Argus News - ପୁଣି ଧମକ ଦେଲେ ଟ୍ରମ୍ପ; କହିଲେ, ଆଜି ରାତିରେ ଶେଷ ହୋଇଯିବ ଗୋଟିଏ ସଭ୍ୟତା

ଅଶାନ୍ତ ମଧ୍ୟପ୍ରାଚ୍ୟ । ଗତ ଛଅ ସପ୍ତାହ ଧରି ଜାରି ରହିଛି ଇରାନ ଯୁଦ୍ଧ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ୪୮ ଘଣ୍ଟାର ଅଲଟିମେଟମ୍ ଦେଇଛନ୍ତି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଦିଆଯାଇଥିବା ୪୮ ଘଣ୍ଟାର ସମୟସୀମା ବୁଧବାର ଭୋର ୫ଟା ୩୦ରେ ଶେଷ ହେଉଛି । ଆମେରିକା ରାଷ୍ଟ୍ରପତି ଟ୍ରମ୍ପ ସ୍ପଷ୍ଟ ଚେତାବନୀ ଦେଇ କହିଛନ୍ତି ଯେ, ଯଦି ଇରାନ ହର୍ମୁଜ ପ୍ରଣାଳୀକୁ ତୁରନ୍ତ ନ ଖୋଲେ, ତେବେ ଆମେରିକା ଇରାନର ସମସ୍ତ ଜାତୀୟ ଭିତ୍ତିଭୂମିକୁ ଧ୍ୱଂସ କରିଦେବ। ଗୋଟିଏ ରାତିରେ ଇରାନ ଧ୍ବଂସ ହୋଇଯିବ । କିନ୍ତୁ ଡେଡ୍‌ଲାଇନ୍‌ ଶେଷ ହେବା ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଚେତାବନୀ ଦେଇଛନ୍ତି ।


ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍‌ ସୋସିଆଲରେ ସେ ଲେଖିଛନ୍ତି, ଆଜି ରାତିରେ ଏକ ସମ୍ପୂର୍ଣ୍ଣ ସଭ୍ୟତାର ପତନ ଘଟିବ, ଯାହା ବୋଧହୁଏ ଆଉ କେବେ ଫେରିବ ନାହିଁ । ମୁଁ ଚାହୁଁନି ଯେ ଏମିତି ହେଉ, କିନ୍ତୁ ବୋଧହୁଏ ଏହା ହିଁ ହେବାକୁ ଯାଉଛି । ତଥାପି, ବର୍ତ୍ତମାନ ଯେହେତୁ ଶାସନ ବ୍ୟବସ୍ଥାରେ ସମ୍ପୂର୍ଣ୍ଣ ପରିବର୍ତ୍ତନ ଆସିଛି, ଯେଉଁଠାରେ ଭିନ୍ନ, ଅଧିକ ବୁଦ୍ଧିମାନ ଏବଂ କମ୍‌ କଠୋରପନ୍ଥୀ ମାନସିକତାର ଶାସକ ରହିବେ, ତେବେ ହୁଏତ କିଛି କ୍ରାନ୍ତିକାରୀ ଓ ଚମତ୍କାର ଘଟଣା ଘଟିପାରେ, କିଏ ଜାଣେ ? ବିଶ୍ୱର ଦୀର୍ଘ ତଥା ଜଟିଳ ଇତିହାସର ସବୁଠାରୁ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ମଧ୍ୟରୁ ଅନ୍ୟତମ ହେଉଛି ଆଜି ରାତି, ଯାହା ଆମେ ଜାଣିବାକୁ ପାଇବା । ୪୭ ବର୍ଷର ଜବରଦସ୍ତି ଆଦାୟ, ଦୁର୍ନୀତି ଏବଂ ମୃତ୍ୟୁର ଶେଷରେ ଅନ୍ତ ଘଟିବ ବୋଲି ଟ୍ରମ୍ପ ଧମକ ଦେଇଛନ୍ତି ।