ନ୍ୟୁୟର୍କ: ଗଳି ଗଳିରେ ବଡ଼ ପରଦା, ରାସ୍ତାଠୁ ପଡ଼ିଆ ସବୁଠି ଭିଡ଼ । କାରଣ ୬୦ ବର୍ଷର ଦୀର୍ଘ ପ୍ରତିକ୍ଷା ପରେ ଜାତିସଂଘରେ ଅଭିଭାଷଣ ରଖୁଛନ୍ତି ରାଷ୍ଟ୍ରପତି । ଗୋଟିଏ ପିଢ଼ି ପରେ ଦେଶର କଥା ଜାତିଂସଘରେ ଉପସ୍ଥାପନ କରିଛନ୍ତି ରାଷ୍ଟ୍ରପତି । ଆଉ ଏଥିପାଇଁ ଲୋକଙ୍କ ମନରେ ଏତେ ଉତ୍କଣ୍ଠା, ଏତେ ଉତ୍ସାହ ।

ଆଜ୍ଞା ହଁ, ୬ ଦଶନ୍ଧି ଅର୍ଥାତ୍ ୬୦ ବର୍ଷର ଲମ୍ବା ପ୍ରତୀକ୍ଷାର ଅନ୍ତ ଘଟିଛି । ଶେଷରେ ଜାତିସଂଘର ମହାସଭାକୁ ସମ୍ବୋଧିତ କରିଛନ୍ତି ସିରିଆ ରାଷ୍ଟ୍ରପତି । ୬୦ ବର୍ଷ ପରେ ସିରିଆ ରାଷ୍ଟ୍ରପତି ଜାତିସଂଘରେ ଅଭିଭାଷଣ ରଖିଥିବା ବେଳେ ଏଥିପାଇଁ ଦେଶର ଗଳି ଗଳିରେ ଲାଗିଥିଲା ବଡ଼ ବଡ଼ ପରଦା । ରାଷ୍ଟ୍ରପତିଙ୍କ ଭାଷଣ ଶୁଣିବାକୁ ଜମିଥିଲା ଲୋକଙ୍କ ଭିଡ଼ ।

ଏଥିସହ ପଢ଼ନ୍ତୁ: ବିହାର ନିର୍ବାଚନ ପାଇଁ ଧର୍ମେନ୍ଦ୍ରଙ୍କୁ ପ୍ରଭାରୀ ନିଯୁକ୍ତ କଲା ବିଜେପି, ସିଆର୍ ପାଟିଲ୍ ଓ କେଶବ ମୌର୍ଯ୍ୟ ସହ ପ୍ରଭାରୀ

ଜାତିସଂଘକୁ ସମ୍ବୋଧିତ କରି ସିରିଆ ରାଷ୍ଟ୍ରପତି ଅହମଦ ଅଲ-ଶରା ବୁଧବାର କହିଛନ୍ତି, "ସିରିଆ ଦୁନିଆର ଦେଶଗୁଡ଼ିକ ଭିତରେ ତାର ଉଚିତ ସ୍ଥାନ ପୁଣି ଫେରି ପାଇଛି ।" ଆଉ ରାଷ୍ଟ୍ରପତି ଅହମଦ ଅଲ-ଶରାଙ୍କ ଏହି ଭାଷଣରେ ଲୋକଙ୍କ ଭିଡ଼ ହିଁ ବୟାନ କରୁଛି ଏଥିପାଇଁ କେତେ ଅପେକ୍ଷା କରିଥିଲା ସିରିଆ ।

୧୯୬୭ରେ ଶେଷଥର ପାଇଁ ସିରିଆ ରାଷ୍ଟ୍ରପତି ଜାତିସଂଘର ମହାସଭାରେ ଭାଗ ନେଇଥିଲେ । ଏହା ଥିଲା ଅସଦ ପରିବାରର ପାଞ୍ଚ ଦଶନ୍ଧି ପୂର୍ବର ଶାସନ କାଳ କଥା । ସେତେବେଳେ ନୌରେଦ୍ଦିନ ଅତ୍ତାସୀ ସିରିଆ ରାଷ୍ଟ୍ରପତି ଭାବେ ଜାତିସଂଘରେ ଭାଷଣା ଦେଇଥିଲେ । ଆରବ-ଇସ୍ରାଏଲ୍ ଯୁଦ୍ଧ ପରେ ଜାତିସଂଘରେ ମତ ରଖିଥିଲା ସିରିଆ ।

