Pakistan Bomb Blast / ପାକିସ୍ତାନରେ ବଡ଼ ଧରଣର ବିସ୍ଫୋରଣ, ଚାଲିଗଲା ୧୧ ଜୀବନ...ମୃତକଙ୍କ ମଧ୍ୟରେ ଅଛନ୍ତି ଶିଶୁ ଓ ମହିଳା

ପାକିସ୍ତାନରେ ପୁଣି ଥରେ ବଡ଼ ଧରଣର ବିସ୍ଫୋରଣ । ଖାଇବର ପଖତୁନଖ୍ୱାର ଏକ ପୋଲିସ ଚେକ୍‌ ପୋଷ୍ଟରେ ଭୟଙ୍କର ବିସ୍ଫୋରଣରେ ୧୧ ଜଣଙ୍କ ଜୀବନ ଯାଇଛି, ଯେଉଁଥିରେ ଜଣେ ଶିଶୁ ଓ ଦୁଇ ଜଣ ମହିଳା ମଧ୍ୟ ଅଛନ୍ତି । ଏହା ସହ ଏହି ବିସ୍ଫୋରଣରେ ୨୦ ଜଣ ଗୁରୁତର ଆହତ ହୋଇଛନ୍ତି । ତେବେ ଏହି ଆକ୍ରମଣର ଦାୟୀ ତେହରିକ-ଇ-ତାଲିବାନ ପାକିସ୍ତାନ (TTP) ନେଇଛି ।

ପୋଲିସ ଚେକ୍‌ ପୋଷ୍ଟରେ ବିସ୍ଫୋରଣ

ପାକିସ୍ତାନୀ ଖବରକାଗଜ ଡନ୍‌ର ରିପୋର୍ଟ ଅନୁସାରେ, ଖାଇବର ପଖତୁନଖ୍ୱା ଓ ବାଲୁଚିସ୍ତାନ ସୀମା ନିକଟ ଡେରା ଇସ୍ମାଇଲ ଖାନର ଦରାଜିନ୍ଦା ଅଞ୍ଚଳର ‘ଅମନ ମେଳା’ ପୋଲିସ ଚେକପୋଷ୍ଟରେ ଏହି ବିସ୍ଫୋରଣ ଘଟିଛି । ଏହି ଚେକ୍‌ପୋଷ୍ଟକୁ ପୋଲିସ ଡିଆଇ ଖାନ-କ୍ୱେଟା ରୁଟ୍‌ରେ ସୁରକ୍ଷା ଓ ଯାଞ୍ଚ ପାଇଁ ବ୍ୟବହାର କରୁଥିଲା । ବିସ୍ଫୋରଣରେ ପୋଲିସ କର୍ମଚାରୀଙ୍କ ସହ କଷ୍ଟମ୍ସ ଅଧିକାରୀ ଏବଂ ଦୁଇ ଜଣ ସାଧାରଣ ନାଗରିକ ମଧ୍ୟ ଆହତ ହୋଇଛନ୍ତି ।

ମାଟି ତଳୁ ଉଦ୍ଧାର ହେଲେ ଲୋକେ

ବିସ୍ଫୋରଣ ପରେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ରେସ୍କ୍ୟୁ ଟିମ୍‌ ଘଟଣାସ୍ଥଳରେ ପହଞ୍ଚି ଧ୍ୱଂସାବଶେଷ ତଳେ ଫସିଥିବା ଲୋକଙ୍କୁ ଉଦ୍ଧାର କରିଥିଲେ । ତେବେ ବିସ୍ଫୋରଣର ପ୍ରକୃତ କାରଣ ଜାଣିବା ପାଇଁ ବୋମା ନିରୋଧକ ଦଳକୁ ଘଟଣାସ୍ଥଳକୁ ପଠାଯାଇଛି ।

ଖାଇବର ପଖତୁନଖ୍ୱା ରାଜ୍ୟପାଳ ଫୈସଲ କରିମ୍ କୁଣ୍ଡି ଏହି ଆକ୍ରମଣର କଡ଼ା ତଦନ୍ତ କରିଛନ୍ତି ଏବଂ ବରିଷ୍ଠ ଅଧିକାରୀଙ୍କଠାରୁ ଏକ ବିସ୍ତୃତ ରିପୋର୍ଟ ମାଗିଛନ୍ତି । ଆହତମାନଙ୍କୁ ସମସ୍ତ ସମ୍ଭାବ୍ୟ ଚିକିତ୍ସା ସହାୟତା ଯୋଗାଇ ଦେବାକୁ ସେ ନିର୍ଦ୍ଦେଶ ଦେଇଛନ୍ତି । ପାକିସ୍ତାନର ଖାଇବର ପଖତୁନଖ୍ୱା ପ୍ରଦେଶରେ ଗତ କିଛି ମାସ ମଧ୍ୟରେ ଏପରି ଅନେକ ଆକ୍ରମଣ ହୋଇଛି, ଯେଉଁଥିରେ ସୁରକ୍ଷା ବାହିନୀ ଏବଂ ପୋଲିସକୁ ବାରମ୍ବାର ଟାର୍ଗେଟ କରାଯାଇଛି । ପାକିସ୍ତାନ ଇନଷ୍ଟିଚ୍ୟୁଟ୍ ଫର୍ କନଫ୍ଲିକ୍ଟ ଆଣ୍ଡ୍ ସିକ୍ୟୁରିଟି ଷ୍ଟଡିଜ୍ (PICSS)ର ତଥ୍ୟ ଅନୁଯାୟୀ, କେବଳ ଅଗଷ୍ଟ ମାସରେ ୫୪ଟି ଏପରି ଘଟଣା ରେକର୍ଡ କରାଯାଇଛି । ପ୍ରଶାସନ ଏହି ଅଞ୍ଚଳରେ ଆତଙ୍କବାଦ ବିରୋଧୀ ଅଭିଯାନକୁ ତୀବ୍ର କରିଛି ।

ଡନ୍‌ର ରିପୋର୍ଟରେ ଦାବି କରାଯାଇଛି ଯେ ଏହି ମାସରେ ପୋଲିସ ଡେରା ଇସମାଇଲ୍ ଖାନର ଦାରାବା ଅଞ୍ଚଳରେ ଏକ ଟିଟିପି ଆକ୍ରମଣକୁ ପଣ୍ଡ କରିଥିଲା, ଯାହା ଫଳରେ କୌଣସି କ୍ଷତି ହୋଇନାହିଁ । ତଥାପି, ସେପ୍ଟେମ୍ବର ୧୮ ତାରିଖରେ, କୋହାଟରେ ପୁରୁଣା ପୋଲିସ ଲାଇନରେ ଏକ ବଡ଼ ଆକ୍ରମଣରେ ୨୩ ଜଣଙ୍କର ମୃତ୍ୟୁ ହୋଇଥିଲା ଏବଂ ପ୍ରାୟ ୧୦୦ ଜଣ ଗୁରୁତର ଆହତ ହୋଇଥିଲେ । ଏହି ଆକ୍ରମଣର ଜବାବରେ, ପାକିସ୍ତାନ ଆଫଗାନିସ୍ତାନ ସୀମାବର୍ତ୍ତୀ ଅଞ୍ଚଳରେ ଏୟାର ଷ୍ଟ୍ରାଇକ୍‌ କରିଥିଲା ।