ଶେଷ ହେବ ଇସ୍ରାଏଲ-ଗାଜା ଯୁଦ୍ଧ ! ଏନେଇ ବଡ଼ ଘୋଷଣା କରିଛନ୍ତି, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆମେରିକା ରାଷ୍ଟ୍ରପତି ଘୋଷଣା କରିଛନ୍ତି ଯେ ଇସ୍ରାଏଲ ଏବଂ ହମାସ ଆମେରିକା ଦ୍ୱାରା ମଧ୍ୟସ୍ଥତା କରାଯାଇଥିବା ଏକ ଶାନ୍ତି ଚୁକ୍ତିର ପ୍ରଥମ ପର୍ଯ୍ୟାୟରେ ସହମତ ହୋଇଛନ୍ତି । ଏହି ଚୁକ୍ତି ଗାଜାରେ ଚାଲିଥିବା ଯୁଦ୍ଧକୁ ବନ୍ଦ କରିବ । ଗୁରୁତ୍ୱପୂର୍ଣ୍ଣ କଥା ହେଉଛି, ଶତ୍ରୁତା ବନ୍ଦ ହେବା ଫଳରେ ବନ୍ଦୀମାନଙ୍କୁ ମୁକ୍ତ କରାଯିବ । ହମାସ ଗୁରୁବାର ଇଜିପ୍ଟରେ ସ୍ୱାକ୍ଷରିତ ହୋଇଥିବା ଚୁକ୍ତିନାମାରେ ରାଜି ହୋଇଛି ।

ରାଷ୍ଟ୍ରପତି ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଏକ ପୋଷ୍ଟ ସେୟାର କରି କହିଛନ୍ତି, "ବହୁତ ଗର୍ବର ସହ କହୁଛି, ଇସ୍ରାଏଲ ଏବଂ ହମାସ ଉଭୟ ଶାନ୍ତି ଯୋଜନାର ପ୍ରଥମ ପର୍ଯ୍ୟାୟରେ ସ୍ୱାକ୍ଷର କରିଛନ୍ତି। ଏହାର ଅର୍ଥ ହେଉଛି ସମସ୍ତ ବନ୍ଧକଙ୍କୁ ଖୁବ୍ ଶୀଘ୍ର ମୁକ୍ତ କରାଯିବ ଏବଂ ଇସ୍ରାଏଲ ଏକ ଦୃଢ଼, ସ୍ଥାୟୀ ଏବଂ ଚିରସ୍ଥାୟୀ ଶାନ୍ତି ଦିଗରେ ପ୍ରଥମ ପଦକ୍ଷେପ ଭାବରେ ଏକ ସହମତ ରେଖାକୁ ସେମାନଙ୍କର ସୈନ୍ୟ ପ୍ରତ୍ୟାହାର କରିବ । ଏହା ସ୍ଥାୟୀ ଶାନ୍ତି ଦିଗରେ ପ୍ରଥମ ପଦକ୍ଷେପ ।"

ସେ କହିଛନ୍ତି, "ସମସ୍ତ ପକ୍ଷଙ୍କ ସହିତ ନ୍ୟାୟପୂର୍ଣ୍ଣ ବ୍ୟବହାର କରାଯିବ ! ଏହା ଆରବ ଏବଂ ମୁସଲିମ ଓ୍ବାର୍ଲ୍ଡ, ଇସ୍ରାଏଲ, ସମସ୍ତ ପଡ଼ୋଶୀ ଦେଶ ଏବଂ ଆମେରିକା ପାଇଁ ଏକ ବଡ଼ ଦିନ । ଆମେ କାତାର, ମିଶର ଏବଂ ତୁର୍କୀର ମଧ୍ୟସ୍ଥିମାନଙ୍କୁ ଧନ୍ୟବାଦ ଜଣାଉଛୁ ଯେଉଁମାନେ ଏହି ଐତିହାସିକ ସଫଳତାକୁ ସମ୍ଭବ କରିବାରେ ସାହାଯ୍ୟ କରିଥିଲେ ।

