Argus News - ଟ୍ରମ୍ପଙ୍କ ଟିମ୍‌ ଲେଖିଥିଲା କି ପାକିସ୍ତାନ PMଙ୍କ ଏକ୍ସ ପୋଷ୍ଟ ? Copy-Paste କରି ଟ୍ରୋଲ୍ ହେଲେ ସରିଫ୍‌

ପୁଣି ଥରେ ନିଜର ଭୁଲ ପାଇଁ ଅନ୍ତର୍ଜାତୀୟ ସ୍ତରରେ ବେଜ୍ଜିତ ହୋଇଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ । ତେବେ ଏଥର କୌଣସି ଭାଷଣ ପାଇଁ ନୁହେଁ ବରଂ ସୋସିଆଲ ମିଡିଆ ପ୍ଲାଟଫର୍ମ 'X'ର ଏକ ପୋଷ୍ଟକୁ ନେଇ । ଇରାନ-ଆମେରିକା ଉତ୍ତେଜନା ମଧ୍ୟରେ ଶାନ୍ତି ପାଇଁ ଆହ୍ବାନ ଦେଇଥିବା ଶେହବାଜ ସରିଫ ସୋସିଆଲ ମିଡିଆରେ ଭୁଲବଶତଃ ଏକ "ଡ୍ରାଫ୍ଟ" ବାର୍ତ୍ତା ପୋଷ୍ଟ କରିଥିଲେ । ଯାହା ପରେ ପ୍ରଶ୍ନ ଉଠୁଛି କି ପାକିସ୍ତାନର କୂଟନୀତିକୁ ଆମେରିକା କିମ୍ବା ଇସ୍ରାଏଲ ନିୟନ୍ତ୍ରଣ କରୁଛନ୍ତି କି ?

ସମ୍ପୂର୍ଣ୍ଣ ବିବାଦ କ'ଣ ?

ମଙ୍ଗଳବାର ଦିନ ଶେହବାଜ ସରିଫଙ୍କ ସରକାରୀ 'X' ହ୍ୟାଣ୍ଡେଲରୁ ଏକ ପୋଷ୍ଟ ସେୟାର କରାଯାଇଥିଲା । ପୋଷ୍ଟରେ ବଡ଼ ଅକ୍ଷରରେ ଲେଖାଯାଇଥିଲା "Draft – Pakistan’s PM Message on X’ । ଯଦିଓ ଗୋଟିଏ ମିନିଟ୍ ମଧ୍ୟରେ ଏହି ପୋଷ୍ଟକୁ ଏଡିଟ୍‌ କରାଯାଇ ଡ୍ରାଫ୍ଟ ଅଂଶକୁ ହଟାଇ ଦିଆଯାଇଥିଲା କିନ୍ତୁ ସେତେବେଳକୁ ଏହି ପୋଷ୍ଟର ସ୍କ୍ରିନ୍‌ସିଟ୍‌ ସୋସିଆଲ ମିଡିଆରେ ଭାଇରାଲ ହୋଇସାରିଥିଲା ।



ଏହି ଭୁଲ ଏକ ଗମ୍ଭୀର ବିତର୍କ ସୃଷ୍ଟି କରିଛି । ଜଣେ ଅନ୍ତର୍ଜାତୀୟ ସାମ୍ବାଦିକ ରିଆନ୍‌ ଗ୍ରିମ୍‌ ଏହି ପୋଷ୍ଟକୁ ନେଇ ଏକ ଗମ୍ଭୀର ପ୍ରଶ୍ନ ଉଠାଇଛନ୍ତି । ସେ କହିଛନ୍ତି, ଏହି ପୋଷ୍ଟଟି ଶେହବାଜ ସରିଫ କିମ୍ବା ତାଙ୍କ ପାକିସ୍ତାନୀ କର୍ମଚାରୀଙ୍କ ଦ୍ୱାରା ଲେଖାଯାଇଥିବାର ସମ୍ଭାବନା କମ୍ । ସେ ଯୁକ୍ତି ଦେଇଥିଲେ ଯେ କୌଣସି ପାକିସ୍ତାନୀ ଅଧିକାରୀ ନିଜ ପ୍ରଧାନମନ୍ତ୍ରୀଙ୍କୁ "ପାକିସ୍ତାନର ପ୍ରଧାନମନ୍ତ୍ରୀ" ବୋଲି ସମ୍ବୋଧନ କରିବେ ନାହିଁ । ଶବ୍ଦ ଏବଂ ସ୍ୱରର ଚୟନକୁ ଆଧାର କରି ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଡ୍ରାଫ୍ଟଟି ଆମେରିକା କିମ୍ବା ଇସ୍ରାଏଲରେ ପ୍ରସ୍ତୁତ କରାଯାଇଥିଲା ଏବଂ ଶେହବାଜ ସରିଫଙ୍କୁ କେବଳ ଏହାକୁ କପି ଏବଂ ପେଷ୍ଟ କରିବାକୁ ନିର୍ଦ୍ଦେଶ ଦିଆଯାଇଥିଲା ।

Oh, this is unbelievable. The edit history on this tweet shows that Pakistan Prime Minister Shehbaz Sharif originally copied and pasted everything he was sent, including:

"*Draft - Pakistan's PM Message on X*"

Now, obviously, Sharif's own staff don't call him "Pakistan's PM,"… https://t.co/q0ls8pK0qd pic.twitter.com/lm2vSEElkb

— Ryan Grim (@ryangrim) April 7, 2026

ଏହି "କପି ଏବଂ ପେଷ୍ଟ" ତ୍ରୁଟି ପରେ ଇଣ୍ଟରନେଟ୍ ୟୁଜର୍ସମାନେ ସରିଫଙ୍କୁ ସମାଲୋଚନା କରିଥିଲେ । ଜଣେ ୟୁଜର୍ସ ଲେଖିଛନ୍ତି, "ଯଦି ପ୍ରଧାନମନ୍ତ୍ରୀ ଠିକ୍ ଭାବରେ ଟ୍ୱିଟ୍ ପୋଷ୍ଟ କରିପାରିବେ ନାହିଁ, ତେବେ ସେ ଦେଶ କିପରି ଚଲାଇବେ ?" ଅନ୍ୟ ଜଣେ ୟୁଜର୍ସ ବ୍ୟଙ୍ଗାତ୍ମକ ଭାବରେ କହିଛନ୍ତି, "ଦେଖନ୍ତୁ ଶେହବାଜ ସରିଫ କେତେ ଖୁସି ଯେ ସେ ଟ୍ରମ୍ପ ତାଙ୍କୁ ଯାହା କରିବାକୁ କହିଥିଲେ ତାହା ପୋଷ୍ଟ କରିଛନ୍ତି ।" ଅନେକ ଏହାକୁ "ଅକ୍ଷମ କୂଟନୀତି" ଏବଂ "ଜାତୀୟ ଲଜ୍ଜା" ବୋଲି କହିଛନ୍ତି ।

ଏହି ବିବାଦୀୟ ଟ୍ୱିଟରେ ଶେହବାଜ ସରିଫ ରାଷ୍ଟ୍ରପତି ଟ୍ରମ୍ପଙ୍କୁ ଇରାନ ବିରୁଦ୍ଧରେ ତାଙ୍କର ସମୟସୀମାକୁ ଦୁଇ ସପ୍ତାହ ବୃଦ୍ଧି କରିବାକୁ ଅନୁରୋଧ କରିଥିଲେ ଯାହା ଦ୍ୱାରା କୂଟନୀତି ଆଗକୁ ବଢ଼ିପାରିବ । ସେ ତାଙ୍କର "ଇରାନୀ ଭାଇମାନଙ୍କୁ" ହର୍ମୁଜ ପ୍ରଣାଳୀ ଖୋଲିବା ପାଇଁ ମଧ୍ୟ ନିବେଦନ କରିଥିଲେ । କିନ୍ତୁ ଏବେ ସରିଫ୍‌ଙ୍କ ଏହି ପୋଷ୍ଟର ଉତ୍ସକୁ ପ୍ରଶ୍ନ ଉଠୁଛି । ତେବେ ଏହାକୁ ନେଇ ପାକିସ୍ତାନ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ କୌଣସି ପ୍ରତିକ୍ରିୟା ମିଳିପାରିନାହିଁ ।