Strait of Hormuz latest news / 'ଇରାନ ବିରୋଧରେ ଏପର୍ଯ୍ୟନ୍ତ ଶେଷ ହୋଇନାହିଁ ଅପରେସନ'

Donald Trump latest statement on Iran: ବିଗତ ୬ ମାସ ଧରି ମଧ୍ୟ ପ୍ରାଚ୍ୟରେ ମୁହାଁମୁହିଁ ସ୍ଥିତିରେ ଅଛନ୍ତି ଆମେରିକା-ଇରାନ। ସଦ୍ୟ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ପ୍ରାଚ୍ୟ ସ୍ଥିତିକୁ ନେଇ ଏକ ଗୁରୁତ୍ୱପୂର୍ଣ୍ଣ ବିବୃତ୍ତି ଦେଇଛନ୍ତି। ଏନେଇ ସେ କହିଛନ୍ତି ଇରାନ ସହିତ ବର୍ତ୍ତମାନ କୌଣସି ଆଲୋଚନା ଚାଲିନାହିଁ ଏବଂ ଆମେରିକା ଦ୍ୱାରା ହେଉଥିବା ସାମରିକ କାର୍ଯ୍ୟାନୁଷ୍ଠାନ ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବରେ ଶେଷ ହୋଇନାହିଁ। ଗଣମାଧ୍ୟମକୁ ପ୍ରତିକ୍ରିୟା ଦେଇ ରାଷ୍ଟ୍ରପତି ଟ୍ରମ୍ପ ଦାବି କରିଛନ୍ତି ଯେ ଇରାନ କଠିନ ଆର୍ଥିକ ଏବଂ ସାମରିକ ଚାପର ସାମ୍ନା କରୁଛି। ଏପରିକି ନିଜର ସୈନିକଙ୍କୁ ଦରମା ମଧ୍ୟ ଦେଇପାରୁ ନାହିଁ ଇରାନ। ସେଠାରେ ଗୁରୁତର ସଙ୍କଟ ଦେଖାଦେଇଛି। ଟ୍ରମ୍ପ କହିଛନ୍ତି ଯେ ହର୍ମୁଜ ପ୍ରଣାଳୀ ପୁନର୍ବାର ଖୋଲିବା ଏହା ସୂଚିତ କରେ ନାହିଁ ଯେ ଆମେରିକା, ଇରାନ ବିରୋଧରେ ଆଉ କୌଣସି ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବ ନାହିଁ।

ହର୍ମୁଜ ପ୍ରଣାଳୀ ବର୍ତ୍ତମାନ ଖୋଲା ରହିଛି: ରାଷ୍ଟ୍ରପତି ଟ୍ରମ୍ପ
ଆମେରିକା ରାଷ୍ଟ୍ରପତି ପରବର୍ତ୍ତୀ କାର୍ଯ୍ୟାନୁଷ୍ଠାନ ସମ୍ପର୍କରେ କୌଣସି ନିର୍ଦ୍ଦିଷ୍ଟ ସୂଚନା ପ୍ରଦାନ କରିନାହାଁନ୍ତି। ଏପରିକି ସେ ଏକଥା ମଧ୍ୟ କରିନାହାଁନ୍ତି ଯେ ଆମେରିକା ପୁଣିଥରେ କେଉଁ ପରିସ୍ଥିତିରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବ। ହେଲେ ତଥାପି, ସେ କହିଛନ୍ତି ଯେ ହର୍ମୁଜ ପ୍ରଣାଳୀ ବର୍ତ୍ତମାନ ଖୋଲା ରହିଛି। ଇରାନ ସହିତ କୌଣସି ଆଲୋଚନାକୁ ମଧ୍ୟ ସେ ପ୍ରତ୍ୟାଖ୍ୟାନ କରିଛନ୍ତି। ସେ କହିଛନ୍ତି ଯେ ବର୍ତ୍ତମାନ ଇରାନ ସହିତ ଆଲୋଚନା କରିବା ପାଇଁ ଅଧିକ କିଛି ନାହିଁ। ଆମେ କୌଣସି ବୈଠକ କରିବାକୁ ଚାହୁଁନାହୁଁ।

ବର୍ତ୍ତମାନ ଇରାନ ସହ କୌଣସି ଆଲୋଚନା କରିବ ନାହିଁ ଆମେରିକା
ରାଷ୍ଟ୍ରପତି ଟ୍ରମ୍ପଙ୍କ ଏହି ମନ୍ତବ୍ୟ ସୂଚାଇ ଦେଇଛି ଯେ ଏହି ରଣନୈତିକ ସାମୁଦ୍ରିକ ପଥ (ହର୍ମୁଜ ପ୍ରଣାଳୀ) ଖୋଲିବା ସତ୍ତ୍ୱେ, ୱାଶିଂଟନ ବର୍ତ୍ତମାନ ଆଲୋଚନା ଆରମ୍ଭ କରିବାକୁ ଚାହୁଁନାହିଁ। ରାଷ୍ଟ୍ରପତି ଟ୍ରମ୍ପ ପୂର୍ବରୁ ଇରାନ ସହିତ ତାଙ୍କ ସମ୍ପର୍କରେ ସାମରିକ ଚାପ, ଆର୍ଥିକ କଟକଣା ଏବଂ ପରବର୍ତ୍ତୀ କାର୍ଯ୍ୟାନୁଷ୍ଠାନର ଧମକ ବ୍ୟବହାର କରିଛନ୍ତି। ତାଙ୍କର ସଦ୍ୟତମ ବୟାନ ସୂଚାଇ ଦେଉଛି ଯେ ଆମେରିକା ପ୍ରଶାସନ ସମସ୍ତ ବିକଳ୍ପ ଖୋଲା ରଖିବାକୁ ଚାହୁଁଛି।

ସାମ୍ବାଦିକ ତାଙ୍କୁ ପଚାରିଥିଲେ ଯେ ଯଦି ଋଷିଆ, ଇରାନ ସହିତ ସମ୍ପର୍କ ହ୍ରାସ ନକରେ ତାହେଲେ ସେ ମସ୍କୋ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ନା ନାହିଁ। ଏହାର ଉତ୍ତର ରାଷ୍ଟ୍ରପତି ଟ୍ରମ୍ପ କହିଥିଲେ, "ଏହା ପରିସ୍ଥିତି ଉପରେ ନିର୍ଭର କରେ। ମୁଁ ବିଶ୍ୱାସ କରେ ଯେ ଋଷିଆ ଏପର୍ଯ୍ୟନ୍ତ ହର୍ମୁଜ୍ ପ୍ରଣାଳୀ ପ୍ରସଙ୍ଗରେ ବହୁତ ଭଲ ବ୍ୟବହାର କରିଛି। ହେଲେ ତଥାପି ସେ ସ୍ପଷ୍ଟ କରିନାହାଁନ୍ତି ଯେ ତାଙ୍କର ମୂଲ୍ୟାଙ୍କନ ଅନ୍ୟ କ୍ଷେତ୍ରରେ ଋଷିଆ-ଇରାନ ମଧ୍ୟରେ ସହଯୋଗ ପାଇଁ ପ୍ରଯୁଜ୍ୟ ନା ନାହିଁ। ସେ ଏହା ମଧ୍ୟ ପ୍ରକାଶ କରିନାହାଁନ୍ତି ଯେ ଋଷିଆ କ'ଣ ପଦକ୍ଷେପ ନେଇଛି କିମ୍ବା ୱାଶିଂଟନ ଏହି ପ୍ରସଙ୍ଗରେ ମସ୍କୋ ପାଖରୁ କୌଣସି ପ୍ରତିଶୃତି ପାଇଛି ନା ନାହିଁ।

ଇରାନ ଉପରେ ଟ୍ରମ୍ପଙ୍କ ବଡ଼ ଦାବି
ରାଷ୍ଟ୍ରପତି ଟ୍ରମ୍ପଙ୍କ ମନ୍ତବ୍ୟ ଏପରି ଏକ ସମୟରେ ଆସିଛି ଯେତେବେଳେ ବାଣିଜ୍ୟ ଜାହାଜର ସୁରକ୍ଷା ଏବଂ ଶକ୍ତି ଯୋଗାଣର ଗତିବିଧିକୁ ନେଇ ଚିନ୍ତା ଜାରି ରହିଛି। ରାଷ୍ଟ୍ରପତି ହର୍ମୁଜ୍ ପ୍ରଣାଳୀ ପୁନର୍ବାର ଖୋଲିବାକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ବର୍ଣ୍ଣନା କରିଛନ୍ତି। ହେଲେ ସଙ୍କଟ ସମ୍ପୂର୍ଣ୍ଣ ଭାବରେ ଶେଷ ହୋଇଛି ବୋଲି କହିବାକୁ ଏଡାଇ ଦେଇଛନ୍ତି। ସେ ଏହା ମଧ୍ୟ ସ୍ପଷ୍ଟ କରିନାହାଁନ୍ତି ଯେ ଆମେରିକା କେଉଁ ସର୍ତ୍ତରେ ଇରାନ ଅଧିକାରୀଙ୍କ ସହ ଆଲୋଚନା କରିବାକୁ ଆଗ୍ରହୀ। ତାଙ୍କ ବୟାନ ସୂଚାଇ ଦେଉଛି ଯେ ଆମେରିକା ପ୍ରଶାସନ ଏହି ସମୟରେ ତୁରନ୍ତ ଆଲୋଚନା ସପକ୍ଷରେ ନାହିଁ। ଟ୍ରମ୍ପ କେଉଁ ଇରାନୀ ସାମରିକ ୟୁନିଟ୍, ଘାଟି କିମ୍ବା କ୍ଷମତା ବିଷୟରେ କହୁଛନ୍ତି ତାହା ସ୍ପଷ୍ଟ କରିନାହାଁନ୍ତି। ସେ କେବଳ ଏତିକି କହିଛନ୍ତି ଯେ ଇରାନ୍ ର ଶକ୍ତି ହ୍ରାସ ପାଇଛି।