ଟ୍ରମ୍ପଙ୍କ ବଡ଼ ପ୍ଲାନ । ଆଗାମୀ କିଛି ଘଣ୍ଟା ମଧ୍ୟରେ ଇରାନ ଉପରେ ଆକ୍ରମଣ କରିପାରେ ଆମେରିକା । ଇରାନକୁ ଘେରି ରହିଛି ଆମେରିକା ୧୩ଟି ଯୁଦ୍ଧ ଜାହାଜ ସାଙ୍ଗକୁ ଫାଇଟର ଜେଟ୍‌ । ଆମେରିକା ଏବଂ ଇରାନ ମଧ୍ୟରେ ପରମାଣୁ ଚୁକ୍ତିନାମା ବିଫଳ ହୋଇଥିବାରୁ ବଢ଼ିଛି ତିକ୍ତତା । ଆଟାକ୍‌ ପାଇଁ ପ୍ରସ୍ତୁତ ଥିବା ହ୍ବାଇଟ୍‌ ହାଉସକୁ ଜଣାଇ ସାରିଛି ଆମେରିକା ସେନା । ବାସ୍ ଏବେ କେବଳ ଟ୍ରମ୍ପଙ୍କ ଗ୍ରୀନ୍‌ ସିଗନାଲକୁ ଅପେକ୍ଷା ।

ପଶ୍ଚିମ ଏସିଆର ଆକାଶରେ ଏବେ ଯୁଦ୍ଧର କଳାବାଦଲ । ଇରାନ ସୀମାରେ ଆମେରିକା ନିଜର ଶକ୍ତିଶାଳୀ ବାୟୁସେନା ଏବଂ ନୌସେନା ମୁତୟନ କରି ରଣହୁଙ୍କାର ଦେଇଛି । ରିପୋର୍ଟ ଅନୁଯାୟୀ, ୨୦୦୩ ଇରାକ ଯୁଦ୍ଧ ପରେ ଏହା ହେଉଛି ଆମେରିକାର ସବୁଠାରୁ ବଡ଼ ସାମରିକ ପ୍ରସ୍ତୁତି । ଆକାଶମାର୍ଗରେ F-35, F-22 ଓ F-15 ଭଳି ଘାତକ ଯୁଦ୍ଧବିମାନ ଗର୍ଜୁଥିବା ବେଳେ ସମୁଦ୍ରରେ USS ଆବ୍ରାହମ୍ ଲିଙ୍କନ୍ ଏବଂ USS ଜେରାଲ୍ଡ ଆର୍. ଫୋର୍ଡ ଭଳି ବିଶାଳ ଏୟାରକ୍ରାଫ୍ଟ କ୍ୟାରିୟର୍‌ ଶତ୍ରୁକୁ ଥରାଇବା ପାଇଁ ପ୍ରସ୍ତୁତ ଅଛନ୍ତି ।

ସାଉଦି ଆରବର ପ୍ରିନ୍ସ ସୁଲତାନ ଏୟାର ବେସ୍ ଏବେ ଆମେରିକାର ସାମରିକ ରଣନୀତିର କେନ୍ଦ୍ରବିନ୍ଦୁ ପାଲଟିଛି । ଏହି ଏୟାର ବେସ୍‌କୁ ଆମେରିକା ଏକ ଅଜେୟ ଦୁର୍ଗରେ ପରିଣତ କରିଛି । ଏଠାରେ କେବଳ ଘାତକ ଯୁଦ୍ଧ ବିମାନ ନୁହେଁ, ବରଂ ଶତ୍ରୁର କ୍ଷେପଣାସ୍ତ୍ରକୁ ଆକାଶରେ ଧ୍ୱଂସ କରିବା ପାଇଁ ଅତ୍ୟାଧୁନିକ ପାଟ୍ରିଅଟ୍ ଓ ଥାଡ୍ ମିସାଇଲ୍ ଡିଫେନ୍ସ ସିଷ୍ଟମ ମଧ୍ୟ ମୁତୟନ କରାଯାଇଛି । ହ୍ୱାଇଟ୍ ହାଉସର ନିର୍ଦ୍ଦେଶ ପରେ ଏହି ବେସ୍‌ରେ ଥିବା ସୈନ୍ୟବାହିନୀ ଏବେ High Alert ରେ ଅଛନ୍ତି ।