ନେତାନ୍ୟାହୁ ଶାନ୍ତି ଚୁକ୍ତିନାମା ଉପରେ କ'ଣ କହିଛନ୍ତି

ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ମଧ୍ୟ ଚୁକ୍ତିନାମା ଉପରେ ପ୍ରତିକ୍ରିୟା ଦେଇଛନ୍ତି । ସୋସିଆଲ ମିଡିଆ ପ୍ଲାଟଫର୍ମ 'X'ରେ ଏକ ପୋଷ୍ଟରେ ସେ କହିଛନ୍ତି, "ଶାନ୍ତି ଚୁକ୍ତିନାମାର ପ୍ରଥମ ପର୍ଯ୍ୟାୟରେ ସହମତ ହେବା ପରେ ସମସ୍ତ ବନ୍ଧକ ଏବେ ଘରକୁ ଫେରିବେ। ଏହା ଇସ୍ରାଏଲ ପାଇଁ ଏକ କୂଟନୈତିକ ସଫଳତା ଏବଂ ନୈତିକ ବିଜୟର ଦିନ । ଆମର ସମସ୍ତ ବନ୍ଧକଙ୍କୁ ଫେରାଇ ନ ଆସିବା ପର୍ଯ୍ୟନ୍ତ ଆମେ ବିଶ୍ରାମ ନେବୁ ନାହିଁ ।"

With the approval of the first phase of the plan, all our hostages will be brought home. This is a diplomatic success and a national and moral victory for the State of Israel.

From the beginning, I made it clear: we will not rest until all our hostages return and all our goals…

— Benjamin Netanyahu - בנימין נתניהו (@netanyahu) October 8, 2025

ଏହା ଉଲ୍ଲେଖନୀୟ ଯେ ଇସ୍ରାଏଲ ଏବଂ ହମାସ ମାସ ମାସ ଧରି ଯୁଦ୍ଧରେ ଅଛନ୍ତି, କିନ୍ତୁ ବର୍ତ୍ତମାନ ଟ୍ରମ୍ପଙ୍କ ପ୍ରୟାସ ଯୋଗୁଁ ଶାନ୍ତି ଆଶା କରାଯାଉଛି। ଏହି ଶାନ୍ତି ଚୁକ୍ତିନାମାରେ ଆମେରିକା ସହିତ, ମିଶର ଏବଂ କାତାର ଏକ ପ୍ରମୁଖ ଭୂମିକା ଗ୍ରହଣ କରିଥିଲେ ।

ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗାଜା ପିସ୍ ପ୍ଲାନକୁ ନେଇ ହମାସକୁ ନୂଆ ଅଲଟିମେଟମ ଦେଇଥିଲେ। ଟ୍ରମ୍ପଙ୍କ 'ଗାଜା ଚୁକ୍ତି'କୁ ସମର୍ଥନ କରିଥିଲା ହମାସ । ପ୍ରାୟ ସମସ୍ତ ପ୍ରମୁଖ ସର୍ତ୍ତ ଗ୍ରହଣ କରିବାକୁ ରାଜି ହୋଇଥିଲା ହାମାସ। ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ପ୍ରଦତ୍ତ ଶାନ୍ତି ଯୋଜନା ଅନୁଯାୟୀ ମୃତ କିମ୍ବା ଜୀବିତ ସମସ୍ତ ଇସ୍ରାଏଲୀ ବନ୍ଧକଙ୍କୁ ମୁକ୍ତ କରିବାକୁ ପ୍ରସ୍ତୁତ । ଗାଜାରେ ସଂଘର୍ଷ ସମାପ୍ତ କରିବାରେ ଏହି ଚୁକ୍ତି ଗୁରୁତ୍ୱପୂର୍ଣ୍ଣ ପ୍ରମାଣିତ ହୋଇପାରେ।