Donald Trump / 'ପ୍ରତି ମାସରେ ଗୋଟିଏ ଯୁଦ୍ଧ ବନ୍ଧ କରିଛି, ଏବେ ପାକ୍‌-ଆଫଗାନିସ୍ତାନ ବିବାଦ ମଧ୍ୟ ଶେଷ କରିବି'

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରବିବାର ଦାବି କରିଛନ୍ତି ଯେ ସେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଚାଲିଥିବା ଉତ୍ତେଜନାକୁ ବହୁତ ଶୀଘ୍ର ସମାପ୍ତ କରିପାରିବେ । ମାଲେସିଆରେ ଅନୁଷ୍ଠିତ କାମ୍ବୋଡିଆ-ଥାଇଲାଣ୍ଡ ଶାନ୍ତି ଚୁକ୍ତିନାମା ସ୍ୱାକ୍ଷର ସମାରୋହରେ ଟ୍ରମ୍ପ ଏହି ବୟାନ ଦେଇଛନ୍ତି ।
ଟ୍ରମ୍ପ କହିଛନ୍ତି, "ଆପଣମାନେ ଜାଣନ୍ତି ଯେ, ମୋ ସରକାର ମାତ୍ର ଆଠ ମାସରେ ଆଠଟି ଯୁଦ୍ଧ ସମାପ୍ତ କରିଛି । ଆମେ ପ୍ରତି ମାସରେ ଗୋଟିଏ ଯୁଦ୍ଧ ସମାପ୍ତ କରୁଛୁ । ଏବେ କେବଳ ଗୋଟିଏ ବାକି ଅଛି - ପାକିସ୍ତାନ-ଆଫଗାନିସ୍ତାନ ବିବାଦ । ଆଉ ମୁଁ ଏହାକୁ ବହୁତ ଶୀଘ୍ର ସମାଧାନ କରିବି ।" ସେ କହିଛନ୍ତି ଯେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ନିକଟରେ ହିଁ ବିବାଦ ଦେଖିବାକୁ ମିଳିଛି । କିନ୍ତୁ ମୁଁ ଉଭୟ ଦେଶର ନେତାମାନଙ୍କୁ ଜାଣିଛି, ଏହି ବିବାଦ ମଧ୍ୟ ଶୀଘ୍ର ସମାଧାନ ହେବ ବୋଲି ଟ୍ରମ୍ପ କହିଛନ୍ତି ।

ନିଜ ଭାଷଣ ଅନ୍ତରେ ଟ୍ରମ୍ପ ଦାବି କରିଛନ୍ତି ଯେ ତାଙ୍କ ପ୍ରଶାସନ ଯାହା କରିଛନ୍ତି ତାହା ଆମେରିକାର କୌଣସି ରାଷ୍ଟ୍ରପତି କରିନାହାନ୍ତି । ସେ କହିଛନ୍ତି, "ଅନ୍ୟ ରାଷ୍ଟ୍ରପତି ଯୁଦ୍ଧ ଆରମ୍ଭ କରନ୍ତି, ଆମେ ଏହାକୁ ଶେଷ କରୁ।

ପାକିସ୍ତାନ-ଆଫଗାନିସ୍ତାନରେ ଉତ୍ତେଜନା ବୃଦ୍ଧି ପାଇଛି

ସାମ୍ପ୍ରତିକ ଦିନରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଡୁରାଣ୍ଡ ରେଖାରେ ସଂଘର୍ଷ ବୃଦ୍ଧି ପାଇଛି । ଏହି ୨୬୧୧ କିଲୋମିଟର ସୀମା ବ୍ରିଟିଶ ଶାସନ ସମୟରେ ଟଣାଯାଇଥିଲା । ଯାହାକୁ ଆଫଗାନିସ୍ତାନ କେବେ ଆନୁଷ୍ଠାନିକ ଭାବରେ ସ୍ୱୀକୃତି ଦେଇନାହିଁ । ରିପୋର୍ଟ ଅନୁଯାୟୀ, ପାକିସ୍ତାନ ସମ୍ପ୍ରତି ଆଫଗାନିସ୍ତାନ ଭିତରେ ଆତଙ୍କବାଦୀ ଆଡ୍ଡା ଉପରେ ଡ୍ରୋନ୍ ଏବଂ ଫାଇଟର୍‌ ଜେଟ୍‌ସ ମାଧ୍ୟରେ ଆକ୍ରମଣ କରିଛି । ସେହିପରି ତାଲିବାନ ଯୋଦ୍ଧାମାନେ ପାକିସ୍ତାନର ଅନେକ ଚେକ୍‌ ପୋଷ୍ଟ ମଧ୍ୟ କବ୍‌ଜା କରିଛନ୍ତି ।

