Gold Dress / 10 କେଜି ସୁନାରେ ତିଆରି ଡ୍ରେସ୍

ସୁନା ଦାମ୍ ଦିନକୁ ଦିନ ବଢୁଥିବାବେଳେ 10 କେଜି ସୁନାରେ ତିଆରି ଡ୍ରେସ୍ କୁ ନେଇ ଏବେ ଭାରି ଚର୍ଚ୍ଚା । ଆପଣ ହୁଏତ ସାରା ବିଶ୍ୱରେ ଅନେକ ପ୍ରକାରର ପୋଷାକ ଦେଖିଥିବେ । କପଡାରେ ହେଉ ବା ଆବର୍ଜନା ବା ଅନ୍ୟାନ୍ୟ ଜିନିଷରେ । ହେଲେ 10 କେଜି ସୁନାରେ ତିଆରି ଏହି ଡ୍ରେସ୍ ଏବେ ସମସ୍ତଙ୍କୁ ଆକର୍ଷିତ କରୁଛି । ଏହାର ଡିଜାଇନ୍ କେବଳ ଅନନ୍ୟ ନୁହେଁ ବରଂ ଏହାକୁ ଗିନିଜ୍ ବୁକ୍ ଅଫ୍ ୱାର୍ଲ୍ଡ ରେକର୍ଡସରେ ମଧ୍ୟ ସ୍ଥାନ ଦିଆଯାଇଛି । ଦୁବାଇ ଡ୍ରେସ୍ ଭାବରେ ଜଣାଶୁଣା, ଏହାକୁ ଶାରଜାହ ଏକ୍ସପୋ ସେଣ୍ଟରରେ ୱାଚ୍ ଆଣ୍ଡ୍ ଜୁଏଲାରୀ ମିଡିଲ ଇଷ୍ଟ ଶୋ'ରେ ପ୍ରଦର୍ଶିତ କରାଯାଇଥିଲା।



ଏହି ପୋଷାକ ଏତେ ଅନନ୍ୟ ଯେ ଏହା କେବଳ ଏକ୍ସପୋ ସେଣ୍ଟରରେ ନୁହେଁ ବରଂ ସାରା ବିଶ୍ୱରେ ଦୃଷ୍ଟି ଆକର୍ଷଣ କରିଛି। 24-କ୍ୟାରେଟ୍ ସୁନାରେ ତିଆରି, ଏହାର ଓଜନ 10 କିଲୋଗ୍ରାମରୁ ଅଧିକ ଏବଂ ଏହାକୁ ଚାରିଟି ଭାଗରେ ସୁନ୍ଦର ଭାବରେ ତିଆରି କରାଯାଇଛି ।

ଡ୍ରେସର ମୂଲ୍ୟ କେତେ?

ଏହି ଅନନ୍ୟ ସୁନା ପୋଷାକ ଆଲ୍ ରୋମାଇଜାନ୍ ଗୋଲ୍ଡ ଆଣ୍ଡ୍ ଜୁଏଲାରୀ କମ୍ପାନୀ ଦ୍ୱାରା ତିଆରି କରାଯାଇଛି। 10.0812 କିଲୋଗ୍ରାମ ଓଜନର, ଏହାର ମୂଲ୍ୟ ଭାରତୀୟ ମୁଦ୍ରାରେ ₹11 କୋଟି । ଫ୍ୟାଶନ୍ ଏବଂ ଅଳଙ୍କାରର ଏକ ଅନନ୍ୟ ଡିଜାଇନ୍ । ଦେଖିବାକୁ ଖୁବ ରାଜକୀୟ ଲାଗୁଥିବାବେଳେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । 

ଚାରି ଭାଗରେ ସମାପ୍ତ

କମ୍ପାନୀ ଏହି ସୁନା ପୋଷାକକୁ ଚାରି ଭାଗରେ ତିଆରି କରିଛି । ଏକ 398 ଗ୍ରାମ ସୁନା ମୁକୁଟ, ଏକ 8,810.60 ଗ୍ରାମ ଷ୍ଟେଟମେଣ୍ଟ ହାର, 134.1 ଗ୍ରାମ କାନଫୁଲ ଏବଂ "ହେୟାର" ନାମକ ଏକ 738.5 ଗ୍ରାମ ସୁନା ଖଣ୍ଡ । ସୁନା ସହିତ ରତ୍ନପଥର ବ୍ୟବହାର କରି ଫୁଲ ମଧ୍ୟ ଖଚିତ ହୋଇଛି ।

ତିଆରି କରିବାକୁ ଲାଗିଲା 980 ଘଣ୍ଟା

ଏହି ସୁନା ପୋଷାକ ଜଟିଳ କାରୁକାର୍ଯ୍ୟ ଏବଂ ମୂଲ୍ୟବାନ ରଙ୍ଗୀନ ରତ୍ନପଥରରେ ସଜ୍ଜିତ । ଏହା UAEର ସାଂସ୍କୃତିକ ଐତିହ୍ୟକୁ ସୁନ୍ଦର ଭାବରେ ପ୍ରଦର୍ଶିତ କରୁଛି । ଏବଂ ଏହାକୁ ତିଆରି କରିବାକୁ କାରିଗରମାନଙ୍କୁ 980 ଘଣ୍ଟା ଲାଗିଥିଲା । ଯାହା ଫଳରେ ଏହା ବିଶ୍ୱର ସବୁଠାରୁ ଅନନ୍ୟ ଡିଜାଇନର୍ ପୋଷାକ ମଧ୍ୟରୁ ଗୋଟିଏ । ଏହା କେବଳ ଏକ ଡେସ୍ ନୁହେଁ ଏହା ପଛରେ ରହିଛି UAEର ଲୋକଙ୍କ କାହାଣୀ । ଦୁବାଇରେ ସାଧାରଣତଃ ସୁନା ଅନ୍ୟ ଦେଶ ଅପେକ୍ଷା କମ୍ ଥାଏ । ଏକପ୍ରକାର ଏହାକୁ ସୁନାର ହବ୍ କୁହାଯାଏ ।

ଏହା ପ୍ରଥମ ଥର ନୁହେଁ ଯେତେବେଳେ ବିଦେଶରେ ତିଆରି ଏକ ଅନନ୍ୟ ଡ୍ରେସ୍ ଲୋକପ୍ରିୟ ହୋଇଛି । କେତେକ ସମୟରେ, ବିଦେଶୀ ବଜାରରେ ମିଳୁଥିବା ଜିନିଷଗୁଡ଼ିକ ବିଶ୍ୱ ବଜାରରେ ହଲ୍ ଚଲ୍ ମଚାଇ ଦିଏ । ସେଥିମଧ୍ୟରୁ ଏହି ସୁନା ଡ୍ରେସ୍ ଏବେ ସମସ୍ତଙ୍କୁ ଆକୃଷ୍ଟ କରୁଛି ।