Bangladesh Crisis / ଶେଖ ହସିନାଙ୍କ ପୁଅଙ୍କ ବଡ଼ ଦାବି; 'ସରକାର ଭାଙ୍ଗିବାକୁ ୫୦ ମିଲିୟନ୍ ଡଲାର୍ ଫଣ୍ଡିଂ କରିଥିଲା ଆମେରିକା'

ନୂଆଦିଲ୍ଲୀ: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ସରକାର ୨୦୨୪ ଅଗଷ୍ଟରେ ବଡ଼ ବିରୋଧ ପରେ ଭାଙ୍ଗି ଯାଇଥିଲା । ଆଉ ଏବେ ୨ ବର୍ଷ ପରେ ହସିନାଙ୍କ ପୁଅ ସଜୀବ ୱାଜେଦ ଜୟ ବଡ଼ ଦାବି କରିଛନ୍ତି । କହିଛନ୍ତି, "ମାଆ ହସିନାଙ୍କ ସରକାର ଭାଙ୍ଗିବା ପଛରେ ଆମେରିକାର ଭୂମିକା ଥିଲା ।"

ସଜୀବ ୱାଜେଦ ଜୟଙ୍କ ଅନୁସାରେ, "ତତ୍କାଳୀନ ଜୋ ବାଇଡେନ୍ ପ୍ରଶାସନ ଆମେରିକାର ଏଜେନ୍ସି USAID ଜରିଆରେ ପ୍ରାୟ ୫୦ ମିଲିୟନ୍ ଡଲାର୍ (୪ ଅରବରୁ ଅଧିକ ଟଙ୍କା) ଫଣ୍ଡିଂ କରିଥିଲେ ।" ତେବେ ସଜୀବ ୱାଜେଦ ଆଣିଥିବା ଅଭିଯୋଗ ନେଇ ସେ କୌଣସି ପ୍ରମାଣ ଦେଇ ପାରି ନାହାନ୍ତି ।

ୱାଶିଂଟନରେ ସେଣ୍ଟର୍ ଫର୍ ୟୁଏସ୍-ବାଂଲାଦେଶ ରିଲେସନ୍ସ ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସଜୀବ ୱାଜେଦ ଏହି ଅଭିଯୋଗ ଆଣିଛନ୍ତି । ସେ ଦାବି କରିଛନ୍ତି, ତତ୍କାଳୀନ ବାଇଡେନ୍ ପ୍ରଶାସନ ଏଭଳି ଗତିବିଧିକୁ ସମର୍ଥନ କରିଥିଲା । ଯାହା ୨୦୨୪ ଅଗଷ୍ଟରେ ଶେଖ ହସିନାଙ୍କୁ କ୍ଷମତାରୁ ହଟାଇବା ପାଇଁ ସମର୍ଥନ ଦେଇଥିଲା ।

ଏଥିସହ ପଢ଼ନ୍ତୁ: ସୀମାରେ ଥିବା ବଜାର ଉପରେ ଡ୍ରୋନ୍ ଆଟାକ୍; ଜଳିଗଲା ତୈଳ ଡିପୋ, ୧୫୩ ମୃ*ତ 

ତାଙ୍କ ଅନୁସାରେ, ଆମେରିକାର ଏଜେନ୍ସି ଫର୍ ଅନ୍ତର୍ଜାତୀୟ ବିକାଶ (USAID) ପକ୍ଷରୁ ଗଣତନ୍ତ୍ରକୁ ପ୍ରୋତ୍ସାହନ ଦେଉଥିବା କିଛି ସଂସ୍ଥା ବିରୋଧ ପ୍ରଦର୍ଶନ ପାଇଁ ସମୂହକୁ ଯୋଗାଡ଼ କରିବାରେ ସମର୍ଥନ କରିଥିଲେ । ସଜୀବ ବାଜେଦ କହିଛନ୍ତି, "ସରକାର ପରିବର୍ତ୍ତନ ପଛରେ ବାଇଡେନ୍ ପ୍ରଶାସନ ସାମିଲ୍ ଥିଲା । USAID ଜରିଆରେ ସରକାର ପରିବର୍ତ୍ତନ ଲାଗି ୫୦ ମିଲିୟନ୍ ଡଲାର୍ ଫଣ୍ଡିଂ ଦିଆ ଯାଇଥିଲା ।"

ନ୍ୟାସନାଲ୍ ଡେମୋକ୍ରାଟିକ୍ ଇନଷ୍ଟିଚ୍ୟୁଟ୍ ଓ ଇଣ୍ଟରନ୍ୟାସନାଲ୍ ରିପବ୍ଲିକାନ ଇନଷ୍ଟିଚ୍ୟୁଟ୍ ଉପରେ ସଜୀବ ୱାଜେଦ ଅଭିଯୋଗ ଆଣିଛନ୍ତି । ତାଙ୍କ ଅନୁସାରେ, ଏହି ସଂଗଠନ ଏଭଳି ସମୂହକୁ ସଂଗଠିତ ଓ ପ୍ରଶିକ୍ଷଣ ଦେବାରେ ସହାୟତା କରିଥିଲେ । ଯିଏ ପରେ ବିରୋଧ ପ୍ରଦର୍ଶନ ଓ ଅଶାନ୍ତିରେ ସାମିଲ୍ ହୋଇଥିଲେ । କାର୍ଯ୍ୟକ୍ରମରେ ଶେଖ ହସିନାଙ୍କ ଦଳ ଆୱାମୀ ଲିଗ୍ ସମର୍ଥକ ଓ ପୂର୍ବ ଅଧିକାରୀ ସାମିଲ୍ ହୋଇଥିଲେ ।

ଆମେରିକାର ଚାପରେ କ୍ଷମତା ପରିବର୍ତ୍ତନ ଦାବି

ବାଂଲାଦେଶରେ ଅନ୍ତରୀଣ ସରକାରର ପୂର୍ବତନ ମୁଖ୍ୟ ମହମ୍ମଦ ୟୁନୁସଙ୍କୁ ନେଇ ମଧ୍ୟ ସଜୀବ ୱାଜେଦ ଜୟ ଦାବି କରିଛନ୍ତି । ସେ ଅଭିଯୋଗ କରିଛନ୍ତି ଯେ, "ବାଂଲାଦେଶର ସୈନ୍ୟ ନେତୃତ୍ଵ ଉପରେ ଆମେରିକାର କୂଟନୈତିକ ଚାପ ଫଳରେ ୟୁନୁସଙ୍କୁ ଅନ୍ତରୀଣ ପ୍ରଶାସନ ଦାୟିତ୍ଵ ଦିଆ ଯାଇଥିଲା । ଢାକାରେ ଅବସ୍ଥାପିତ ଆମେରିକାର ରାଷ୍ଟ୍ରଦୂତ ୟୁନୁସଙ୍କୁ ଅନ୍ତରୀଣ ସରକାରର ମୁଖ୍ୟ କରିବା ପ୍ରକ୍ରିୟାକୁ ପ୍ରଭାବିତ କରିଥିଲେ ।"