Aviation News / ଯାତ୍ରୀଙ୍କ ଫୋନ୍ ଦେଖିଲେ ଏୟାରହୋଷ୍ଟେସ୍; ତୁରନ୍ତ ଲ୍ୟାଣ୍ଡ ହେଲା ବିମାନ

ଆମେରିକାର ଲସ୍‌ ଭେଗାସ୍‌ରୁ ୟୁନାଇଟେଡ୍‌ ଏୟାରଲାଇନ୍ସର ବିମାନ ୧୬୮୧ ନ୍ୟୁ ଜର୍ସି ଯାଉଥିଲା । ହଠାତ୍ ବିମାନକୁ ଲସ୍ ଭେଗାସ୍ ଫେରିବାକୁ ପଡ଼ିଲା । କାରଣ ଏୟାରହୋଷ୍ଟେସ୍‌ ଜଣକ ବିମାନରେ ଯାତ୍ରା କରୁଥିବା ଜଣେ ଯାତ୍ରୀଙ୍କ ମୋବାଇଲରେ ଏମିତି କିଛି ଦେଖିଥିଲେ, ଯାହାପରେ ଆକାଶରେ ବିମାନ ଉଡ଼ିବା ଆଦୌ ସମ୍ଭବ ନଥିଲା । ଫଳରେ ତୁରନ୍ତ ବିମାନକୁ ଲସ୍ ଭେଗାସ୍‌କୁ ଫେରିବାକୁ ପଡ଼ିଥିଲା ଏବଂ ବିମାନ ଅବତରଣ ପରେ ଉକ୍ତ ଯାତ୍ରୀଙ୍କୁ ଗିରଫ କରାଯାଇଥିଲା ।

• ଯାତ୍ରୀଙ୍କ ଫୋନରେ କଣ ଦେଖିଲେ ଏୟାରହୋଷ୍ଟେସ ?

ଫ୍ଲାଇଟ୍ ଆଟେଡାଣ୍ଟ ଜଣକ ଯାତ୍ରୀଙ୍କ ମୋବାଇଲରେ ଏକ ବିପଦପୂର୍ଣ୍ଣ ମେସେଜ ଦେଖିଥିଲେ । ଉକ୍ତ ଯାତ୍ରୀ ଜଣକ ଏୟାରକ୍ରାଫ୍ଟ ନିୟନ୍ତ୍ରଣକୁ ନିଜ ହାତକୁ ନେବା ପାଇଁ ଟେକ୍ସଟ୍ ମେସେଜ୍ ପଠାଉଥିଲେ । ଏହା ସମ୍ପର୍କରେ ଏୟାର ହୋଷ୍ଟେସ୍ ଜଣକ ତୁରନ୍ତ ପାଇଲଟଙ୍କୁ ସୂଚିତ କରାଇଥିଲେ । ଏହାପରେ ପାଇଲଟ୍ ଏୟାର ଟ୍ରାଫିକ୍ କଣ୍ଟ୍ରୋଲରଙ୍କୁ ଏ ସମ୍ପର୍କରେ କହିଥିଲେ । ଯାତ୍ରୀ ଜଣକ ବିମାନକୁ ହାଇଜାକ୍ କରିବା ନେଇ ଟେକ୍ସ୍ଟ୍ ମେସେଜ୍ କରୁଥିବା ଏୟାରହୋଷ୍ଟେସ୍ ଦେଖିଥିବା ନେଇ ସେ କହିଥିଲେ ।

