'ମୋ ଜୀବନ ପ୍ରତି ବିପଦ ଅଛି। ମତେ ଏବଂ ମୋ ପରିବାରର ଲୋକଙ୍କର ଯଦି କିଛି ହୁଏ, ତେବେ ଦାୟୀ କେବଳ ଅସୀମ ମୁନିର ।'' ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଏଭଳ କିଛି ପୋଷ୍ଟ ବର୍ତ୍ତମାନ ଭାଇରାଲ ହେବାରେ ଲାଗିଛି। ଏକଥା ଏହି ସମୟରେ ଭାଇରାଲ ହେଉଛି ଯେତେବେଳେ ଇମ୍ରାନ ଖାନଙ୍କ ପରିବାର ଇମ୍ରାନଙ୍କୁ ଭେଟି ନପାରି ଜେଲ ବାହାରେ ଅପେକ୍ଷା କରିଥିଲେ ଆଉ ବାରମ୍ୱାର କହୁଥିଲେ କି ତାଙ୍କ ଜୀବନ ପ୍ରତି ବିପଦ ରହିଛି । ପୂର୍ବତନ ପାକିସ୍ତାନୀ ପ୍ରଧାନମନ୍ତ୍ରୀ ଏବଂ କ୍ରିକେଟ ତାରକା ଇମ୍ରାନ ଖାନ ଗତ ଦୁଇ ବର୍ଷ ଧରି ଆଦିଆଲା ଜେଲରେ ବନ୍ଦୀ ଅଛନ୍ତି। ଅଗଷ୍ଟ ୨୦୨୩ରୁ, ତାଙ୍କର ରାଜନୈତିକ ସଂଘର୍ଷ ଏହାର କାନ୍ଥ ମଧ୍ୟରେ ସୀମିତ ରହିଛି। ଖାନ କହିଥିଲେ ଯେ ତାଙ୍କ ବିରୁଦ୍ଧରେ ମାମଲାଗୁଡ଼ିକ ଶାସକ ଏବଂ ସାମରିକ ନେତୃତ୍ୱଙ୍କ ଚାପରେ ଗଢ଼ାଯାଇଥିଲା।

ତାଙ୍କ ପରିବାର ଆଶା କରିଥିଲେ ଯେ କୋର୍ଟଙ୍କ ଶୁଣାଣି ପରିସ୍ଥିତିରେ ଉନ୍ନତି ଆଣିବ, କିନ୍ତୁ ଗତ ମାସ ଧରି ସେମାନଙ୍କୁ ତାଙ୍କୁ ଭେଟିବାକୁ ଦିଆଯାଇନଥିଲା । ଏହା ସନ୍ଦେହ ଏବଂ ଚିନ୍ତା ବୃଦ୍ଧି ପାଇଥିଲା । ଆଦିଆଲା ଜେଲ ଅଧିକାରୀମାନେ କହିଛନ୍ତି ଯେ, ଇମ୍ରାନ ଖାନଙ୍କ ସ୍ବାସ୍ଥ୍ୟାବସ୍ଥା ସ୍ବାଭାବିକ ଅଛି ଏବଂ ସେ ଜେଲ ମଧ୍ୟରେ ସମସ୍ତ ଆବଶ୍ୟକୀୟ ଚିକିତ୍ସା ପାଉଛନ୍ତି। ପ୍ରଶାସନ ଏହା ମଧ୍ୟ ପୁନର୍ବାର କହିଛି ଯେ ତାଙ୍କ ସ୍ଥାନାନ୍ତର ବିଷୟରେ ସୋସିଆଲ ମିଡିଆରେ ପ୍ରସାରିତ ଗୁଜବ ସମ୍ପୂର୍ଣ୍ଣ ମିଥ୍ୟା। ଏହା ସତ୍ତ୍ୱେ, ପରିବାରକୁ ସୂଚନା ନ ଦେବା ଯୋଗୁ ବିବାଦ ବଢ଼ିବାରେ ଲାଗିଛି। ଇମ୍ରାନ ଖାନଙ୍କ ସମର୍ଥକ ଏବଂ ପିଟିଆଇ କର୍ମୀମାନେ ଆଦିଆଲା ଜେଲ ବାହାରେ ନିରନ୍ତର ଏକତ୍ରିତ ହେଉଛନ୍ତି । ସେମାନେ ଦାବି କରୁଛନ୍ତି ଯେ ପରିବାରକୁ ତୁରନ୍ତ ତାଙ୍କୁ ଭେଟିବାକୁ ଅନୁମତି ଦିଆଯାଉ ଏବଂ ଖାନଙ୍କ ସ୍ବାସ୍ଥ୍ୟ ସମ୍ପର୍କରେ ସମସ୍ତ ସନ୍ଦେହ ଦୂର କରାଯାଉ। କୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ସାକ୍ଷାତ ଅଭାବ ପରିସ୍ଥିତିକୁ ଆହୁରି ବିବାଦ ସୃଷ୍ଟି କରୁଛି।

