Hunza Community / ପାଖ ମାଡୁନି ରୋଗ, ଏଠି ମଣିଷ ବଞ୍ଚୁଛନ୍ତି 150 ବର୍ଷ

ଆଗ ଅପେକ୍ଷା ଆଜିକାଲି ଦିନକୁ ଦିନ କମୁଛି ମନୁଷ୍ୟଙ୍କ ଜୀବନ ହାର । କାରଣ ବଦଳୁଥିବା ଲାଇଫ୍ ଷ୍ଟାଇଲ୍ ଯୋଗୁଁ ଆଜିକାଲି 60 ରୁ 70 ବର୍ଷ ବଞ୍ଚିବା ବି ଢେର୍ । କାରଣ ଜନ୍ମ ହେଉ ହେଉ ଅନେକ ରୋଗ ମାଡିବସୁଛି । କିନ୍ତୁ ଏମିତି ଏକ କମ୍ୟୁନିଟି ରହିଛି ଯେଉଁଥିରେ ବିଶେଷ କରି ମହିଳାମାନେ 150 ବର୍ଷ ବଞ୍ଚୁଛନ୍ତି । ତା' ପୁଣି ପୁରା ସୁସ୍ଥ ସବଳ । ହାତ , ଗୋଡ ଠିକ୍ ଅଛି । ନିଜ କାମ ନିଜେ କରିପାରୁଛନ୍ତି । ଖାଲି ଏତିକି ନୁହେଁ ଚମ ଧୁଡୁ ଧୁଡୁ ହୋଇନି...ବରଂ ଦେଖିବାକୁ ବହୁତ ସୁନ୍ଦର ।



ଉତ୍ତର ପାକିସ୍ତାନର ନଗର ଭ୍ୟାଲିରେ ବସବାସ କରୁଥିବା ହୁଞ୍ଜା ସମ୍ପ୍ରଦାୟ । 60 ରୁ 70 ବର୍ଷ ବୟସରେ ମଧ୍ୟ ସେମାନେ ଦେଖିବାକୁ ବହୁତ ସୁନ୍ଦର । ଖାଲି ସୁନ୍ଦର ତାହା ନୁହେଁ ଏ ବୟସରେ ମହିଳାମାନେ ଏତେ ସୁସ୍ଥ ଯେ ସେମାନେ ସନ୍ତାନ ଜନ୍ମ ଦେଇପାରିବେ ।

ହୁଞ୍ଜା ସମ୍ପ୍ରଦାୟ ବିଶେଷ କରି ଚାଷବାସ କରି ଜୀବନଯାପନ କରନ୍ତି । ପରିଶ୍ରମୀ ଓ ସ୍ୱାବଲମ୍ୱୀ । ଏହି ସମ୍ପ୍ରଦାୟରେ ମହିଳାମାନେ ୧୫୦ରୁ ଅଧିକ ବର୍ଷ ବଞ୍ଚୁଥିବାର ଦେଖିବାକୁ ମିଳେ । ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ୧୯୮୪ ମସିହାରେ ଅବଦୁଲ ମୋବାତ ନାମକ ଜଣେ ବ୍ୟକ୍ତି ଲଣ୍ଡନର ହିଥ୍ରୋ ବିମାନବନ୍ଦର ଆସିଥିଲେ । ସେଠାରେ ତାଙ୍କ ପାସପୋର୍ଟରେ ଜନ୍ମ ବର୍ଷ ଲେଖାଯାଇଥିଲା ୧୮୩୨ ମସିହା । ସେତେବେଳେ ତାଙ୍କୁ ହୋଇଥିଲା ୧୫୨ ବର୍ଷ । ଯାଞ୍ଚ କରୁଥିବା ଅଧିକାରୀ ଜଣଙ୍କ ପ୍ରଥମେ ଆଶ୍ଚର୍ଯ୍ୟ ହୋଇପଡିଥିଲେ । ଭାବିଲେ ବୋଧ ହୁଏ କିଛି ତ୍ରୁଟି ହୋଇଛି । କିନ୍ତୁ ସମ୍ପୂର୍ଣ୍ଣ ତଦନ୍ତ ପରେ, ସେମାନେ ଆଶ୍ଚର୍ଯ୍ୟଜନକ ଭାବରେ ଜାଣିପାରିଲେ ଯେ ସେମାନଙ୍କ ସମ୍ମୁଖରେ ଠିଆ ହୋଇଥିବା ଅବଦୁଲ ମୋବାତ ପ୍ରକୃତରେ 152 ବର୍ଷ ବୟସ୍କ । ମୋବାତ ପାକିସ୍ତାନର ହୁଞ୍ଜା ସମ୍ପ୍ରଦାୟର ବୋଲି ଜଣାପଡିଥିଲା ।

ଦୀର୍ଘାୟୁର ରହସ୍ୟ କ’ଣ?

