Scorpion Venom Price / ୧ ଲିଟର ବିଷର ଦାମ ୧୦୦ କୋଟି ! କୋବ୍ରାଠାରୁ ବି ଭୟଙ୍କର ଏହି ବିଛାର ବିଷ

ଦୁନିଆରେ ଏମିତି କିଛି ଜିନିଷ ଅଛି ଯାହା ସୁନା, ହୀରାଠାରୁ ବି ମୂଲ୍ୟବାନ । କିନ୍ତୁ କେବେ ଭାବିଛନ୍ତି କି, ଗୋଟିଏ ଜୀବର ବିଷ ମଧ୍ୟ କୋଟି କୋଟି ଟଙ୍କାର ହୋଇପାରେ ? ଯେଉଁ ବିଷ ମଣିଷର ଜୀବନ ନେଇପାରେ, ସେହି ବିଷର ମୂଲ୍ୟ କାହିଁକି କୋଟି କୋଟି ଟଙ୍କା ? ଆଉ ସବୁଠାରୁ ଆଶ୍ଚର୍ଯ୍ୟର କଥା, ଏହି ବିଷ ଭବିଷ୍ୟତରେ ବ୍ରେନ୍ ଟ୍ୟୁମର ଭଳି ଭୟଙ୍କର ରୋଗର ଚିକିତ୍ସାରେ ମଧ୍ୟ ବୈଜ୍ଞାନିକଙ୍କ ପାଇଁ ଆଶାର କିରଣ ହୋଇପାରେ । ତେବେ କେଉଁ ଜୀବର ବିଷ ଏତେ ମୂଲ୍ୟବାନ ? ଏହା କିପରି ସଂଗ୍ରହ କରାଯାଏ? ଆଉ ଏହି ବିଷରେ ଏମିତି କ’ଣ ରହିଛି, ଯାହା ପାଇଁ ବୈଜ୍ଞାନିକମାନେ ଏତେ ଆଗ୍ରହୀ ?

ଡେଥଷ୍ଟକର୍ ସ୍କର୍ପିଅନ୍‌ର ବିଷକୁ ନେଇ ବୈଜ୍ଞାନିକ ଜଗତରେ ଦୀର୍ଘଦିନ ଧରି ଆଗ୍ରହ ରହିଛି । ଏହି ବିଷର ଅତ୍ୟନ୍ତ ଦୁର୍ଲଭତା ଏବଂ ଜଟିଳ ରାସାୟନିକ ଗଠନ ଯୋଗୁଁ ଏହାର ମୂଲ୍ୟ ବହୁତ ଅଧିକ ବୋଲି କୁହାଯାଏ ।

ଗୋଟିଏ ବିଛାରୁ କେତେ ବିଷ ମିଳେ ?

ଉତ୍ତର ଆଫ୍ରିକା ଏବଂ ମଧ୍ୟପ୍ରାଚ୍ୟର କିଛି ଅଞ୍ଚଳରେ ମିଳୁଥିବା ଏହି ସ୍କର୍ପିଅନ୍‌ର ଶରୀରରେ ବିଷର ପରିମାଣ ଅତ୍ୟନ୍ତ କମ୍ । ଗୋଟିଏ ବିଛାରୁ ଗୋଟିଏ ଥରରେ ମାତ୍ର ୦.୦୦୬ ମିଲିଲିଟର ବିଷ ମିଳିଥାଏ । ଅର୍ଥାତ୍, ୧ ଲିଟର ବିଷ ସଂଗ୍ରହ କରିବା ପାଇଁ ଅସଂଖ୍ୟ ବିଛାର ଆବଶ୍ୟକତା ପଡ଼ିପାରେ । ତେବେ ଏହି ବିଷର ଆନୁମାନିକ ମୂଲ୍ୟ ପ୍ରତି ଲିଟର ପିଛା ପ୍ରାୟ ୧୦୦ କୋଟି ହେବ ବୋଲି କୁହାଯାଉଛି ।