ଏଥିସହ ପଢ଼ନ୍ତୁ: ପାକିସ୍ତାନ ସରକାରକୁ ଇମ୍ରାନ ଖାନଙ୍କ ପୁଅଙ୍କ ଚେତାବନୀ, 'ଯଦି ତାଙ୍କର କିଛି ହୁଏ ତେବେ...'

ସରକାର ଏବଂ ଜେଲ କର୍ତ୍ତୃପକ୍ଷ ଉଭୟ ଦାବି କରିଛନ୍ତି ଯେ ଇମ୍ରାନ ଖାନଙ୍କୁ ଜେଲରେ ସୁବିଧା ଏବଂ ସୁରକ୍ଷା ଉଭୟ ଯୋଗାଇ ଦିଆଯାଉଛି। ସେମାନଙ୍କ ଅନୁଯାୟୀ, ତାଙ୍କୁ ଅନ୍ୟ କୌଣସି ସ୍ଥାନକୁ ସ୍ଥାନାନ୍ତର କରାଯାଇ ନାହିଁ, କିମ୍ବା ତାଙ୍କ ସ୍ବାସ୍ଥ୍ୟ ବିପଦରେ ନାହିଁ। ପ୍ରଶାସନ ଦାବି କରୁଛି ଯେ ପିଟିଆଇ ନେତାମାନଙ୍କୁ ସମସ୍ତ ଆବଶ୍ୟକୀୟ ସୂଚନା ଯୋଗାଇ ଦିଆଯାଇଛି, କିନ୍ତୁ ପରିବାର ଏବଂ ସମର୍ଥନ ଗୋଷ୍ଠୀ ଏହାକୁ ବିଶ୍ୱାସ କରିବାକୁ ରାଜି ନୁହଁନ୍ତି, କାରଣ ସେମାନଙ୍କୁ ଏପର୍ଯ୍ୟନ୍ତ ତାଙ୍କୁ ଭେଟିବା ପାଇଁ ଅନୁମତି ଦିଆଯାଇ ନାହିଁ। ତେବେ ଇମ୍ରାନଙ୍କୁ ତାଙ୍କ ପରିବାର କେବେ ଭେଟିବେ ତାହା ପ୍ରଶ୍ନ ଘେରରେ ଥିବାବେଳେ ଇମ୍ରାନଙ୍କ ଆଉ ଏକ ପୋଷ୍ଟ ଭାଇରାଲ ହେଉଛି।

