କାରାକାସ: ଭେନେଜୁଏଲା ଉପରେ ପୁଣି ଆକ୍ରମଣ । ଆମେରିକାର ଆକ୍ରମଣ ପରେ ରାଷ୍ଟ୍ରପତି ଭବନ ବାହାରେ କିଏ କଲା ଗୁଳିମାଡ଼ ? ସୋମବାର ବିଳମ୍ବିତ ରାତିରେ ଭେନେଜୁଏଲା ରାଷ୍ଟ୍ରପତି ଭବନ ନିକଟରେ ଭୀଷଣ ଗୁଳିଗୋଳା ବର୍ଷଣ ହୋଇଛି ।

ରିପୋର୍ଟ ଅନୁସାରେ, ମିରଫ୍ଲୋରେସ ମହଲ ଉପରେ ଅଜଣା ଡ୍ରୋନ୍ ଉଡ଼ିଥିଲା । ଡ୍ରୋନ୍‌କୁ ଯବାବ ଦେବାକୁ ଯାଇ ସୁରକ୍ଷାକର୍ମୀ ଗୁଳି ଚଳାଇଥିଲେ । ବେଶ୍ କିଛି ସମୟ ଧରି ରାଷ୍ଟ୍ରପତି ଭବନ ବାହାରେ ଗୁଳିଗୋଳା ବର୍ଷଣ ଚାଲିଥିଲା ।

ଏଥିସହ ପଢ଼ନ୍ତୁ: ବାଂଲାଦେଶରେ ପୁଣି ହିନ୍ଦୁଙ୍କୁ ହତ୍ୟା; ସାମ୍ବାଦିକଙ୍କୁ ଗୁଳି କଲେ, ବ୍ୟବସାୟୀଙ୍କୁ ହାଣିଦେଲେ

ଆମେରିକା ଭେନେଜୁଏଲା ଉପରେ ଆକ୍ରମଣ କରି ରାଷ୍ଟ୍ରପତି ନିକୋଲସ ମାଦୁରୋଙ୍କୁ ନ୍ୟୁୟର୍କ ନେଇ ଯାଇଛି । ଡେଲ୍ସି ରୋଡ୍ରିଗଜଙ୍କୁ ଅନ୍ତରୀଣ ରାଷ୍ଟ୍ରପତି ନିଯୁକ୍ତ କରାଯାଇଥିବା ବେଳେ ଏଭଳି ଗୁଳିମାଡ଼ ପୁଣି ଭେନେଜୁଏଲାବାସୀଙ୍କୁ ବିବ୍ରତ କରିଛି ।

ସୋସିଆଲ୍ ମିଡିଆରେ ପୋଷ୍ଟ କରାଯାଇଥିବା ଭିଡିଓରେ ଭୀଷଣ ଗୁଳିଗୋଳାର ଶବ୍ଦ ଶୁଣାଯାଉଛି । ଆକାଶରେ ଫାୟାରିଂ ହେଉଥିବା ଦେଖା ଯାଉଛି । ଅଜଣା ଡ୍ରୋନ୍‌କୁ ଭେନେଜୁଏଲା ସୁରକ୍ଷାକର୍ମୀ ଖସାଇବାକୁ ପ୍ରୟାସ କରୁଛନ୍ତି ।

ସୂଚନା ଅନୁସାରେ, ଏହି ଗୁଳିମାଡ଼ ରାଷ୍ଟ୍ରପତି ଭବନର ଉତ୍ତର ପଟେ ହୋଇଛି । ତେବେ ଏଥିରେ କ୍ଷୟକ୍ଷତି କିମ୍ବା ମୃତାହତ ନେଇ ବର୍ତ୍ତମାନ ପର୍ଯ୍ୟନ୍ତ କୌଣସି ସୂଚନା ନାହିଁ ।

ଭେନେଜୁଏଲାରେ ଆମେରିକା ସୈନ୍ୟ ଅପରେସନ୍ କରି ରାଷ୍ଟ୍ରପତି ନିକୋଲସ ମାଦୁରୋଙ୍କୁ ଗିରଫ କରି ନେଇଛି । ସୋମବାର ନିକୋଲସଙ୍କୁ ନ୍ୟୁୟର୍କର ଏକ ସଂଘୀୟ ଅଦାଲତରେ ହାଜର କରାଯାଇଛି ।

ଏଥିସହ ପଢ଼ନ୍ତୁ: 'ଆମ ଉପରେ ଆମେରିକାର ହକ୍ ନାହିଁ': ଟ୍ରମ୍ପଙ୍କ ଉପରେ ବର୍ଷିଲେ ମହିଳା ପ୍ରଧାନମନ୍ତ୍ରୀ

ନିକୋଲସ ମାଦୁରୋଙ୍କୁ ଉପରେ ଆମେରିକା ଅବୈଧ ଡ୍ରଗ୍ସ ଚାଲାଣ ସହ ଆତଙ୍କବାଦ ଭଳି ଗମ୍ଭୀର ଅଭିଯୋଗ ଲଗାଇଛି । ମାଦୁରୋ ଏବଂ ତାଙ୍କ ପତ୍ନୀ ସିଲିଓ ଫ୍ଲୋରେସଙ୍କୁ କଡ଼ା ସୁରକ୍ଷାରେ କୋର୍ଟରେ ହାଜର କରାଯାଇଥିଲା ।

କୋର୍ଟରେ ଶୁଣାଣି ବେଳେ ମାଦୁରୋ ଓ ଫ୍ଲରେଶ ଉଭୟ ଅଭିଯୋଗକୁ ଭିତ୍ତିହୀନ କହିବା ସହ ନିଜକୁ ନିର୍ଦ୍ଦୋଷ ବୋଲି କହିଛନ୍ତି । ଏପରିକି ମାଦୁରୋ ଏବେ ବି ଭେନେଜୁଏଲାର ରାଷ୍ଟ୍ରପତି ଥିବା ଜୋର୍ ଦେଇ କହିଛନ୍ତି । ଯେତେବେଳେ କି ଅନ୍ତରୀଣ ରାଷ୍ଟ୍ରପତି ଭାବେ ଡେଲ୍ସି ରୋଡ୍ରିଗଜ୍‌ ଶପଥ ନେଇଛନ୍ତି ।