ଆଜି ହେଉଛି ଡିସେମ୍ୱର ୨୫ ଅର୍ଥାତ୍‌ ଖ୍ରୀଷ୍ଟମାସ। ଏହାସହ ଆଜିର ଦିନକୁ ବଡ଼ ଦିନ ବୋଲି ମଧ୍ୟ କୁହାଯାଏ। ଶାନ୍ତି, ଐକ୍ୟ ଓ ପ୍ରେମର ବାର୍ତ୍ତା ନେଇ ମଧ୍ୟରାତ୍ରରେ ଧରାବତରଣ କରିଛନ୍ତି ପ୍ରଭୁ ଯୀଶୁଖ୍ରୀଷ୍ଟ । ଭାଟିକାନ୍ ସିଟିରୁ ଆରମ୍ଭ କରି ଭୁବନେଶ୍ୱର ପର୍ଯ୍ୟନ୍ତ ସବୁଠି ବେଶ୍ ଧୂମଧାମରେ ଆୟୋଜିତ ହେଉଛି ଖ୍ରୀଷ୍ଟମାସ । ଖ୍ରୀଷ୍ଟ ଜନ୍ମର କିଛି ଦିନ ପୂର୍ବରୁ ଉପବାସ ଓ ନିଷ୍ଠା ପୂର୍ବକ ପୂଜାପାଠ କରି ବଡ଼ଦିନ ଉତ୍ସବ ଆରମ୍ଭ କରିଥାନ୍ତି ଖ୍ରୀଷ୍ଟ ଧର୍ମାବଲମ୍ବୀ । କିନ୍ତୁ ଆପଣ ଜାଣନ୍ତି କି ଏମିତି ଏକ ଦେଶ ରହିଛି ଯେଉଁଠି ଡିସେମ୍ୱର ୨୫ ନୁହେଁ, ବରଂ ଜାନୁଆରୀ ୭ରେ ପାଳନ ହୁଏ ଖ୍ରୀଷ୍ଟମାସ।

ଆଜି ସମସ୍ତ ଚର୍ଚ୍ଚରେ ପ୍ରବଳ ଗହଳି ଦେଖିବାକୁ ମିଳିଛି । କେକ୍ ଖାଇବା ସହ ଯୀଶୁଙ୍କୁ ପୂଜା କରନ୍ତି ଶ୍ରଦ୍ଧାଳୁ । କିନ୍ତୁ ଋଷରେ ଆଜି ଏହା ପାଳନ କରାଯାଏ ନାହିଁ। କାହିଁକି ଜାଣନ୍ତି କି ? ଋଷରେ ଜାନୁଆରୀ ୭କୁ ସେଠାକାର ଲୋକେ ଖ୍ରୀଷ୍ଟମାସ ଭାବେ ପାଳନ କରନ୍ତି । ତେବେ ଏହି ଦିନ ସନ୍ଧ୍ୟାରେ ସବୁ ଷ୍ଟ୍ରିଟ୍ ଲାଇଟର ଆଲୁଅ କମିଯାଏ । ସବୁ ଜାଗା ଶୂନଶାନ୍ ହୋଇଯାଏ । ଛୁଟି ଦିନ କୌଣସି ପାର୍ଟି ନୁହେଁ ବରଂ ନିସ୍ତବ୍ଧ ଲାଗିଥାଏ ।