୨ ମଇ, ୨୦୨୪ରେ ୟୁକେର ଟେଲିଗ୍ରାଫରେ ପ୍ରକାଶିତ ଇମ୍ରାନ ଖାନଙ୍କ ଏକ ପୁରୁଣା ଲେଖା ଉତ୍ତେଜନାକୁ ଆହୁରି ବୃଦ୍ଧି କରିଛି। ସେହି ଲେଖାରେ, ଖାନ ଲେଖି ଏକ ଆଲୋଡ଼ନ ସୃଷ୍ଟି କରିଥିଲେ ଯେ ସାମରିକ ପ୍ରତିଷ୍ଠାନ ତାଙ୍କ ବିରୁଦ୍ଧରେ ସମସ୍ତ ଉପାୟ ସମାପ୍ତ କରିଦେଇଛି ଏବଂ ସେ ଏବେ ତାଙ୍କ ଜୀବନ ପାଇଁ ଭୟ କରୁଛନ୍ତି। ସେ ସ୍ପଷ୍ଟ ଭାବରେ କହିଥିଲେ ଯେ ଯଦି ତାଙ୍କ କିମ୍ବା ତାଙ୍କ ପତ୍ନୀଙ୍କ ସହିତ କିଛି ହୁଏ, ତେବେ ସେନା ମୁଖ୍ୟ ଜେନେରାଲ ଅସୀମ ମୁନିର ସିଧାସଳଖ ଏଥିପାଇଁ ଦାୟୀ ରହିବେ। ଏବେ, ସୋସିଆଲ ମିଡିଆରେ ତାଙ୍କ ମୃତ୍ୟୁ କିମ୍ବା ଅସୁସ୍ଥ ସ୍ବାସ୍ଥ୍ୟ ସମ୍ପର୍କରେ ଗୁଜବ ପ୍ରକାଶ ପାଇବାରୁ, ସେହି ସମାନ ଧାରା ପୁଣି ଥରେ ଉଠିଛି। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ବି ତାଙ୍କ ପରିବାର ଇମ୍ରାନଙ୍କୁ ଭେଟିପାରିନଥିବା ଜଣାପଡ଼ିଛି। ଅନ୍ୟପଟେ ଇମ୍ରାନ ଖାନଙ୍କ ପୁଅ କାସିମ ଖାନଙ୍କ ଏକ ପୋଷ୍ଟ ଏହି ମାମଲାକୁ ଆହୁରି ସରଗରମ କରିଛି । ସୋସିଆଲ ମିଡିଆରେ ଇମ୍ରାନ ଖାନଙ୍କ ପୁଅଙ୍କ ଏକ ପୋଷ୍ଟ ପ୍ରକାଶ ପାଇବା ପରେ ଦେଶର ଅନେକ ସ୍ଥାନରେ ଅଶାନ୍ତିର ମାହୋଲ ଦେଖିବାକୁ ମିଳିଛି ।

ବ୍ରିଟେନରେ ରହୁଥିବା କାସିମ ଖାନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଯେ ଇମ୍ରାନ ଖାନଙ୍କୁ ଗତ ଛଅ ସପ୍ତାହ ଧରି ଏପରି ସ୍ଥାନରେ ରଖାଯାଇଛି, ଯେଉଁଠାରେ ତାଙ୍କୁ କାହାରି ସହିତ ଯୋଗାଯୋଗ କରିବାକୁ ଅନୁମତି ନାହିଁ । ଏମିତିକି ତାଙ୍କ ପରିବାରକୁ ମଧ୍ୟ ସୂଚନା ଦିଆଯାଉନାହିଁ। ସେ ଏହା ମଧ୍ୟ ଲେଖିଛନ୍ତି ଯେ ତାଙ୍କ ପିତା ଜୀବିତ ଅଛନ୍ତି ବୋଲି ତାଙ୍କ ପାଖରେ କୌଣସି ପ୍ରମାଣ ନାହିଁ । ଏହି ବୟାନ ରାଜନୈତିକ ଝଡ଼ ସୃଷ୍ଟି କରିଛି। କାସିମ ଏବଂ ତାଙ୍କ ଭାଇ ସାଧାରଣତଃ ରାଜନୀତିରୁ ଦୂରରେ ରୁହନ୍ତି, କିନ୍ତୁ ଏଥର ପରିସ୍ଥିତି ସେମାନଙ୍କୁ ଖୋଲାଖୋଲି ଭାବରେ ସାମ୍ନାକୁ ଆସିବାକୁ ବାଧ୍ୟ କରିଛି।


ଅଧିକ ପଢ଼ନ୍ତୁ ବିଦେଶ ଖବର: