୧୭ ବର୍ଷ ପରେ ନିଜ ଦେଶକୁ ଫେରିଛନ୍ତି ତାରିକ ରେହମାନ । ବାଂଲାଦେଶର ପୂର୍ବତନ ରାଷ୍ଟ୍ରପତି ଜିଆଉର ରେହମାନ ଏବଂ ପୂର୍ବତନ ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ବଡ଼ ପୁଅ ତାରିକ । ବାଂଲାଦେଶ ନ୍ୟାସନାଲିଷ୍ଟ ପାର୍ଟି ବା ବିଏନପିର ସମର୍ଥକ ଢାକା ବିମାନବନ୍ଦରରେ ରେହମାନ ଏବଂ ତାଙ୍କ ପରିବାରକୁ କରିଥିଲେ ସ୍ୱାଗତ । ଦେଶକୁ ପୁନର୍ଗଠନ କରିବା ପାଇଁ ଆମ ସମସ୍ତଙ୍କୁ ଏକତ୍ର ହେବାର ସମୟ ଆସିଛି କହିଲେ ତାରିକ ।

୧୭ ବର୍ଷର ଆତ୍ମନିର୍ବାସନ ପରେ ବାଂଲାଦେଶ ଫେରିଲେ ତାରିକ ରେହମାନ । ବାଂଲାଦେଶ ଜାତୀୟତାବାଦୀ ପାର୍ଟି ବା ବିଏନପିର କାର୍ଯ୍ୟକାରୀ ଅଧ୍ୟକ୍ଷଙ୍କ ଲାଗି ଢାକାରେ ଏକାଠି ହୋଇଥିଲେ ଲକ୍ଷାଧିକ ସମର୍ଥକ। ବିଭିନ୍ନ କାରଣରୁ ସେ ପ୍ରାୟ ୧୭ ବର୍ଷ ଧରି ଲଣ୍ଡନରେ ଆତ୍ମନିର୍ବାସିତ ଜୀବନ କଟାଉଥିଲେ । ତାରିକ ରେହମାନ ପୂର୍ବତନ ପ୍ରଧାନମନ୍ତ୍ରୀ ବେଗମ ଖାଲେଦା ଜିଆଙ୍କ ପୁଅ। ଆସନ୍ତା ବର୍ଷ ହେବାକୁ ଯାଉଥିବା ସାଧାରଣ ନିର୍ବାଚନରେ ବିଏନପି ଯୋଗ ଦେବାକୁ ଯାଉଥିବାରୁ କ୍ଷେତ୍ର ପ୍ରସ୍ତୁତ ଲାଗି ତାରିକ ବାଂଲାଦେଶ ଫେରିଥିବା ଚର୍ଚ୍ଚା ହେଉଛି । ଭାରତ ସପକ୍ଷବାଦୀ ଆୱାମି ଲିଗକୁ ବାଂଲାଦେଶ ସାଧାରଣ ନିର୍ବାଚନ ଲଢିବା ଲାଗି ବାରଣ କରାଯାଇଥିବା ବେଳେ ତାରିକଙ୍କ ସ୍ବଦେଶ ପ୍ରତ୍ୟାବର୍ତ୍ତନ ଗ୍ରହଣ କରୁଛି ଗୁରୁତ୍ବପୂର୍ଣ୍ଣ ଭୂମିକା ।

ସେପଟେ ତାରିକଙ୍କ ମା ବେଗମ ଖାଲେଦା ଜିଆ ବି ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ସମ୍ବୋଧନରେ ତାରିକ କହିଛନ୍ତି, ଦେଶକୁ ପୁନର୍ଗଠନ କରିବା ପାଇଁ ଆମ ସମସ୍ତଙ୍କ ଏକତ୍ର ହେବାର ସମୟ ଆସିଛି । ସମସ୍ତ ସମୁଦାୟକୁ ଏକ ସାଥିରେ ନେଇ ଗଠିତ ହେବ ସ୍ବପ୍ନର ବାଂଲାଦେଶ ।

ଆୱାମି ଲିଗ୍ ଶାସନ କାଳରେ ତାରିକଙ୍କ ବିରୋଧରେ ଆଇନଗତ ପ୍ରତିବନ୍ଧକ ଲାଗିଥିବାରୁ ସେ ଫେରିପାରୁ ନଥିଲେ। ବିଭିନ୍ନ ହାଇପ୍ରୋଫାଇଲ ମାମଲାରୁ ସେ ଖଲାସ ହେବା ପରେ ତାରିକ ଢାକା ଫେରିଛନ୍ତି । ୨୦୦୮ରୁ ସେ ଲଣ୍ଡନରେ ବାସ କରିଆସୁଥିଲେ । ସେବେଠାରୁ ସେ ଲଣ୍ଡନରୁ ବିଏନପିକୁ ପରିଚାଳନା କରୁଥିଲେ । ୨୦୦୧ରୁ ୨୦୦୬ ଯାଏ ବିଏନପିର ବିବାଦୀୟ ମୁଖ୍ୟ କାର୍ଯ୍ୟାଳୟ ଥିଲା ହାୱା ଭବନ । ତେବେ ହାୱା ଭବନ ଥିଲା ଅନେକ ଦୁର୍ନୀତି, ରାଜନୈତିକ ହିଂସାର ପ୍ରମୁଖ କେନ୍ଦ୍ର । ଆୱାମି ଲିଗର ଛାତ୍ର ସଂଗଠନ ସଭାପତି ସଦ୍ଦାମ୍ ହୁସେନ କହିଛନ୍ତି, ବାଂଲାଦେଶରେ ହେବାକୁ ଯାଉଛି ଏକପକ୍ଷୀୟ ନିର୍ବାଚନ ।

ବାଂଲାଦେଶ ରାଜନୀତିର ଡାର୍କ ପ୍ରିନ୍ସ ଭାବେ ପରିଚିତ ତାରିକ । ତେବେ ବାଂଲାଦେଶର ରାଜନୀତି ଆଗକୁ କେଉଁ ରୂପ ନେଉଛି ତାହା ଉପରେ ସମସ୍ତଙ୍କ ନଜର ।