Argus News - ଜିତିବା ପରେ ବି ଝଟକା; ଲକ୍ଷ ଲକ୍ଷ ଫାଇନ ଗଣିବେ ଶୁବମନ ଗିଲ୍

ଇଣ୍ଡିଆନ ପ୍ରିମିୟର ଲିଗ୍ (IPL)ର ଚଳିତ ସିଜିନରେ ଗୁଜୁରାଟ ଟାଇଟନ୍ସ ନାଟକୀୟ ବିଜୟ ହାସଲ କରିଛି । ଦଳ ଚଳିତ ସିଜିନରେ ନିଜର ବିଜୟର ଖାତା ଖୋଲିଥିବାବେଳେ ବିପକ୍ଷ ଟିମ ଦିଲ୍ଲୀ କ୍ୟାପିଟାଲ୍ସକୁ ୧ ରନରେ ହରାଇ ହ୍ୟାଟ୍ରିକ୍ ବିଜୟ ହାସଲ କରିବାରେ ଦଳକୁ ରୋକିଛି । ମାତ୍ର ବିଜୟ ସହିତ ଅଧିନାୟକ ଶୁବମନ ଗିଲଙ୍କୁ ଲାଗିଛି ଝଟକା । ଏବେ ଲକ୍ଷ ଲକ୍ଷ ଫାଇନ ଗଣିବେ ଗିଲ୍ ।

ମ୍ୟାଚରେ ଗୁଜୁରାଟ ଟାଇଟନ୍ସ ପ୍ରଥମେ ବ୍ୟାଟିଂ କରି ୨୧୧ ରନର ଏକ ବଡ଼ ସ୍କୋର କରିଥିଲା । ଏହାର ଜବାବରେ ଦିଲ୍ଲୀ କ୍ୟାପିଟାଲ୍ସ ଚମତ୍କାର ସଂଘର୍ଷ କରି ୧୯ ଓଭରରେ ୬ ୱିକେଟ୍ ହରାଇ ୧୯୮ ରନ୍ କରିଥିଲେ । ଶେଷ ଓଭରରେ ଦିଲ୍ଲୀକୁ ଜିତିବା ଲାଗି ଆବଶ୍ୟକ ଥିଲା ୧୩ ରନ୍ । ଲାଗୁଥିଲା ଯେପରି ଏହି ମୁକାବିଲା ସମ୍ପୂର୍ଣ୍ଣ ଭାବେ ଦିଲ୍ଲୀ ସପକ୍ଷରେ ରହିଛି । କିନ୍ତୁ ଠିକ୍ ଏହି ସମୟରେ ଦିଲ୍ଲୀ ଉପରେ ଗୁଜୁରାଟର ଧିମା ଓଭରର ପ୍ରଭାବ ପଡ଼ିଥିଲା । ଫଳରେ ଦିଲ୍ଲୀ ହ୍ୟାଟ୍ରିକ ବିଜୟ ହାସଲ କରିବାରୁ ବଞ୍ଚିତ ହୋଇଛି ।

• ସ୍ଲୋ ଓଭର ରେଟର ଉଲ୍ଳଙ୍ଘନ

ନିୟମ ଅନୁସାରେ, ଯଦି କୌଣସି ଦଳ ନିର୍ଦ୍ଧାରିତ ସମୟ ମଧ୍ୟରେ ତାଙ୍କର ସମ୍ପୂର୍ଣ୍ଣ ୨୦ ଓଭର ପୂରଣ କରିବାରେ ବିଫଳ ହୁଏ, ତେବେ ଇନିଂସର ଶେଷ ଓଭର ସମୟରେ ୩୦-ୟାର୍ଡ ସର୍କଲ ଭିତରେ ଜଣେ ଅତିରିକ୍ତ ଫିଲ୍ଡର ରଖିବା ପାଇଁ ସେମାନଙ୍କୁ ଦଣ୍ଡିତ କରାଯାଏ । ଏହାର ଅର୍ଥ ହେଉଛି ସୀମାରେ ଜଣେ କମ୍ ଫିଲ୍ଡର, ଯାହା ବିପକ୍ଷ ଦଳ ପାଇଁ ବଡ଼ ସଟ୍ ମାରିବା ସହଜ କରିଥାଏ । ଏହାପରେ ବି ଗୁଜୁରାଟ ଟାଇଟନ୍ସ ବିଜୟ ହାସଲ କରିଛି ।