ଜାନୁଆରୀ ୭ର ପୂର୍ବ ସନ୍ଧ୍ୟାରେ ସମସ୍ତ ଲୋକେ କେକ୍ ପ୍ରସ୍ତୁତ କରିଥାନ୍ତି । ଏହାସହ ସୁସ୍ୱାଦୁ ଖାଦ୍ୟ ରାନ୍ଧନ୍ତି । ଏଥିରେ କୌଣସି ଆମିଷ ବ୍ୟବହାର ହୋଇନଥାଏ । ଭଗବାନଙ୍କ ଉଦ୍ଦେଶ୍ୟରେ ସମସ୍ତ ଖାଦ୍ୟ ଅର୍ପଣ ହୁଏ । ଆକାଶରେ ସନ୍ଧ୍ୟାର ପ୍ରଥମ ତାରା ଦୃଶ୍ୟମାନ ନହେଲା ଯାଏଁ କେହିହେଲେ ଖାଆନ୍ତି ନାହିଁ । ମଧ୍ୟରାତ୍ରରେ ସମସ୍ତ ଲୋକ ରାସ୍ତାରେ ମହମବତୀ ଜାଳିଥାନ୍ତି । ପ୍ରାଚୀନ ମନ୍ତ୍ର ଉଚ୍ଚାରଣ କରି ଭଗବାନଙ୍କୁ ପୂଜା କରନ୍ତି । ପ୍ରବଳ ଶୀତ ଏବଂ ବରଫ ପାଲଟିଥିବା ସହରରେ ସେମାନେ ଶୋଭାଯାତ୍ରା କରନ୍ତି । ଜାନୁଆରୀ ୭ର ପରଦିନ ଅର୍ଥାତ ଜାନୁଆରୀ ୮ ସନ୍ଧ୍ୟାରେ ସମସ୍ତେ ଏକାଠି ହୋଇ ପାର୍ଟି କରନ୍ତି । ଏହି ଦିନକୁ ସେଠାରେ ଭିଆଟକି କୁହାଯାଏ । ପରିବାରର ସମସ୍ତ ସଦସ୍ୟ ଚା ଏବଂ କଫି ପିଇ କାହାଣୀ ଶୁଣନ୍ତି । ଶିଶୁମାନେ ସହରରେ ଗୀତ ଗାଇ ବୁଲିଥାନ୍ତି । ମିଠା ଏବଂ କେକ୍ ବଣ୍ଟନ ହୁଏ । ପରେ ପରିବାରର ସବୁ ସଦସ୍ୟ ଏକାଠି ରାତ୍ରୀ ଭୋଜନ କରିଥାନ୍ତି ।

ଜାନୁଆରୀ ୭ କାହିଁକି ?

ଇତିହାସକୁ ଦେଖିଲେ ଋଷିଆ ବହୁ ପ୍ରାଚୀନ କ୍ୟାଲେଣ୍ଡରକୁ ଅନୁସରଣ କରିଥାଏ । ସେତେବେଳେ ସମସ୍ତ ଖ୍ରୀଷ୍ଟିଆନ ଦେଶ ଜୁଲିଆନ କ୍ୟାଲେଣ୍ଡରକୁ ଫଲୋ କରୁଥିଲେ । ୧୫୮୨ରେ ୟୁରୋପ ଗ୍ରିଗୋରିଆନ କ୍ୟାଲେଣ୍ଡରକୁ ଗ୍ରହଣ କରିଥିଲା । ଯାହା ପୂର୍ବ ପ୍ରଚଳିତ କ୍ୟାଲେଣ୍ଡରରେ ଅନେକ ଛୋଟବଡ ପରିବର୍ତ୍ତନ କରିଥିଲା । କିନ୍ତୁ ଋଷିଆର ପୁରୁଣା ପରମ୍ପରାରେ ବିଶ୍ୱାସ କରୁଥିବା ଚର୍ଚ୍ଚ ପୁରୁଣା କ୍ୟାଲେଣ୍ଡରରେ ହିଁ ବିଶ୍ୱାସ କରିବା ପାଇଁ ନାଗରିକଙ୍କୁ କହିଥିଲେ । ସେତେବେଳେର ଏହି ନିଷ୍ପତ୍ତିର ପ୍ରଭାବ ଆଜି ବି ଋଷିଆରେ ପଡୁଛି । ଦୈନନ୍ଦିନ ଜୀବନରେ ମସ୍କୋ ଗ୍ରିଗୋରିଆନ କ୍ୟାଲେଣ୍ଡର ବ୍ୟବହାର କରିଥାଏ । କିନ୍ତୁ ଚର୍ଚ୍ଚ ଜୁଲିଆନ୍ କ୍ୟାଲେଣ୍ଡରରେ ସମସ୍ତ ପର୍ବ ପାଳନ କରେ । ଉଭୟ କ୍ୟାଲେଣ୍ଡର ମଧ୍ୟରେ ବ୍ୟବଧାନ ହେଉଛି ୧୩ ଦିନ । ତେଣୁ ବଡଦିନ ମଧ୍ୟ ୧୩ ଦିନ ଘୁଞ୍ଚିଯାଏ । ଅର୍ଥାତ ଯେବେ ଋଷିଆ ଡିସେମ୍ବର ୨୫ ପାଳନ କରିବ ସେତେବେଳେ ସାରା ବିଶ୍ୱ ଜାନୁଆରୀ ୭ରେ ପହଁଟି ସାରିଥିବ । ଜାନୁଆରୀ ୭କୁ ଋଷବାସୀ ନିରବ ଭାବେ ପର୍ବ ପାଳନ କରନ୍ତି ।