କିନ୍ତୁ କେବଳ ବିଷର ପରିମାଣ କମ୍ ଥିବା ଯୋଗୁଁ ହିଁ ଏହାର ଦାମ ବଢ଼ିଛି ତାହା ନୁହେଁ । ବିଷକୁ ସଂଗ୍ରହ କରିବା, ସୁରକ୍ଷିତ ଭାବେ ରଖିବା ଏବଂ ଗବେଷଣା ପାଇଁ ଶୁଦ୍ଧ ରୂପରେ ପ୍ରସ୍ତୁତ କରିବା ମଧ୍ୟ ଏକ କଷ୍ଟସାଧ୍ୟ ପ୍ରକ୍ରିୟା ।

ତେବେ ବିଷ ବାହାର କରାଯାଏ କିପରି ?

ଏହି ପ୍ରକ୍ରିୟାକୁ ସାଧାରଣତଃ ‘ମିଲ୍କିଂ’ କୁହାଯାଏ । ପ୍ରଶିକ୍ଷିତ ଗବେଷକମାନେ ବିଛାକୁ ଅତ୍ୟନ୍ତ ସାବଧାନତାର ସହିତ ଧରି ବିଷ ସଂଗ୍ରହ କରନ୍ତି । କେତେକ ଗବେଷଣା ପ୍ରକ୍ରିୟାରେ ନିୟନ୍ତ୍ରିତ ହାଲୁକା ଇଲେକ୍ଟ୍ରିକାଲ୍ ଷ୍ଟିମୁଲେସନ୍ ବ୍ୟବହାର କରି ବିଛାକୁ ବିଷ ଛାଡ଼ିବାକୁ ଉତ୍ତେଜିତ କରାଯାଏ । ବିଷ ବାହାରିବା ପରେ ଏହାକୁ ଅତ୍ୟନ୍ତ ସାବଧାନତାର ସହିତ ସଂରକ୍ଷଣ କରାଯାଏ । କାରଣ ଏହାର ଭିତରେ ଥିବା ବିଭିନ୍ନ ପ୍ରୋଟିନ୍ ଓ ପେପ୍ଟାଇଡ୍ ବୈଜ୍ଞାନିକ ଗବେଷଣା ପାଇଁ ବହୁତ ମୂଲ୍ୟବାନ ।
ବୈଜ୍ଞାନିକମାନଙ୍କ ଆଗ୍ରହ କେବଳ ଏହି ବିଷ କେତେ ଭୟଙ୍କର ତାହା ଜାଣିବାରେ ନୁହେଁ । ବରଂ ଏହାର କିଛି ଉପାଦାନକୁ ଚିକିତ୍ସା ବିଜ୍ଞାନରେ କିପରି ବ୍ୟବହାର କରାଯାଇପାରେ, ସେନେଇ ମଧ୍ୟ ଗବେଷଣା ଚାଲିଛି ।

ବିଶେଷକରି ବ୍ରେନ୍ ଟ୍ୟୁମର ଉପରେ ହୋଇଥିବା କିଛି ଗବେଷଣା ବୈଜ୍ଞାନିକମାନଙ୍କ ଆଶା ବଢ଼ାଇଛି । ବିଷର କିଛି ଉପାଦାନ ଟ୍ୟୁମର୍ କୋଷକୁ ଚିହ୍ନଟ କରିବାରେ ସହାୟକ ହୋଇପାରେ ଏବଂ ସର୍ଜରୀ ସମୟରେ ସେହି କୋଷଗୁଡ଼ିକୁ ଅଧିକ ସ୍ପଷ୍ଟ ଭାବରେ ଦେଖାଇବାର ସମ୍ଭାବନା ଉପରେ ଗବେଷଣା ହୋଇଛି ।
ଅର୍ଥାତ୍, ଯେଉଁ ବିଷ ଗୋଟିଏ ପଟେ ମଣିଷ ପାଇଁ ଜୀବନଘାତୀ ହୋଇପାରେ, ସେହି ବିଷର ଅଣୁଗୁଡ଼ିକ ହୁଏତ ଭବିଷ୍ୟତରେ ମଣିଷର ଜୀବନ ବଞ୍ଚାଇବାରେ ମଧ୍ୟ ସାହାଯ୍ୟ କରିପାରେ ।