Argus News - ଯୁଦ୍ଧ ନିଆଁ ଲିଭାଇବାକୁ ଇସଲାମାବାଦରେ ପ୍ରୟାସ, ଆମେରିକା ଉପରେ ନାହିଁ ଇରାନର ବିଶ୍ବାସ

ପଶ୍ଚିମ ଏସିଆରେ ଥମିବ କି ଯୁଦ୍ଧର ନିଆଁ ? ମଧ୍ୟପ୍ରାଚ୍ୟରେ ସ୍ଥାୟୀ ଶାନ୍ତି ଫେରାଇବା ପାଇଁ ଏବେ ଇସଲାମାବାଦରେ ଏକାଠି ହୋଇଛନ୍ତି ବିଶ୍ୱର ଦୁଇ ଶକ୍ତିଶାଳୀ ପ୍ରତିପକ୍ଷ ଆମେରିକା ଓ ଇରାନ । ଆମେରିକା ଉପରାଷ୍ଟ୍ରପତି ଜେଡି ଭାନ୍ସଙ୍କ ନେତୃତ୍ୱରେ ଏହି ହାଇଭୋଲଟେଜ୍ ଶାନ୍ତି ଆଲୋଚନା ଉପରେ ଏବେ ସାରା ବିଶ୍ୱର ନଜର । ଗୋଟିଏ ପଟେ ଆମେରିକାର ୧୫ ସୂତ୍ରୀ ଖସଡ଼ା ଓ ଅନ୍ୟପଟେ ଇରାନର ୧୦ ସୂତ୍ରୀ ସର୍ତ୍ତ । ତେବେ ପରସ୍ପର ପ୍ରତି ଅବିଶ୍ୱାସ ଏବଂ ହର୍ମୁଜ ପ୍ରଣାଳୀକୁ ନେଇ ଜାରି ରହିଥିବା ବିବାଦ ଭିତରେ, ଏହି 'ପିସ୍ ଟକ୍' କେତେ ସଫଳ ହେବ, ତାହା ବଡ଼ ପ୍ରଶ୍ନ ।

ଗୋଟିଏ ପଟେ ଶାନ୍ତି ଆଲୋଚନା ପାଇଁ ଡାକୁଛନ୍ତି ତ ଅନ୍ୟପଟେ ଶୁଣାଉଛନ୍ତି ଚରମବାଣୀ । ଇରାନକୁ ନେଇ ଆମେରିକା ରାଷ୍ଟ୍ରପତିଙ୍କ ଆଭିମୁଖ୍ୟ ଉପରେ ପ୍ରଶ୍ନବାଚୀ ଛିଡ଼ା କଲାଣି । ମଧ୍ୟପ୍ରାଚ୍ୟରେ ଲାଗି ରହିଥିବା ସ୍ଥିତିର ସମାଧାନ ଲାଗି ଦୁଇ ଦେଶ ଭିତରେ ଆଲୋଚନା ହେଉଛି । ଏନେଇ ଉଭୟ ଦେଶର ପ୍ରତିନିଧି ଦଳ ଇସଲାମାବାଦରେ ପହଞ୍ଚିଛନ୍ତି । ଆମେରିକାର ତରଫରୁ ପ୍ରତନିଧିତ୍ବ କରୁଛନ୍ତି ଉପରାଷ୍ଟ୍ରପତି ଜେଡି ଭାନ୍ସ । ତାଙ୍କ ସହ ବିଶେଷ ଦୂତ ଷ୍ଟିଭ୍ ୱିଟକଫ୍ ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଜ୍ୱାଇଁ ଜାରେଡ୍ କୁଶନର୍ ଏହି ବୈଠକରେ ସାମିଲ ହେଉଛନ୍ତି ।

ସେପଟେ ଇରାନ ପକ୍ଷରୁ ସଂସଦର ବାଚସ୍ପତି ମହମ୍ମଦ ବାଘେର ଗଲିବାଫ୍ ଏହି ପ୍ରତିନିଧି ଦଳର ନେତୃତ୍ୱ ନେଉଛନ୍ତି । ତାଙ୍କ ସହ ଦେଶର ବୈଦେଶିକ ମନ୍ତ୍ରୀ ସୟଦ ଅବ୍ବାସ ଆରାଘଚି ମଧ୍ୟ ଏହି ଶାନ୍ତି ଆଲୋଚନାର ଅଂଶୀଦାର ରହିଛନ୍ତି । ଆଉ ଏହି ଆଲୋଚନାରୁ ବାହାରିବାକୁ ଥିବା ନିସ୍କର୍ଷ ଉପରେ ରହିଛି ପୂରା ବିଶ୍ବର ନଜର । ହର୍ମୁଜ ପ୍ରଣାଳୀ ଖୋଳିବା, ଇରାନର ସମସ୍ତ ନ୍ୟୁକ୍ଲିୟାର ପ୍ରୋଗ୍ରାମ ବନ୍ଦ କରିବା ସମେତ ଆଲୋଚନାରେ ଇରାନ ଆଗରେ ରଖିବାକୁ ଏକ ୧୫ ସୂତ୍ରୀ ଖସଡ଼ା ପ୍ରସ୍ତୁତ କରିଛି ଆମେରିକା । ଯେଉଁଠି ମଧ୍ୟପ୍ରାଚ୍ୟରେ ସଂପୂର୍ଣ୍ଣ ଯୁଦ୍ଧ ବିରତି ଘୋଷଣା, ତୈଳ ବ୍ୟାପାର ଉପରୁ ଅନ୍ତରାଷ୍ଟ୍ରୀୟ କଟକଣା ପ୍ରତ୍ୟାହାର, ବିଦେଶରେ ଥିବା ଇରାନର ପାଣ୍ଠିକୁ ମୁକ୍ତ କରିବା ଭଳି ୧୦ ସୂତ୍ରୀ ପ୍ରସ୍ତାବକୁ ତେହରାନ ସୁପର ପାଓ୍ବାର ଆମେରିକା ସାମ୍ନାରେ ରଖିବାକୁ ପ୍ରସ୍ତୁତ ।

