟିକ ଦଳ ପହଞ୍ଚିଛନ୍ତି । ଏହାଛଡ଼ା ଡିଏନଏ ବିଶ୍ଳେଷଣ ପାଇଁ ଫୋରେନ୍ସିକ୍ ବିଶେଷଜ୍ଞଙ୍କ ଏକ ଦଳ ଏବଂ କମ୍ବଳ, ସ୍ଲିପିଂ ବ୍ୟାଗ୍, ତାରପୋଲିନ୍, ପ୍ଲାଷ୍ଟିକ୍ ସିଟ୍ ଓ ହାଇଜିନ୍ କିଟ୍ ଭଳି ରିଲିଫ୍ ସାମଗ୍ରୀ ପଠାଯାଇଛି ।