ଆଇପିଏଲ ୨୦୨୬ର ୩୩ତମ ମ୍ୟାଚ୍ ଗୁଜରାଟ ଟାଇଟନ୍ସ ଏବଂ ଆରସିବି ମଧ୍ୟରେ ଖେଳାଯାଇଥିଲା । ଏହି ମ୍ୟାଚରେ ଗୁଜରାଟ ଅଧିନାୟକ ଶୁବମନ ଗିଲ ୩୨ ରନ୍ କରି ଆଉଟ ହୋଇଥିଲେ । ତାଙ୍କୁ ଆରସିବିର ଲେଗ୍ ସ୍ପିନର ସୂୟଶ ଶର୍ମା ନିଜର ଜାଲରେ ଫସାଇବାରେ ସକ୍ଷମ ହୋଇଥିଲେ । ଗିଲ୍ ୩୨ ରନ୍ କରିଥିଲେ ସତ, କିନ୍ତୁ ସେ ସାଇ ସୁଦର୍ଶନଙ୍କ ସହିତ ୧୨୮ ରନର ପାର୍ଟନରସିପ୍ କରିନେଇଥିଲେ । ଏଣୁ ପାର୍ଟନରସିପ୍ ଭାଙ୍ଗିବା ପାଇଁ ଆରସିବି ପାଇଁ ଏହି ୱିକେଟ୍ ବେଶ ଗୁରୁତ୍ଵପୂର୍ଣ୍ଣ ଥିଲା । କିନ୍ତୁ ଏହାପରେ ପଡ଼ିଆରେ ଯାହା ହେଲା ତାକୁ ନେଇ ଏବେ ବେଶ ଚର୍ଚ୍ଚା ।

୧୩ ତମ ଓଭରରେ ଦେବଦତ୍ତ ପାଡିକଲ ସୂୟଶ ଶର୍ମାଙ୍କ ବୋଲିଂରେ ଶୁବମନ ଗିଲଙ୍କ କ୍ୟାଚ୍ ଧରିଥିଲେ । ଚିନ୍ନାସ୍ୱାମୀ ଷ୍ଟାଡିୟମରେ ସୂୟଶ ଶର୍ମା ଗିଲଙ୍କୁ ଆଉଟ୍ କରିବା ପରେ ସେଲିବ୍ରେସନ କରିଥିଲେ । ଗିଲ୍ ସାଧାରଣତଃ ଶତକ ହାସଲ କରିବା ପରେ ମୁଣ୍ଡ ନୁଆଁଇ ଏକ ନିଆରା ଢଙ୍ଗରେ ସେଲିବ୍ରେସନ କରନ୍ତି । ତେବେ ସୂୟଶ ତାଙ୍କ ୱିକେଟ ନେବା ସମୟରେ ମଧ୍ୟ ଠିକ୍ ସେହିପରି ଢଙ୍ଗରେ ସେଲିବ୍ରେସନ କରି ତାଙ୍କୁ ଚିଡ଼ାଇଥିଲେ । ଗିଲ୍ ୨୦୨୩ରେ ଆରସିବି ବିପକ୍ଷରେ ଶତକ ହାସଲ କରିଥିଲେ । ସେ ଶତକ ହାସଲ କରିବା ପରେ 'ବୋ ଡାଉନ୍' ସେଲିବ୍ରେସନ୍ ମଧ୍ୟ କରିଥିଲେ ।

• ସୋସିଆଲ ମିଡିଆରେ ବେଶ ଚର୍ଚ୍ଚା

ଗିଲଙ୍କୁ କପି କରି ସୂୟଶ ତାଙ୍କ ପରି ସେଲିବ୍ରେସନ୍ କରିବା ପରେ ଏହାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଉଭୟ ଦଳର ଫ୍ୟାନ୍ସ ପରସ୍ପର ମଧ୍ୟରେ ଏହାକୁ ନେଇ ଟାର୍ଗେଟ କରୁଛନ୍ତି । ଗିଲଙ୍କ ଫ୍ୟାନ୍ସ ଏହି ସେଲିବ୍ରେସନ ଲାଗି ସୂୟଶଙ୍କୁ ସମାଲୋଚନା କରିଥିବା ଦେଖିବାକୁ ମିଳିଛି । ସେପଟେ 'ସୂୟଶଙ୍କ ଏପରି ସେଲିବ୍ରେସନର ଆବଶ୍ୟକତା ଥିଲା' ବୋଲି ଜଣେ ଏକ୍ସ ୟୁଜର ଲେଖିଛନ୍ତି ।

