Argus News - ଆମେରିକାର ନୂଆ ଭିସା ନିୟମକୁ ନେଇ ଚିନ୍ତାରେ ଭାରତୀୟ, ବାତିଲ୍ ହେଉଛି ପୂର୍ବ ସାକ୍ଷାତକାର ତାରିଖ

ନୂଆଦିଲ୍ଲୀ: ଭିସା (VISA) ନିୟମରେ ପରିବର୍ତ୍ତନ ଆଣିଛି ଆମେରିକା । ପ୍ରଭାବିତ ହେଉଛନ୍ତି ଭାରତୀୟ । ଆମେରିକା ଆଣିଥିବା ନୂଆ ନିୟମ ଭିସା ଆବେଦନକାରୀଙ୍କ ସୋସିଆଲ୍ ମିଡିଆ ପ୍ରୋଫାଇଲ୍ ସହ ଜଡ଼ିତ ।

ଏଣିକି H-1B ଭିସା ଆବେଦନ କରିଥିବା ଅଥବା ପୂର୍ବରୁ ଆମେରିକାରେ କାର୍ଯ୍ୟ କରୁଥିବା ବ୍ୟକ୍ତି ଏବଂ ତାଙ୍କ ପରିବାର ଭିସା ଆବେଦନ ଯାଞ୍ଚ ବେଳେ ସେମାନଙ୍କ ଫେସବୁକ୍, ଇନଷ୍ଟାଗ୍ରାମ, ଏକ୍ସ ଏବଂ ଲିଙ୍କଡଇନ୍‌ ଆକାଉଣ୍ଟକୁ ସାର୍ବଜନୀନ ରଖିବାକୁ ପଡ଼ିବ ।

ଏଥିସହ ପଢ଼ନ୍ତୁ: ୧୬ ବର୍ଷରୁ କମ୍ ପିଲାଙ୍କ ପାଇଁ ସୋସିଆଲ ମିଡିଆ ବ୍ୟାନ୍, ଅଷ୍ଟ୍ରେଲିଆ ସରକାରଙ୍କ ଐତିହାସିକ ନିଷ୍ପତ୍ତି

ଅର୍ଥାତ୍ ଆପଣଙ୍କ ସୋସିଆଲ୍ ମିଡିଆରେ ପୂର୍ବରୁ ପୋଷ୍ଟ କରିଥିବା ସମସ୍ତ ପୋଷ୍ଟ, ଫଟୋ, କମେଣ୍ଟ ସହ ଆପଣଙ୍କ ରିଜ୍ୟୁମ୍ ମଧ୍ୟ ଆମେରିକୀୟ ଅଧିକାରୀ ଯାଞ୍ଚ କରିପାରନ୍ତି । ଯାହାକୁ ନେଇ ଭାରତୀୟ ଭିସା ଆବେଦନକାରୀ ଛାନିଆ ହୋଇ ପଡ଼ିଛନ୍ତି । କାରଣ ଭାରତୀୟ ହିଁ ସର୍ବାଧିକ H-1B ଭିସା ଧାରକ ।

ସର୍ବାଧିକ ପ୍ରଭାବିତ ହେବେ ଭାରତୀୟ

ଆମେରିକାର ଏହି ନୂଆ ନିୟମ ସବୁଠୁ ଅଧିକ ଭାରତୀୟଙ୍କୁ ଚିନ୍ତାରେ ପକାଇଛି । କାରଣ ଆମେରିକାରେ ଉଚ୍ଚ-କୁଶଳୀ (H-1B) ଧାରକ ୭୦ ପ୍ରତିଶତରୁ ଅଧିକ ଏବଂ H-4 EAD ଧାରକରୁ ୯୦ ପ୍ରତିଶତ ଭାରତୀୟ । ଅର୍ଥାତ୍ ଏହି ନୂଆ ନିୟମ ସିଧା ଭାରତୀୟଙ୍କୁ ପ୍ରଭାବିତ କରିବ । ଡିସେମ୍ବର ୧୫ରୁ ଲାଗୁ ନୂଆ ନିୟମ ପ୍ରକାରେ ନୂଆ ଆବେଦନ ଓ ଭିସା ନବୀକରଣ କ୍ଷେତ୍ରରେ ସୋସିଆଲ୍ ମିଡିଆ ଆକାଉଣ୍ଟକୁ ସାର୍ବଜନୀନ କରିବାକୁ ପଡ଼ିବ ।