୧୯୭୦ରେ ଅସଦଙ୍କ ପରିବାର ସିରିଆରେ କ୍ଷମତାକୁ ଆସିଥିଲା । ଆଉ ସେବେଠୁ ଆମେରିକା ସହ ସିରିଆ ସମ୍ପର୍କ ତିକ୍ତ ଥିଲା । ଆଉ ସିରିଆ, ସୋଭିଏତ ୟୁନିଅନ୍ ସହ ସମ୍ବନ୍ଧ ଦୃଢ଼ କରିଥିଲା । ଆଉ ସମୟ ସହ ସିରିଆ ବଦଳିବା ସହ ଗତବର୍ଷ ଜାତିସଂଘର ମହାସଭାରେ ଦେଶର ପ୍ରତିନିଧିତ୍ଵ କରିଥିଲେ ବିଦେଶ ମନ୍ତ୍ରୀ ।

ଏଥିସହ ପଢ଼ନ୍ତୁ: ଭଲ ନାହିଁ ପାକିସ୍ତାନ ଫର୍ମ, ଫିଲ୍ଡିଂ ବି ଢିଲା..

ସୂଚନା ଯୋଗ୍ୟ, ଅସଦଙ୍କ ପରିବାର ସିରିଆକୁ ୫୦ ବର୍ଷ ଧରି ଶାସନ କରିବା ପରେ ନିରଙ୍କୁଶ କ୍ଷମତାର ଅନ୍ତ ଡିସେମ୍ବରରେ ହୋଇଥିଲା । ଅଲ-ଶରାଙ୍କ ନେତୃତ୍ଵରେ ହୋଇଥିବା ଅଭିଯାନ ଯୋଗୁଁ ପଦରୁ ହଟିଥିଲେ ତତ୍କାଳୀନ ରାଷ୍ଟ୍ରପତି ବଶର ଅଲ-ଅସଦ । ଅସଦ ପଦରୁ ହଟିବା ସହ ପ୍ରାୟ ୧୪ ବର୍ଷ ଧରି ସିରିଆରେ ଜାରି ରହିଥିବା ଗୃହ ଯୁଦ୍ଧ ବି ବନ୍ଦ ହୋଇଥିଲା ।

ଏବେ ସିରିଆ ରାଷ୍ଟ୍ରପତି ଅହମଦ ଅଲ-ଶରା ଜାତିସଂଘରେ ଅଭିଭାଷଣ ରଖି ଇସ୍ରାଏଲ୍‌କୁ କଡ଼ା ସମାଲୋଚନା କରିଛନ୍ତି । କହିଛନ୍ତି, "ଅସଦଙ୍କ ପତ୍ତନ ପର ଠାରୁ ଇସ୍ରାଏଲ୍, ସିରିଆକୁ ଧମକ ଦେବା ବନ୍ଦ କରି ନଥିଲା । ଇସ୍ରାଏଲ୍‌ର ନୀତି, ଅନ୍ତର୍ଜାତୀୟ ସମୁଦାୟ ଦ୍ଵାରା ଓ ଏହାର ଲୋକଙ୍କ ସମର୍ଥନ ବିରୋଧୀ । ଆଉ ଏହା ହିଁ ଆମ ପାଇଁ ବିପଦ ।"
ଏବେ ଇସ୍ରାଏଲ୍-ସିରିଆ ମଧ୍ୟରେ ସୁରକ୍ଷା ଚୁକ୍ତି ନେଇ ଆଲୋଚନା ଜାରି ରହିଛି । ସିରିଆ ରାଷ୍ଟ୍ରପତି ଆଶା ରଖିଛନ୍ତି ଚୁକ୍ତି ପରେ ଇସ୍ରାଏଲ୍ ସେନା ଫେରିଯିବ । ଏଥିସହ ୧୯୭୪ ଚୁକ୍ତି ପୁଣି କାର୍ଯ୍ୟକାରୀ ହେବ ।

Argus News | argus news | Odisha Latest News, Breaking News, Trending News, Live TV