କାଠମାଣ୍ଡୁ: ନେପାଳର ପୂର୍ବତନ ମୁଖ୍ୟ ବିଚାରପତି ସୁଶୀଳା କାର୍କୀ ହୋଇଛନ୍ତି ଦେଶର ଅନ୍ତରୀଣ ପ୍ରଧାନମନ୍ତ୍ରୀ । ଶପଥ ଗ୍ରହଣ ପରେ ଦାୟିତ୍ଵ ନେବା ସହ ବସିଛି ପ୍ରଥମ କ୍ୟାବିନେଟ୍ ବୈଠକ । ନେପାଳର ସଂସଦକୁ ଭାଙ୍ଗି ଦିଆଯିବା ସହ ୨୦୨୬ ମାର୍ଚ୍ଚ ୫ ତାରିଖରେ ସାଧାରଣ ନିର୍ବାଚନ କରାଇବାକୁ ସହମତି ହୋଇଛି ।

ସୁଶୀଳା କାର୍କୀ ଅନ୍ତରୀଣ ପ୍ରଧାନମନ୍ତ୍ରୀ ହେବା ପରେ ZenZ ନେତା ଖୁସିରେ ଉତ୍ସବ ମନାଇଛନ୍ତି । ଶୁକ୍ରବାର ରାତିରେ ସୁଶୀଳା କାର୍କୀ ନେପାଳର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଶପଥ ନେଇଛନ୍ତି । ସେ ମଧ୍ୟବର୍ତ୍ତୀକାଳୀନ ସରକାରର ନେତୃତ୍ଵ ନେବେ । ଏଥିସହ ନେପାଳରେ ଲାଗି ରହିଥିବା ରାଜନୈତିକ ଅସ୍ଥିରତାର ଅନ୍ତ ହୋଇଛି ।

ଏଥିସହ ପଢ଼ନ୍ତୁ: ନେପାଳର ଅନ୍ତରୀଣ ପ୍ରଧାନମନ୍ତ୍ରୀ ହେବେ ସୁଶୀଳା କାର୍କୀ, ସାରା ରାତି ବୈଠକ ପରେ ହେଲା ସହମତି

ଦୁର୍ନୀତି ଓ ସୋସିଆଲ୍ ମିଡିଆ ଉପରେ ପ୍ରତିବନ୍ଧକକୁ ନେଇ ଯୁବପିଢ଼ି ସରକାର ବିରୋଧରେ ହିଂସାତ୍ମକ ପ୍ରଦର୍ଶନ କରିଥିଲେ । ଆଉ ZenZଙ୍କ ବିକ୍ଷୋଭର ଚାପ ଏତେ ପରିମାଣରେ ପଡ଼ିଥିଲା ଯେ, ପ୍ରଧାନମନ୍ତ୍ରୀ ପଦରୁ ଅଚାନକ ଇସ୍ତଫା ଦେଇଥିଲେ କେପି ଶର୍ମା ଓଲି ।

୭୩ ବର୍ଷୀୟା ସୁଶୀଳା କୁର୍କୀଙ୍କୁ ରାଷ୍ଟ୍ରପତି ରାମଚନ୍ଦ୍ର ପୋଡେଲ ଶପଥ ପାଠ କରାଇଛନ୍ତି । ରାଷ୍ଟ୍ରପତି କହିଛନ୍ତି, ମଧ୍ୟବର୍ତ୍ତୀକାଳୀନ ସରକାର ୬ ମାସ ମଧ୍ୟରେ ନୂଆ ସଂସଦୀୟ ନିର୍ବାଚନ କରିବାକୁ ଦାୟିତ୍ଵ ଦିଆ ଯାଇଛି । ନୂତନ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ସମାରୋହରେ ନେପାଳର ପ୍ରଧାନ ବିଚାରପତି, ବରିଷ୍ଠ ଅଧିକାରୀ, ସେନା ମୁଖ୍ୟ ଓ ବିଭିନ୍ନ ଦଳର ନେତା ସାମିଲ୍ ହୋଇଥିଲେ ।

୮ ତାରିଖରୁ ନେପାଳରେ ରାଜନୈତିକ ଅସ୍ଥିରତା ଲାଗି ରହିଥିଲା । ନେପାଳର ଅନ୍ତରୀଣ ସରକାରରେ ପ୍ରଧାନମନ୍ତ୍ରୀ ହେବା ପାଇଁ ଇଞ୍ଜିନିୟର କୁଲମାନ୍ ଘିସିଙ୍ଗ, ସୁଶୀଳା କାର୍କୀ ଓ ବାଲେନ ଶାହଙ୍କ ନାଁ ଚର୍ଚ୍ଚାକୁ ଆସିଥିଲା । ଏବେ ସୁଦ୍ଧା ନେପାଳ ହିଂସାରେ ୫୧ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ଭାରତୀୟ ଅଛନ୍ତି । ଏବେ ପୁରା ଦେଶ ସେନା ନିୟନ୍ତ୍ରଣରେ ରହିଛି ।