କାମ୍ବୋଡିଆ-ଥାଇଲାଣ୍ଡ ଶାନ୍ତି ଚୁକ୍ତିନାମା

କାମ୍ବୋଡିଆ ଏବଂ ଥାଇଲାଣ୍ଡ ମଧ୍ୟରେ ଏକ ଐତିହାସିକ ଶାନ୍ତି ଚୁକ୍ତିନାମା ସ୍ୱାକ୍ଷରିତ ହେବା ଅବସରରେ ଟ୍ରମ୍ପ୍ ଭାଷଣ ଦେଉଥିଲେ । ଏହି ସମୟରେ ସେ କହିଥିଲେ, "ଆମେ ତାହା ହାସଲ କରିଛୁ ଯାହା ଅନେକ ଲୋକ ଅସମ୍ଭବ ବୋଲି କହିଥିଲେ । ଏହି ଏକକ ଚୁକ୍ତିନାମା ଲକ୍ଷ ଲକ୍ଷ ଜୀବନ ବଞ୍ଚାଇଛି । ଏହା ଦକ୍ଷିଣ-ପୂର୍ବ ଏସିଆର ଲୋକଙ୍କ ପାଇଁ ଏକ ଐତିହାସିକ ଦିନ।" ଟ୍ରମ୍ପ୍ ଉଭୟ ଦେଶର ନେତାଙ୍କ "ସାହସିକ ପଦକ୍ଷେପ"କୁ ପ୍ରଶଂସା କରିଥିଲେ ଏବଂ କହିଥିଲେ ଯେ ଆମେରିକା ଏହି ଚୁକ୍ତିନାମାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା ।

"ଏକ ଫୋନ୍ କଲ୍ ସହିତ ୩୨ ବର୍ଷ ପୁରୁଣା ସଂଘର୍ଷ ବନ୍ଦ ହୋଇଥିଲା"

ଟ୍ରମ୍ପ୍ କହିଥିଲେ ଯେ ଏହି ବର୍ଷ ଆରମ୍ଭରେ, ଦୁଇ ଦେଶ ମଧ୍ୟରେ ସୀମା ସଂଘର୍ଷ ଘଟିଥିଲା । କିନ୍ତୁ ଆମେରିକାର ହସ୍ତକ୍ଷେପ ପରେ ଏହି ହିଂସା ବନ୍ଦ ହୋଇଥିଲା । ସେ କହିଥିଲେ, "ମୁଁ ସେତେବେଳେ ସ୍କଟଲାଣ୍ଡରେ ଥିଲି ଏବଂ ସାରା ଦିନ ଫୋନ୍‌ରେ ଉଭୟ ନେତାଙ୍କ ସହ କଥା ହୋଇଥିଲି । ସବୁକିଛି କେତେ ଶୀଘ୍ର ସମାଧାନ ହୋଇଗଲା ତାହା ଅବିଶ୍ୱସନୀୟ ଥିଲା ।" ଶାନ୍ତି ଚୁକ୍ତିନାମା ସହିତ, ଟ୍ରମ୍ପ୍ ମଧ୍ୟ ଘୋଷଣା କରିଥିଲେ ଯେ ଆମେରିକା କାମ୍ବୋଡିଆ ସହିତ ଏକ ବାଣିଜ୍ୟ ଚୁକ୍ତିନାମା ଏବଂ ଥାଇଲାଣ୍ଡ ସହିତ ଏକ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ଚୁକ୍ତିନାମା ସ୍ୱାକ୍ଷର କରିଛି । ସେ କହିଥିଲେ ଯେ ଯେପର୍ଯ୍ୟନ୍ତ ସେମାନେ ଶାନ୍ତି ବଜାୟ ରଖିବେ ସେପର୍ଯ୍ୟନ୍ତ ଆମେରିକା ଉଭୟ ଦେଶ ସହିତ ଦୃଢ଼ ବାଣିଜ୍ୟ ସମ୍ପର୍କ ବଜାୟ ରଖିବ ।