ହୁଞ୍ଜା ଲୋକଙ୍କ ଦୀର୍ଘାୟୁ ଏବଂ ସୁସ୍ଥ ଜୀବନ ପଛରେ କୌଣସି ଚମତ୍କାର କିମ୍ବା ଯାଦୁଗରୀ ଭଳି କଥା ନାହିଁ । ବୈଜ୍ଞାନିକମାନଙ୍କ କହିବା କଥା ଏହି ସମ୍ପ୍ରଦାୟର ଖାଦ୍ୟ ପେୟ ଏବଂ ସୁସ୍ଥ ଜୀବନଶୈଳୀ ହିଁ ତାଙ୍କ ଦୀର୍ଘାୟୁର ବଡ କାରଣ । ଯେହେତୁ ସେମାନେ ବସବାସ କରୁଥିବା ଅଞ୍ଚଳରେ ଅଖରୋଟ ଓ ଆପ୍ରିକଟ ବହୁତ ପରିମାଣରେ ମିଳେ ସେଥିପାଇଁ ସେମାନେ ଏହି ସବୁ ଜିନିଷ ବହୁତ ପରିମାଣରେ ଖାଇଥାନ୍ତି । ଯାହା କ୍ୟାନସର ଭଳି ବଡ ରୋଗର ବିପଦକୁ ହ୍ରାସ କରିଥାଏ । ସେମାନଙ୍କର ସମଗ୍ର ଜନସଂଖ୍ୟା ସମ୍ପୂର୍ଣ୍ଣ କର୍କଟ ମୁକ୍ତ । ଯାହା ସେମାନଙ୍କୁ ପୃଥିବୀର ସବୁଠାରୁ ଦୀର୍ଘଜୀବୀ, ସୁସ୍ଥ ଏବଂ ଖୁସି ସମ୍ପ୍ରଦାୟ ହେବାରେ ସାହାଯ୍ୟ କରିଛି ।

ହୁଞ୍ଜା ମହିଳାମାନେ ବୃଦ୍ଧାବସ୍ଥାରେ ମଧ୍ୟ କିପରି ଯୁବା ଦେଖାଯାଆନ୍ତି?

ହୁଞ୍ଜା ଲୋକମାନେ, ବିଶେଷକରି ମହିଳାମାନେ ସେମାନଙ୍କର ବୃଦ୍ଧ ବୟସରେ ମଧ୍ୟ ଯୁବା ଦେଖାଯାଆନ୍ତି । ବିଶେଷଜ୍ଞଙ୍କ ମତରେ, ହୁଞ୍ଜାର ସୁସ୍ଥ ଜୀବନଶୈଳୀ ସେମାନଙ୍କୁ 60 ବର୍ଷ କିମ୍ବା ତା’ଠାରୁ ଅଧିକ ବୟସ ପର୍ଯ୍ୟନ୍ତ ଯୁବା ରହିବାରେ ସାହାଯ୍ୟ କରେ । ଆଶ୍ଚର୍ଯ୍ୟଜନକ ଭାବରେ, ହୁଞ୍ଜାମାନେ ବର୍ଷକୁ 2 ରୁ 3 ମାସ ପର୍ଯ୍ୟନ୍ତ କଠିନ ଖାଦ୍ୟ ବା solid food ଖାଆନ୍ତି ନାହିଁ ଏବଂ ସେହି ସମୟ ମଧ୍ୟରେ କେବଳ ଫଳ ରସ ସେବନ କରନ୍ତି । ଏହା ସହିତ, ହୁଞ୍ଜାମାନେ ପ୍ରାୟତଃ ଦୂର ଦୂର ରାସ୍ତା ଚାଲି ଚାଲି ଯିବାକୁ ପସନ୍ଦ କରନ୍ତି । ପ୍ରତ୍ୟେକ ଦିନ ଚାଲିବା ତାଙ୍କର ଗୋଟେ ଅଭ୍ୟାସ । ଖାଇବାରେ ବିଶେଷ କରି ଡ୍ରାଏ ଫ୍ରୁଟ୍ସ , କ୍ଷୀର, ଅଣ୍ଡା, କଞ୍ଚା ପନିପରିବା ଥାଏ । ଏହା ମଧ୍ୟ ଦାବି କରାଯାଇଛି ଯେ ମହିଳାମାନେ 65 ବର୍ଷ ବୟସରେ ମଧ୍ୟ ସନ୍ତାନ ଜନ୍ମ କରିପାରିବେ ।