ଆଲୋଚନାରେ ଲେବାନନର ନରସଂହାର ଏକ ମୁଖ୍ୟ ମୁଦ୍ଦା ସାଜିବ ପୂର୍ବରୁ ଏକଥାର ମଧ୍ୟ ସୁରାଗ ଦେଇସାରିଛି ଇରାନ । ଏହା ବ୍ୟତୀତ ଆଲୋଚନା ପୂର୍ବରୁ ଆମେରିକା ଉପରେ ବିଶ୍ବାସ ନଥିବା କହି ସ୍ଥିତିକୁ ଆହୁରି ଜଟିଳତା ଭିତରକୁ ଠେଲି ଦେଇଛନ୍ତି ଇରାନ ପ୍ରତିନିଧି ଦଳର ମୁଖ୍ୟ ମହମ୍ମଦ ବାଘେର ଗଲିବାଫ୍ ।

ଇସାଲାମାବାଦରେ ଆଲୋଚନାରୁ ସଫଳ ନିଷ୍କର୍ଷ ବାହାରୁ । କିଛି ଏଭଳି ଆଶା ବାନ୍ଧିଛି ବିଶ୍ବ । ମଧ୍ୟପ୍ରାଚ୍ୟ ମହାକଳି ଲାଗି ବିଶ୍ବ ଉପରକୁ ମାଡ଼ି ଆସିଥିବା ଅନାବଶ୍ୟକ ସଂକଟ ଦୂର ହେବା ଲାଗି ପ୍ରାର୍ଥନା କରୁଛନ୍ତି । କିନ୍ତୁ ଆଲୋଚନା ଲାଗି ଯାଇଥିବା ଦୁଇ ପକ୍ଷଙ୍କ ମନୋଭାବ କିଛି ଅଲଗା ହିଁ ଇସାରା କରୁଛି । ଶାନ୍ତି ଆଲୋଚନା ପୂର୍ବରୁ ହର୍ମୁଜ ଖୋଲିବାକୁ ଇରାନକୁ ଚରମବାଣୀ ଶୁଣାଇଛନ୍ତି ଟ୍ରମ୍ପ । ରାଜି ହେଲେ ଇରାନ ସହ ନଚେତ ଇରାନ ବିନା ସେ ଏହା କରିବେ ବୋଲି ପୂର୍ବରୁ ଦାବି କରିଆସୁଛନ୍ତି । ଏମିତିରେ ହର୍ମୁଜରେ ଇରାନ ଲଗାଇଥିବା Sea ମାଇନ୍ସର ସନ୍ଧାନ ପାଉନଥିବାର ଆମେରିକା ଆଣିଛି ଆଉ ଏକ ନୂଆ ଅଭିଯୋଗ । ଯେଉଁଥିପାଇଁ ଏହି ପ୍ରଣାଳୀ ଦେଇ ଆସୁଥିବା ଜାହାଜଙ୍କ ବୁଡ଼ିବା ସଂକଟ ଦୁଇ ଗୁଣିତ ହୋଇଛି ।

ସେପଟେ ଇସଲାମାବାଦରେ ପହଞ୍ଚିବା ପୂର୍ବରୁ ବିମାନ ଭିତରୁ ଏକ ହୃଦୟ ବିଦାରକ ଫଟୋ ସେୟାର କରିଛନ୍ତି ଇରାନ ପ୍ରତିନିଧି ଦଳ ମୁଖ୍ୟ । ଯେଉଁଥିରେ ଆମେରିକା ଆକ୍ରମଣରେ ଜୀବନ ହାରିଥିବା କୁନି କୁନି ପିଲାଙ୍କ ଫଟୋ ବିମାନ ସିଟରେ ରହିଥିବା ଦେଖିବାକୁ ମିଳୁଛି ।

ଇସଲାମାବାଦର ଏହି ଆଲୋଚନାରୁ ସଫଳ ନିଷ୍କର୍ଷ ବାହାରିବା ନେଇ ଆଶା ବାନ୍ଧିଛି ପୂରା ବିଶ୍ବ । କୁହାଯାଉଛି ଜେଡି ଭାନ୍ସଙ୍କୁ ଆମେରିକା ପକ୍ଷରୁ ପ୍ରତିନିଧିତ୍ବ କରିବାକୁ ଇରାନ ପକ୍ଷରୁ ଅନୁରୋଧ କରାଯାଇଛି । ଇରାନରେ ଭାନ୍ସଙ୍କୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅତି ନିକଟତର ବ୍ୟକ୍ତିଙ୍କ ମଧ୍ୟରେ ସବୁଠାରୁ ବଡ଼ 'ଯୁଦ୍ଧ ବିରୋଧୀ' ଚେହେରା ଭାବେ ଦେଖାଯାଏ। ଯଦି ଏହି ଆଲୋଚନା ସଫଳ ହୁଏ ତେବେ ବିଶ୍ବରେ ତାଙ୍କର ଲୋକପ୍ରିୟତା ଦୁଇ ଗୁଣିତ ହୋଇଯିବ ।