ଇମିଗ୍ରେସନ୍ ଓକିଲଙ୍କ ଅନୁସାରେ, ଆମେରିକାର ନୂଆ ନିୟମ ଲୋକଙ୍କୁ ଚିନ୍ତାରେ ପକାଇଛି । ସୋସିଆଲ୍ ମିଡିଆରେ ଆପଣ ସେୟାର କରିଥିବା କୌଣସି କଟାକ୍ଷ ଫଟୋ କିମ୍ବା ଭିଡିଓ, ମଜାଳିଆ ଟିପ୍ପଣୀ, ରିଜ୍ୟୁମରେ କୌଣସି ତଥ୍ୟ ଦେଇନଥିଲେ ଆପଣଙ୍କ ଭିସା ଆବେଦନ ବାତିଲ୍ ହୋଇପାରେ ।

ହଠାତ୍ ସାକ୍ଷାତକାର ବାତିଲ ଓ ଦେଢ଼ବର୍ଷର ପ୍ରତୀକ୍ଷା

ନୂଆ ନିୟମ ଫଳରେ ଆମେରିକା ଭିସା ଆବେଦନକାରୀଙ୍କ ପୂର୍ବ ନିର୍ଦ୍ଧାରିତ ସାକ୍ଷାତକାର ତାରିଖ ବାତିଲ ହେବାରେ ଲାଗିଛି । ହାଇଦ୍ରାବାଦ, ଚେନ୍ନାଇ ଆଦି ଦୂତାବାସରେ ସାକ୍ଷାତକାର ତାରିଖ ପରିବର୍ତ୍ତନ କରାଯାଉଛି । ଯେଉଁମାନଙ୍କ ସାକ୍ଷାତକାର ଡିସେମ୍ବରରେ ଥିଲା ସେମାନଙ୍କୁ ୨୦୨୬ ମାର୍ଚ୍ଚରେ ନୂଆ ତାରିଖ ମିଳିଛି ।

ସାକ୍ଷାତକାର ତାରିଖ ବଦଳିଥିବାରୁ ସମସ୍ୟାରେ ପଡ଼ିଛନ୍ତି ଭାରତୀୟ । ଯେଉଁମାନେ ଆମେରିକାରୁ କୌଣସି କାରଣ ପାଇଁ ଭାରତ ଆସିଛନ୍ତି । ସେମାନେ ମଧ୍ୟ ଏହାଦ୍ଵାରା ପ୍ରଭାବିତ ହେବେ । ନା ଚାକିରିରେ ଯୋଗ ଦେଇପାରିବେ ନା ପରିବାର ପାଖକୁ ଫେରି ପାରିବେ ।

ଏଥିସହ ପଢ଼ନ୍ତୁ: ମାଲକାନିଗିରିରେ ମିଳିଲା ମୃତ ମହିଳାଙ୍କ କଟା ମୁଣ୍ଡ !

ଆମେରିକା ଦୂତାବାସର କଡ଼ା ଚେତାବନୀ

ଭିସା ଆବେଦନକାରୀଙ୍କ ମଧ୍ୟରେ ଆତଙ୍କ ଭିତରେ ଭାରତ ସ୍ଥିତ ଆମେରିକୀୟ ଦୂତାବାସ ଏକ ପୋଷ୍ଟ କରିଛି । ଏକ୍ସ ପୋଷ୍ଟରେ ଆମେରିକୀୟ ଦୂତାବାସ ଲେଖିଛି, "ଯଦି ଆପଣଙ୍କୁ ଇମେଲ୍‌ରେ ସାକ୍ଷାତକାର ତାରିଖ ପରିବର୍ତ୍ତନ ନେଇ ଅବଗତ କରାଯାଇଛି, ତାହେଲେ ପୂର୍ବ ତାରିଖରେ ଆସନ୍ତୁ ନାହିଁ ।"

ନୂଆ ନିୟମ କାହିଁକି ?

ଆମେରିକାର ବିଦେଶ ବିଭାଗ ନୂଆ ନିୟମ ପଛରେ ଜାତୀୟ ସୁରକ୍ଷା କଥା କହିଛି । ଆମେରିକା ଅନୁସାରେ, "ଭିସା ସହ ଜଡ଼ିତ ନୂଆ ନିୟମ ଆମେରିକାର ସୁରକ୍ଷା ସହ ଜଡ଼ିତ । ପୂର୍ବରୁ ଏହି ନିୟମ ଛାତ୍ର ଓ ଭ୍ରମଣକାରୀଙ୍କ ଲାଗି ଥିଲା । ଏବେ ତାକୁ H-1B ଓ H-4 ଭିସା ଆବେଦନକାରୀଙ୍କ ଲାଗି ବଢ଼ାଇ ଦିଆଯାଇଛି ।"