ଏଥିସହ ପଢ଼ନ୍ତୁ: ଏପଷ୍ଟେଇନ୍ ଫାଇଲ୍ସ ରହସ୍ୟ, ମୁଖ୍ୟ ଅଭିଯୁକ୍ତ ସହ ବିମାନ ଯାତ୍ରା କରୁଥିଲେ ଟ୍ରମ୍ପ୍

ସେପଟେ ଆଜି ଖ୍ରୀଷ୍ଟମାସକୁ ନେଇ ଭୁବନେଶ୍ୱରର ସତ୍ୟନଗର କ୍ୟାଥୋଲିକ୍ ଚର୍ଚ୍ଚ ଓ ୟୁନିଟ୍-୪ ୟୁନିଅନ ଚର୍ଚ୍ଚ ସମେତ ୩୫ରୁ ଅଧିକ ଚର୍ଚ୍ଚରେ ଯୀଶୁଙ୍କ ଜନ୍ମଦିନକୁ ଖୁବ ଧୁମଧାମରେ ପାଳିତ କରିଛନ୍ତି ଶ୍ରଦ୍ଧାଳୁ । କ୍ୟାଥୋଲିକ୍ ଚର୍ଚ୍ଚରେ ପ୍ରଭୁ ଯୀଶୁଙ୍କ ଜନ୍ମବିଧି ପାରମ୍ପରିକ ଭାବରେ ସମ୍ପନ୍ନ ହୋଇଥିଲା । ଯୀଶୁଙ୍କ ଜନ୍ମ ପୂର୍ବରୁ ବଳିଦାନ ଯଜ୍ଞ ହେବା ପରେ ପରିସରରେ ନିର୍ମିତ ଅସ୍ଥାୟୀ ମେଣ୍ଢାଶାଳରୁ ଫାଦର୍ ନବଜାତ ଯୀଶୁଙ୍କ ମୂର୍ତ୍ତିକୁ ଆଣିଥିଲେ । ଖ୍ରୀଷ୍ଟଧର୍ମାବଲମ୍ବୀ ଶ୍ରଦ୍ଧାଳୁମାନେ ଉତ୍ସାହିତ ହୋଇଯାଇଥିଲେ । ସମସ୍ତ ଭାଷାରେ ବାଇବେଲ ପଢ଼ାଯାଇଥିଲା । ଶିଶୁ ଯୀଶୁଙ୍କୁ ଗୋଲାପ ଫୁଲ ଦିଆଯାଇଥିବା ଓ ମହମବତୀ ଜାଳି ତାଙ୍କ ସ୍ୱାଗତ କରାଯାଇଥିଲା । ଏଥିସହ ମେଣ୍ଢାଶାଳରେ କେକ୍ କଟାଯିବା ସହ ବଡ଼ଦିନର ବାର୍ତ୍ତାନେଇ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା ।

ଅଧିକ ପଢ଼ନ୍ତୁ ବିଦେଶ ଖବର: