Houthi Attack / ଅଭା ବିମାନବନ୍ଦର ଓ କିଙ୍ଗ ଖାଲିଦ୍ ଏୟାର ବେସ୍ ଉପରେ ଆଟାକ୍; ୭୩ ଜଣ ଆହତ

ନୂଆଦିଲ୍ଲୀ: ସାଉଦି ଆରବର ଦକ୍ଷିଣ ଅଞ୍ଚଳରେ ୟେମେନର ହୁତି ବିଦ୍ରୋହୀଙ୍କ ପକ୍ଷରୁ ଏକାଧିକ ମିସାଇଲ୍ ଓ ଡ୍ରୋନ୍ ଆକ୍ରମଣ କରାଯାଇଛି । ଏହି ଆକ୍ରମଣରେ ଅତି କମରେ ୭୩ ଜଣ ଆହତ ହୋଇଛନ୍ତି । ସାଉଦି ନେତୃତ୍ୱାଧୀନ ମିଳିତ ବାହିନୀ କହିଛି "ଜନବସତି ସହ ତୈଳ ଓ ଅନ୍ୟାନ୍ୟ ଆର୍ଥିକ ଗୁରୁତ୍ୱପୂର୍ଣ୍ଣ ସଂସ୍ଥାକୁ ଟାର୍ଗେଟ କରାଯାଇଛି ।"

ହୁତି ବିଦ୍ରୋହୀମାନେ ଏହି ଆକ୍ରମଣ କରିଛନ୍ତି । ସାଉଦି ଆରବ ଅନୁସାରେ, "ଅଭା ଇଣ୍ଟରନ୍ୟାସନାଲ୍ ଏୟାରପୋର୍ଟ, କିଙ୍ଗ ଖାଲିଦ୍ ଏୟାର ବେସ୍ ଏବଂ ସାଉଦି ଆରବର ସରକାରୀ ତୈଳ କମ୍ପାନୀ 'ଆରାମକୋର କିଛି ସ୍ଥାନ' ଉପରେ ଆକ୍ରମଣ କରାଯାଇଛି । ଅଭା ଓ ଜିଜାନ୍ ଅଞ୍ଚଳରେ ଥିବା ଆରାମକୋର କାରଖାନାକୁ ଟାର୍ଗେଟ୍ କରାଯାଇଛି ।"

ସାଉଦି ଅଧିକାରୀଙ୍କ ଅନୁସାରେ, ଆକ୍ରମଣ ପରେ କିଛି ସ୍ଥାନରେ ନିଆଁ ଲାଗି ଯାଇଥିଲା । ଏହା ସହ କିଛି ତୈଳ କାରଖାନାକୁ ସାମୟିକ ଭାବେ ବନ୍ଦ କରିବାକୁ ପଡ଼ିଥିଲା । ସାଉଦି ଶକ୍ତି ମନ୍ତ୍ରଣାଳୟ କହିଛି ଯେ. ଦେଶର ଦକ୍ଷିଣ ଅଞ୍ଚଳର ଏକାଧିକ ତୈଳ କାରକାନା ଆକ୍ରମଣରେ ପ୍ରଭାବିତ ହୋଇଛି ।

ଏଥିସହ ପଢ଼ନ୍ତୁ: ଭାରତ-ବାଂଲାଦେଶ ମଧ୍ୟରେ ପୁନର୍ବାର ଚଳାଚଳ କରିବ ଟ୍ରେନ୍; ଆସନ୍ତାକାଲି ବସିବ ବୈଠକ 

ସାଉଦି ସରକାର ଏହି ଆକ୍ରମଣକୁ ନେଇ କଠୋର ପ୍ରତିକ୍ରିୟା ଦେଇଛନ୍ତି । ବୈଦେଶିକ ମନ୍ତ୍ରଣାଳୟ କହିଛି ଯେ, "ସାଉଦି ଆରବ ନିଜ ସାର୍ବଭୌମତ୍ୱ ଓ ସୁରକ୍ଷା ପାଇଁ ଆବଶ୍ୟକ ସମସ୍ତ ପଦକ୍ଷେପ ନେବ । ହୁତି ବିଦ୍ରୋହୀଙ୍କ ଆକ୍ରମଣ ଏବଂ ରେଡ୍ ସି’ରେ ଜାହାଜ ଉପରେ ହେଉଥିବା ଆକ୍ରମଣର କଡ଼ା ଜବାବ ଦିଆଯିବ ।"

ଏହି ଘଟଣା ୟେମେନରେ ଚାଲିଥିବା ଯୁଦ୍ଧ ସହ ଜଡ଼ିତ । ସାଉଦି ସମର୍ଥନ କରୁଥିବା ୟେମେନ ସରକାରୀ ବାହିନୀ, ହୁତି ବିଦ୍ରୋହୀଙ୍କ ନିୟନ୍ତ୍ରଣରେ ଥିବା ଅଞ୍ଚଳ ପୁଣି ଦଖଲ କରିବାକୁ ଅଭିଯାନ ଚଳାଉଛି । ଅନ୍ୟପଟେ ହୁତି ବିଦ୍ରୋହୀମାନେ ସାଉଦି ଆରବ ପକ୍ଷରୁ ୟେମେନରେ କରାଯାଇଥିବା ଆକ୍ରମଣକୁ ଏହି ଆକ୍ରମଣର କାରଣ ବୋଲି କହିଛନ୍ତି ।

ସାଉଦି ନେତୃତ୍ୱାଧୀନ ମିଳିତ ବାହିନୀ ମଧ୍ୟ ହୁତି ବିଦ୍ରୋହୀଙ୍କ ବିରୋଧରେ ପଦକ୍ଷେପ ନେବାକୁ ଚେତାବନୀ ଦେଇଛି । ଏହି ଆକ୍ରମଣକୁ ଜୁଲାଇରେ ୟେମେନର ଚାରି ବର୍ଷର ଯୁଦ୍ଧବିରତି ଭାଙ୍ଗିବା ପରେ ହୁତି ବିଦ୍ରୋହୀଙ୍କ ସବୁଠାରୁ ବଡ଼ ଆକ୍ରମଣ ମଧ୍ୟରୁ ଗୋଟିଏ ବୋଲି କୁହାଯାଉଛି ।