ଇରାନର ଖାର୍ଗ ଦ୍ୱୀପ ଉପରେ ଟ୍ରମ୍ପଙ୍କ ପୁନଃ ଆକ୍ରମଣ ଚେତାବନୀ । ହର୍ମୁଜ ପ୍ରଣାଳୀ ପାଇଁ ସହଯୋଗୀ ଦେଶମାନଙ୍କୁ ଯୁଦ୍ଧ ଜାହାଜ ପଠାଇବାକୁ ଆହ୍ୱାନ ଦେଲେ ଟ୍ରମ୍ପ । ହର୍ମୁଜ ପ୍ରଣାଳୀର ସୁରକ୍ଷା ପାଇଁ ଯୁଦ୍ଧ ଜାହାଜ ପଠାଇବାକୁ ସେ ମିତ୍ର ଶକ୍ତିମାନଙ୍କୁ ଅନୁରୋଧ କରିଛନ୍ତି ।

ଅନ୍ୟପଟେ ତେହେରାନ ମଧ୍ୟ ନିଜର ପ୍ରତିକ୍ରିୟାକୁ ଜୋରଦାର କରିବାକୁ ଶପଥ ନେଇଛି । ଟ୍ରମ୍ପ କହିଛନ୍ତି ଯେ ଆମେରିକାର ଆକ୍ରମଣ ଖାର୍ଗ ଦ୍ୱୀପର ଅଧିକାଂଶ ଭାଗକୁ ସମ୍ପୂର୍ଣ୍ଣ ରୂପେ ଧ୍ୱଂସ କରିଦେଇଛି । ହର୍ମୁଜ ପ୍ରଣାଳୀ ଦେଇ ଯାଉଥିବା ଜାହାଜ ଚଳାଚଳକୁ ରୋକିବା ଯୋଗୁ ଆମେରିକା ଓ ତା’ର ସହଯୋଗୀଙ୍କ ପାଇଁ ଏକ ବଡ଼ ସମସ୍ୟା ସୃଷ୍ଟି ହୋଇଛି । ଏହି ଯୁଦ୍ଧ କାରଣରୁ ବିଶ୍ୱରେ ତୈଳ ଯୋଗାଣ ବାଧାପ୍ରାପ୍ତ ହୋଇଛି । ଫେବୃଆରୀ ୨୮ ରୁ ଆରମ୍ଭ ହୋଇଥିବା ଏହି ଆକ୍ରମଣରେ ବର୍ତ୍ତମାନ ସୁଦ୍ଧା ୨ ହଜାରରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି । ଯେଉଁମାନଙ୍କ ମଧ୍ୟରୁ ଅଧିକାଂଶ ଇରାନର ।

ସେପଟେ ଯୁଦ୍ଧ ମଧ୍ୟରେ ଭାରତକୁ ଶକ୍ତି ସୁରକ୍ଷା କ୍ଷେତ୍ରରେ ମିଳିଛି ବଡ଼ ସଫଳତା । କାରଣ 'ଶିବାଲିକ' ପରେ ଭାରତର ଦ୍ୱିତୀୟ LPG ବାହୀ ଜାହାଜ 'ନନ୍ଦା ଦେବୀ' ସୁରକ୍ଷିତ ଭାବେ ହର୍ମୁଜ ପ୍ରଣାଳୀ ଅତିକ୍ରମ କରିଛି । ବର୍ତ୍ତମାନ ଏହି ଜାହାଜଟି ଖୋଲା ସମୁଦ୍ରରେ ପ୍ରବେଶ କରିଥିବା ନେଇ ସରକାରୀ ସୂତ୍ରରୁ ସୂଚନା ମିଳିଛି । ଭାରତୀୟ ନୌସେନା ବର୍ତ୍ତମାନ ଏହି ଜାହାଜକୁ ଏସ୍କର୍ଟ ପ୍ରଦାନ କରୁଛି । ଆଗାମୀ ଦୁଇ ଦିନ ମଧ୍ୟରେ ଏହା ଭାରତୀୟ ବନ୍ଦରରେ ପହଞ୍ଚିବାର ସମ୍ଭାବନା ରହିଛି । ମୁମ୍ବାଇ କିମ୍ବା କାଣ୍ଡଲା ବନ୍ଦର ମଧ୍ୟରୁ କୌଣସି ଗୋଟିଏ ସ୍ଥାନରେ ଏହି ଜାହାଜଟି ନିଜର ମାଲ୍ ଖଲାସ କରିପାରେ ।

'ନନ୍ଦା ଦେବୀ' ଜାହାଜରେ ୪୬,୦୦୦ ମେଟ୍ରିକ୍ ଟନ୍‌ରୁ ଅଧିକ LPG ଗ୍ୟାସ ରହିଛି । ଏହା ପୂର୍ବରୁ 'ଶିବାଲିକ' ନାମକ ଜାହାଜକୁ ମଧ୍ୟ ସୁରକ୍ଷିତ ଭାବେ ବାହାରକୁ ଅଣାଯାଇଥିଲା । ଏଥିରେ ମଧ୍ୟ ୪୬,୦୦୦ ମେଟ୍ରିକ୍ ଟନ୍‌ରୁ ଅଧିକ LPG ଗ୍ୟାସ ରହିଥିବା ବୈଦେଶିକ ବ୍ୟାପାର ବିଭାଗର ମୁଖପାତ୍ର ସୂଚନା ଦେଇଛନ୍ତି । ସରକାରଙ୍କ ସଫଳ କୂଟନୈତିକ ଆଲୋଚନା ପରେ ଏହି ଜାହାଜଗୁଡ଼ିକର ଯାତ୍ରା ପାଇଁ ପଥ ପରିଷ୍କାର ହୋଇଥିଲା ।