ଏହାପରେ ତୁରନ୍ତ ବିମାନଟି ନିଜ ଦିଗ ବଦଳାଇଥିଲା ଓ ପୁଣିଥରେ ଲସ୍ ଭେଗାସ୍‌ରେ ଅବତରଣ କରିଥିଲେ । ଯେତେବେଳେ ଯାତ୍ରୀମାନେ ଲସ୍ ଭେଗାସ୍‌ରେ ପହଞ୍ଚିଥିଲେ, ସେତେବେଳେ ସେମାନେ ଭୟଭୀତ ହୋଇପଡିଥିଲେ । ବିମାନବନ୍ଦରରେ ଏକ ଅଜବ ସ୍ଥିତି ଉପୁଜିଥିଲା । ଏହି ବିମାନଟି ଅକ୍ଟୋବର ୧୪ ତାରିଖ ଲୋକାଲ୍ ଟାଇମ୍ ଅନୁସାରେ ରାତି ପ୍ରାୟ ୧୧.୦୫ଟାରେ ଲସ୍ ଭେଗାସ୍‌ର ହ୍ୟାରି ରିଡ୍ ଅନ୍ତର୍ଜାତୀୟ ଏୟାରପୋର୍ଟକୁ ସୁରକ୍ଷିତ ଭାବେ ଫେରିଆସିଥିଲା ।

• ଅଳ୍ପକେ ବର୍ତ୍ତିଗଲା ବଡ଼ ଅଘଟଣ

ଲସ୍ ଭେଗାସ୍ ଫେରିବା ପରେ, ସମସ୍ତ ଯାତ୍ରୀଙ୍କୁ ବିମାନରୁ ଓହ୍ଲାଇ ଦିଆଯାଇଥିଲା ଏବଂ ସେମାନଙ୍କୁ ସୁରକ୍ଷା ଯାଞ୍ଚ ମଧ୍ୟ କରିବାକୁ ପଡିଥିଲା । ଅଧିକାରୀମାନେ କହିଛନ୍ତି ଯେ ଏହି ଘଟଣାରେ କେହି ଆହତ ହୋଇ ନାହାଁନ୍ତି । ଲସ୍ ଭେଗାସ୍‌ର ହ୍ୟାରି ରିଡ୍ ଅନ୍ତର୍ଜାତୀୟ ବିମାନବନ୍ଦରରୁ ନ୍ୟୁ ଜର୍ସିର ନ୍ୟୁଆର୍କ ଲିବର୍ଟି ଅନ୍ତର୍ଜାତୀୟ ବିମାନବନ୍ଦର ପାଇଁ ଯାତ୍ରା କରିଥିବା ବିମାନଟି ଜଣେ କ୍ରୁ ସଦସ୍ୟଙ୍କ ଦ୍ୱାରା ସତର୍କ ସୂଚନା ଜାରି କରିବା ପରେ ଲସ୍ ଭେଗାସ୍ ଫେରି ଆସିଥିଲା ।

ପଢନ୍ତୁ ଏହି ଖବର: ସାଉଦି ଆରବ ଯାତ୍ରୀଙ୍କୁ ବଡ଼ ଝଟକା, ଏୟାର ଇଣ୍ଡିଆ ଓ ଇଣ୍ଡିଗୋ ଉଡ଼ାଣ ବାତିଲ୍

• ସମ୍ପୃକ୍ତ ଯାତ୍ରୀ ଗିରଫ

ବିମାନଟିରେ ୧୫୦ ଜଣ ଯାତ୍ରୀ ଏବଂ ୬ ଜଣ କ୍ରୁ ସଦସ୍ୟ ଥିଲେ । ଅପହରଣ ଧମକ ପରେ ବିମାନଟି ୟୁ-ଟର୍ଣ୍ଣ ନେବାକୁ ବାଧ୍ୟ ହୋଇଥିଲା, ଯାହା ଫଳରେ ଜଣେ ବ୍ୟକ୍ତିଙ୍କୁ ଗିରଫ କରାଯାଇଥିଲା । ୨୫ ବର୍ଷୀୟ ଡଣ୍ଟେ ମିଲନେଙ୍କୁ ଧମକ ଦେବା କିମ୍ବା ଆତଙ୍କବାଦୀ କାର୍ଯ୍ୟ ବିଷୟରେ ମିଥ୍ୟା ସୂଚନା ପ୍ରଦାନ କରିବା ସନ୍ଦେହରେ ଅଟକ ରଖାଯାଇଥିଲା । ପରଦିନ ଅନ୍ୟ ଏକ ବିମାନରେ ଯାତ୍ରୀମାନେ ସେଠାରୁ ନିଜ ଗନ୍ତବ୍ୟସ୍ଥଳକୁ ଯାତ୍ରା କରିଥିଲେ ।