ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ହୋଇଛି କ'ଣ ? କାହିଁକି ବାରମ୍ବାର ତାଙ୍କ ହାତକୁ ଲୁଚାଉଛନ୍ତି । କିଛି ବଡ଼ ରୋଗରେ ପୀଡ଼ିତ ଅଛନ୍ତି କି ଟ୍ରମ୍ପ ? ଏବେ ଆମେରିକା ରାଷ୍ଟ୍ରପତି ଟାରିଫ୍ ଓ୍ବାର ପାଇଁ ନୁହେଁ ବରଂ ତାଙ୍କ ହାତ ପାଇଁ ବେଶ୍ ଚର୍ଚ୍ଚାରେ ଅଛନ୍ତି । ସୋମବାର ଦିନ ହ୍ୱାଇଟ୍ ହାଉସ୍ ଦକ୍ଷିଣ କୋରିଆ ରାଷ୍ଟ୍ରପତି ଲି ଜାଏ ମ୍ୟୁଙ୍ଗଙ୍କ ସହ ସାକ୍ଷାତ ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଡାହାଣ ହାତରେ ଏକ ଗଭୀର କଳା-ନୀଳ ଚିହ୍ନ ଦେଖାଯାଇଥିଲା । ଯାହା ଲୋକଙ୍କ ଦୃଷ୍ଟି ଆକର୍ଷଣ କରିଥିଲା । ଏହି ଚିହ୍ନ ଦେଖି ଲାଗୁଥିଲା ସତେ ଯେମିତି ଟ୍ରମ୍ପଙ୍କ ହାତରେ ଆଘାତ ଲାଗିଛି ।

ଲି ଜାଏ ମ୍ୟୁଙ୍ଗଙ୍କ ସହ ସାକ୍ଷାତ ସମୟରେ, ଦି ଓଭାଲ୍ ଅଫିସ୍ ରେଜୋଲ୍ୟୁଟ୍ ଡେସ୍କରେ ବସିଥିବା ଟ୍ରମ୍ପଙ୍କୁ ତାଙ୍କ ଡାହାଣ ହାତକୁ ବାମ ହାତ ଦ୍ୱାରା ବାରମ୍ବାର ଘୋଡ଼ାଇ ଦେବାକୁ ଚେଷ୍ଟା କରୁଥିବା ଦେଖାଯାଇଥିଲା । ଯାହା ସ୍ପଷ୍ଟ ଭାବରେ ଦର୍ଶାଉଥିଲା ଯେ ସେ ତାଙ୍କ ଡାହାଣ ହାତର ଆଘାତ ଚିହ୍ନକୁ ଲୁଚାଇବାକୁ ଚେଷ୍ଟା କରୁଥିଲେ।

ସେହିପରି କିଛି ଦିନ ପୂର୍ବେ, ଏକ ସାର୍ବଜନୀନ କାର୍ଯ୍ୟକ୍ରମରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ହାତରେ ସମାନ ଚିହ୍ନ ଦେଖାଯାଇଥିଲା । ଯାହା ତାଙ୍କ ସ୍ୱାସ୍ଥ୍ୟ ବିଷୟରେ ଆଲୋଚନାକୁ ତ୍ୱରାନ୍ୱିତ କରିଥିଲା । ଏହି ସମ୍ପର୍କରେ, ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ କହିଥିଲେ ଯେ ରାଷ୍ଟ୍ରପତିଙ୍କ ହାତରେ ଏହି ଚିହ୍ନ ବାରମ୍ବାର ହାତ ମିଳାଇବା ଏବଂ ନିୟମିତ ଆସ୍ପିରିନ୍ ବ୍ୟବହାର ଯୋଗୁଁ ଏମିତି ହୋଇଛି।

ଚଳିତ ବର୍ଷ ଜୁଲାଇ ମାସରେ, ଟ୍ରମ୍ପଙ୍କ ହାତରେ ଦେଖାଯାଇଥିବା ଆଘାତ ଚିହ୍ନ ଉପରେ, ହ୍ୱାଇଟ୍ ହାଉସ୍ ରାଷ୍ଟ୍ରପତିଙ୍କ ବ୍ୟକ୍ତିଗତ ଚିକିତ୍ସକ ଡକ୍ଟର ସିଆନ୍ ବାର୍ବାବେଲାଙ୍କ ଏକ ଚିଠି ପ୍ରକାଶ କରିଥିଲା, ଯେଉଁଥିରେ କୁହାଯାଇଥିଲା ଯେ ଏହି ଚିହ୍ନଗୁଡ଼ିକ 'ବାରମ୍ବାର ହାତ ମିଳାଇବା ଏବଂ ହୃଦରୋଗ ରୋକିବା ପାଇଁ ନିଆଯାଇଥିବା ଆସ୍ପିରିନ୍ ଔଷଧ' ଯୋଗୁଁ ହୋଇଛି। ଡକ୍ଟର ବାର୍ବାବେଲା ନିଶ୍ଚିତ କରିଛନ୍ତି ଯେ ଟ୍ରମ୍ପଙ୍କର କ୍ରନିକ୍ ଶିରା ଅକ୍ଷମତା (CVI) ଅଛି, ଯାହାକୁ ସେ ୭୦ ବର୍ଷରୁ ଅଧିକ ବୟସ୍କ ଲୋକଙ୍କ ମଧ୍ୟରେ ଏକ ସାଧାରଣ ଚିକିତ୍ସା ବୋଲି କହିଥିଲେ ।

ତେବେ ଏହା ପ୍ରଥମ ଥର ନୁହେଁ ଯେତେବେଳେ ଟ୍ରମ୍ପଙ୍କ ହାତ ଦୃଷ୍ଟି ଆକର୍ଷଣ କରିଛି। ଚଳିତ ବର୍ଷ ଫେବୃଆରୀରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରନଙ୍କ ସହ ସାକ୍ଷାତ ସମୟରେ ତାଙ୍କ ହାତରେ ମଧ୍ୟ ସମାନ ଚିହ୍ନ ଦେଖାଯାଇଥିଲା ।