ଋଷ ଏବଂ ୟୁକ୍ରେନ ମଧ୍ୟରେ ଉତ୍ତେଜନା କମିବାର ନାଁ ନେଉନାହିଁ । ଯଦିଓ ଦୁଇ ଦେଶ ମଧ୍ୟରେ ଯୁଦ୍ଧ ରୋକିବା ପାଇଁ ଏକ ଶାନ୍ତି ଚୁକ୍ତିନାମା ପାଇଁ ବିଭିନ୍ନ ସ୍ତରରେ ଆଲୋଚନା ଜାରି ରହିଛି । କିନ୍ତୁ ଏସବୁ ମଧ୍ୟରେ ମଙ୍ଗଳବାର ଋଷ ୟୁକ୍ରେନ୍‌ର ଶକ୍ତି ଭିତ୍ତିଭୂମି ଉପରେ ପୁଣି ଏକ ବଡ଼ ଆକ୍ରମଣ କରିଛି । ଏହି ଆକ୍ରମଣରେ ଋଷ ୭୦ରୁ ଅଧିକ କ୍ଷେପଣାସ୍ତ୍ର ଏବଂ ୪୫୦ ଡ୍ରୋନ୍‌ ବ୍ୟବହାର କରିଥିବା ୟୁକ୍ରେନ ରାଷ୍ଟ୍ରପତି ଜେଲେନସ୍କି ଦାବି କରିଛନ୍ତି ।

ସେ କହିଛନ୍ତି ଯେ କିଭରେ ୧ ହଜାରରୁ ଅଧିକ ଆବାସିକ କୋଠାରେ ହିଟିଂ ବନ୍ଦ କରିଦିଆଯାଇଛି । ଯାହାଫଳରେ ତାପମାତ୍ରା ମାଇନସ ୨୦ ଡିଗ୍ରୀ ସେଲସିୟସକୁ ହ୍ରାସ ପାଇଛି । ଆକ୍ରମଣ ପରେ କ୍ଷତିଗ୍ରସ୍ତ ଅଞ୍ଚଳଗୁଡ଼ିକର ମରାମତି ଚାଲିଛି । ସେ ଏହି ଆକ୍ରମଣକୁ ଶକ୍ତି ଭିତ୍ତିଭୂମି ଉପରେ ଏକ ଜାଣିଶୁଣି ଆକ୍ରମଣ ବୋଲି ବର୍ଣ୍ଣନା କରିଛନ୍ତି ଏବଂ ଦ୍ୱିତୀୟ ବିଶ୍ୱଯୁଦ୍ଧର ଏକ ପ୍ରସିଦ୍ଧ ସ୍ମାରକୀ ମାତୃଭୂମି ସ୍ମାରକୀକୁ କ୍ଷତି ପହଞ୍ଚାଇଥିବା ଅଭିଯୋଗ କରିଛନ୍ତି ।

ଋଷ ଅନେକ ଡ୍ରୋନ ସମେତ ୭୦ରୁ ଅଧିକ କ୍ଷେପଣାସ୍ତ୍ର ନିକ୍ଷେପ କରିଛି

ଜେଲେନସ୍କି ସାମାଜିକ ଗଣମାଧ୍ୟମରେ ଏକ ଲମ୍ବା ପୋଷ୍ଟ ମଧ୍ୟ ସେୟାର କରି କହିଛନ୍ତି ଯେ ଋଷ ବହୁ ସଂଖ୍ୟକ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ଅନ୍ୟାନ୍ୟ କ୍ଷେପଣାସ୍ତ୍ର ବ୍ୟବହାର କରିଛି । ସେମାନଙ୍କ ସଂଖ୍ୟା ୭୦ରୁ ଅଧିକ ହେବ ବୋଲି ଆକଳନ କରାଯାଉଛି । ଏହା ସହିତ ୪୫୦ ଡ୍ରୋନ୍‌ ବ୍ୟବହାର କରାଯାଇଛି ।

ଋଷ ଶୀତର ସୁଯୋଗ ନେଉଥିବା ଅଭିଯୋଗ କରି ଏହି ଅଞ୍ଚଳଗୁଡ଼ିକୁ ଟାର୍ଗେଟ କରିଛି

ସେ କହିଛନ୍ତି ଯେ ଋଷ ସୁମି ଏବଂ ଖାରକିଭ ଅଞ୍ଚଳ, କିଭ୍, ଡ୍ନିପ୍ରୋ, ଓଡେସା ଏବଂ ଭିନିତ୍ସିଆ ଅଞ୍ଚଳକୁ ଟାର୍ଗେଟ କରିଥିଲା। " ଏହି ଆକ୍ରମଣ ଜାଣିଶୁଣି ଆମର ଶକ୍ତି ଭିତ୍ତିଭୂମି ଉପରେ କେନ୍ଦ୍ରିତ ଥିଲା । ଏହି ଆକ୍ରମଣରେ ନଅ ଜଣ ଆହତ ହୋଇଥିଲେ। ଆବାସିକ କୋଠା ମଧ୍ୟ କ୍ଷତିଗ୍ରସ୍ତ ହୋଇଥିଲା।" ସେ ଋଷକୁ ଶୀତର ସୁଯୋଗ ନେଉଥିବା ଅଭିଯୋଗ କରିଥିଲେ ।

ୟୁକ୍ରେନର ସାଂସ୍କୃତିକ ମନ୍ତ୍ରୀ କ'ଣ କହିଥିଲେ?

ୟୁକ୍ରେନର ସାଂସ୍କୃତିକ ମନ୍ତ୍ରୀ କହିଛନ୍ତି ଯେ ରାତିସାରା ଆକ୍ରମଣ କିଭ୍‌ର ଦ୍ୱିତୀୟ ବିଶ୍ୱଯୁଦ୍ଧର ଏକ ପ୍ରସିଦ୍ଧ କୋଠା ମାତୃଭୂମି ସ୍ମାରକୀକୁ କ୍ଷତି ପହଞ୍ଚାଇଛି । ବେରେଝନା ସୋସିଆଲ ମିଡିଆରେ ଲେଖିଛନ୍ତି ଯେ ଏହା ପ୍ରତୀକାତ୍ମକ ଏବଂ ନିନ୍ଦନୀୟ । "ଆକ୍ରମଣକାରୀ ଦେଶ ୨୦ ଶତାବ୍ଦୀର ବିନାଶକାରୀ ଯୁଦ୍ଧ ବିରୁଦ୍ଧରେ ନିର୍ମିତ ସ୍ମାରକୀ କୋଠାଗୁଡ଼ିକୁ ଟାର୍ଗେଟ କରୁଛି । ଏହା ୨୧ ଶତାବ୍ଦୀରେ ଏହାର ଅପରାଧ ପୁନରାବୃତ୍ତି କରୁଛି।"