ହ୍ୱାଇଟ୍ ହାଉସ୍ ସିଚୁଏସନ୍ ରୁମ୍‌ରେ ହୋଇଥିବା ଗୁରୁତ୍ୱପୂର୍ଣ୍ଣ ବୈଠକ ପରେ ଏହି ସାମରିକ ଗତିବିଧି ଆହୁରି ତେଜିଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପର୍ଯ୍ୟନ୍ତ ଚୂଡ଼ାନ୍ତ ଅନୁମତି ଦେଇନଥିଲେ ମଧ୍ୟ ସୈନ୍ୟବାହିନୀକୁ ଆସନ୍ତା ସପ୍ତାହ ସୁଦ୍ଧା ସମସ୍ତ ପ୍ରସ୍ତୁତି ଶେଷ କରିବାକୁ ନିର୍ଦ୍ଦେଶ ଦିଆଯାଇଛି । ଇରାନର ପରମାଣୁ କାର୍ଯ୍ୟକ୍ରମ ଏବଂ କ୍ଷେପଣାସ୍ତ୍ର ପରୀକ୍ଷଣକୁ ରୋକିବା ପାଇଁ ଆମେରିକା ଏବେ Maximum Pressure ରଣନୀତି ଆପଣେଇଛି ।

ସେପଟେ ଇରାନ ମଧ୍ୟ ନିଜର କ୍ଷେପଣାସ୍ତ୍ର ଘାଟିଗୁଡ଼ିକୁ ସକ୍ରିୟ କରିବା ସହ ଆମେରିକାକୁ ପାଲଟା ଜବାବ ଦେବାକୁ ପ୍ରସ୍ତୁତ ରହିଛି । ଜେନେଭା ଆଲୋଚନା ମଧ୍ୟରେ ସର୍ବୋଚ୍ଚ ନେତା ଖାମେନେଇଙ୍କ କଡ଼ା ଚେତାବନୀ ଏହି ବିବାଦକୁ ଆହୁରି ଜଟିଳ କରିଛି । ଟ୍ରମ୍ପଙ୍କ ରେଜିମ୍ ଚେଞ୍ଜର ପ୍ରୟାସକୁ ଖାମେନେଇ ଖୋଲାଖୋଲି ବିରୋଧ କରିଛନ୍ତି । ବର୍ତ୍ତମାନ ବିଶ୍ୱର ନଜର ରାଷ୍ଟ୍ରପତି ଟ୍ରମ୍ପଙ୍କ ପରବର୍ତ୍ତୀ ପଦକ୍ଷେପ ଉପରେ। ।

ବର୍ତ୍ତମାନ ବିଶ୍ୱର ନଜର ରାଷ୍ଟ୍ରପତି ଟ୍ରମ୍ପଙ୍କ ପରବର୍ତ୍ତୀ ପଦକ୍ଷେପ ଉପରେ । ଜେନେଭା ଆଲୋଚନାରେ କୌଣସି ବଡ଼ ସଫଳତା ନ ମିଳିବା ଏବଂ ସର୍ବୋଚ୍ଚ ନେତା ଖାମେନେଇଙ୍କ ଆମେରିକୀୟ ଯୁଦ୍ଧପୋତକୁ ବୁଡ଼ାଇ ଦେବାର ଖୋଲା ଧମକ ପରିସ୍ଥିତିକୁ ସଙ୍ଗୀନ କରିଦେଇଛି । ଆମେରିକୀୟ ଗୁପ୍ତଚର ସଂସ୍ଥାର ରିପୋର୍ଟ ଅନୁଯାୟୀ, ଆସନ୍ତା ୭ ଦିନ ମଧ୍ୟରେ ଯଦି ଇରାନ ନିଜର ପରମାଣୁ ଜିଦ୍‌ରୁ ନ ଓହରେ, ତେବେ ହ୍ୱାଇଟ୍ ହାଉସ୍ ପକ୍ଷରୁ ALL OUT ATTACK ପାଇଁ ଚୂଡ଼ାନ୍ତ ନିର୍ଦ୍ଦେଶ ଆସିପାରେ । ମଧ୍ୟପ୍ରାଚ୍ୟରେ ଥିବା ୫୦ ହଜାରରୁ ଅଧିକ ଆମେରିକୀୟ ସୈନ୍ୟ ଏବଂ ଇରାନର ହଜାର ହଜାର ବାଲିଷ୍ଟିକ୍ ମିସାଇଲ୍ ଏବେ ପରସ୍ପର ମୁହାଁମୁହିଁ । ଯଦି କୂଟନୀତି ହାରିଯାଏ, ତେବେ ଆସନ୍ତା ସପ୍ତାହ ବିଶ୍ୱ ଇତିହାସରେ ଏକ ଭୟଙ୍କର ରକ୍ତାକ୍ତ ଅଧ୍ୟାୟର ସୂତ୍ରପାତ କରିବ ।