This celebration by suyash was much needed pic.twitter.com/Ni95UJiFJ6

— 𝑴𝒆𝒉𝒂𝒌 (@Purple_Petals12) April 24, 2026

• ସାଇ ସୁଦର୍ଶନଙ୍କ ଶତକ ସତ୍ତ୍ୱେ ଗୁଜରାଟ ହାରିଲା

ଏହି ମ୍ୟାଚରେ RCB ଚମତ୍କାର ପ୍ରଦର୍ଶନ କରି ଗୁଜରାଟ ଟାଇଟାନ୍ସକୁ ୫ ୱିକେଟରେ ପରାସ୍ତ କରିଥିଲା । ପ୍ରଥମେ ବ୍ୟାଟିଂ କରି ଗୁଜରାଟ ୩ ୱିକେଟ୍‌ରେ ୨୦୫ ରନ୍ କରିଥିଲା । ଦଳ ପାଇଁ ଓପନର୍ ସାଇ ସୁଦର୍ଶନ ଶତକ ହାସଲ କରିଥିଲେ । ସେ ୫୮ ବଲରେ ୧୧ଟି ଚୌକା ଏବଂ ୫ଟି ଛକା ସହାୟତାରେ ୧୦୦ ରନ୍ କରିଥିଲେ । RCB ୧୯ତମ ଓଭରରେ ଲକ୍ଷ୍ୟ ହାସଲ କରିଥିଲା । ବିରାଟ କୋହଲି ଏବଂ ଦେବଦତ୍ତ ପାଡିକଲ ବିଜୟର ହିରୋ ସାଜିଥିଲେ ।

ପଢନ୍ତୁ ଏହି ଖବର: ଖାତା ଖୋଲିପାରିନଥାନ୍ତେ; ଜୀବନ ଦାନ ପାଇ ମ୍ୟାଚ୍ ଜିତାଇଦେଲେ କୋହଲି

ବିରାଟ ୪୪ ବଲରେ ୮୧ ରନ୍ କରିଥିଲେ, ଯେତେବେଳେ ପାଡିକଲ ୨୭ ବଲରେ ୫୫ ରନ୍ କରିଥିଲେ । ଦୁହେଁ ୫୯ ବଲରେ ଦ୍ୱିତୀୟ ୱିକେଟ୍‌ ପାଇଁ ୧୧୫ ରନ୍ ଯୋଡ଼ିଥିଲେ । ଡିଫେଣ୍ଡିଂ ଚାମ୍ପିଅନ୍ RCB ୭ ମ୍ୟାଚରେ ୫ ବିଜୟ ସହିତ ୧୦ ପଏଣ୍ଟ୍‌ ପାଇଛି ଏବଂ ଟେବୁଲ୍‌ରେ ଦ୍ୱିତୀୟ ସ୍ଥାନରେ ଅଛି । ସେପଟେ ଚଳିତ ଟୁର୍ଣ୍ଣାମେଣ୍ଟରେ ୭ଟି ମ୍ୟାଚ୍‌ ପରେ ଗୁଜରାଟର କେବଳ ୬ ପଏଣ୍ଟ୍‌ ହାସଲ କରିଛି । ଦଳର ନେଟ୍‌ ରେଟ୍‌ ମଧ୍ୟ ନକାରାତ୍ମକ, ଯାହା ଯୋଗୁଁ ଦଳ ଟେବୁଲରେ ସପ୍ତମ ସ୍ଥାନରେ ଅଛି ।