• ଗିଲଙ୍କ ଉପରେ ୧୨ ଲକ୍ଷ ଜୋରିମାନା

ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଚଳିତ ଆଇପିଏଲ ସିଜିନର ୧୪ତମ ମ୍ୟାଚ୍ ସମୟରେ ସ୍ଲୋ ଓଭର-ରେଟ୍ ପାଇଁ ଗୁଜୁରାଟର ଅଧିନାୟକ ଗିଲଙ୍କୁ ଜୋରିମାନା କରାଯାଇଛି । ଏହା ଚଳିତ ସିଜନରେ ଦଳର IPL ଆଚରଣ ସଂହିତା ୨.୨୨ର ପ୍ରଥମ ଉଲ୍ଲଂଘନ ଥିଲା, ଯାହା ଫଳରେ ସର୍ବନିମ୍ନ ଜୋରିମାନା ଲାଗୁ ହୋଇଛି । ଗିଲଙ୍କୁ ୧୨ ଲକ୍ଷ ଜୋରିମାନା କରାଯାଇଛି । ଯଦି ସେ ପୁଣି ଥରେ ଏହି ଭୁଲକୁ ଦୋହରାନ୍ତି, ତେବେ ଜୋରିମାନା ଶୁଳ୍କ ବଢାଇ ଦିଆଯିବ ବୋଲି IPL ଏକ ବିବୃତ୍ତିରେ କହିଛି ।

• ଗୁଜୁରାଟ ଟାଇଟନ୍ସର ପ୍ରଥମ ବିଜୟ

ପ୍ରସିଦ୍ଧ କୃଷ୍ଣଙ୍କ ଶେଷ ଓଭରରେ ଚମତ୍କାର ବୋଲିଂ ଓ ଡେଭିଡ ମିଲରଙ୍କ ସେହି ଗୋଟିଏ ଭୁଲ ପାଇଁ ମାତ୍ର ୧ ରନରେ ଦିଲ୍ଲୀକୁ ପରାସ୍ତ କରି ଗୁଜୁରାଟ ସିଜିନରେ ପ୍ରଥମ ବିଜୟ ହାସଲ କରିଛି । ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଖେଳାଯାଉଥିବା ଏହି ମ୍ୟାଚଟି ବେଶ ରୋମାଞ୍ଚକର ଥିଲା । ଶେଷ ଓଭରର ପ୍ରଥମ ବଲରେ ବିପରାଜ ନିଗମ ଚୌକା ମାରିଥିଲେ, କିନ୍ତୁ ପର ବଲରେ ସେ ରନ୍ ଆଉଟ୍ ହୋଇଥିଲେ । ଏହାପରେ କୁଲଦୀବ ଯାଦବ ମଇଦାନକୁ ଓହ୍ଲାଇଥିଲେ ଓ ସିଙ୍ଗଲ ନେଇ ଷ୍ଟ୍ରାଇକ୍ ଡେଭିଡ ମିଲରଙ୍କୁ ଦେଇଥିଲେ ।

ପଢନ୍ତୁ ଏହି ଖବର: ପ୍ରତି IPL ସିଜିନରେ ୨୪୦୦ କୋଟି କ୍ଷତି ସହୁଛି BCCI; ଲଲିତ ମୋଦିଙ୍କ ଖୁଲାସା

ମିଲର ଚତୁର୍ଥ ବଲରେ ଛକା ମାରି ମ୍ୟାଚକୁ ଦିଲ୍ଲୀ ସପକ୍ଷକୁ ଆଣିଥିଲେ । ଏବେ ଶେଷ ୨ ବଲରେ ମାତ୍ର ୨ ରନ ଆବଶ୍ୟକ ଥିଲା । ମାତ୍ର ୫ ନଂ ବଲରେ କୌଣସି ରନ୍ ଆସିନଥିଲା ଓ ଶେଷ ବଲରେ କୁଲଦୀପ ଯାଦବ ରନ୍ ଆଉଟ୍ ହୋଇଥିଲେ । ଏହିପରି ଭାବରେ ଦିଲ୍ଲୀ ୨୦ ଓଭରରେ ୮ ୱିକେଟ୍ ହରାଇ ୨୦୯ ରନ୍ କରିଥିଲା ଓ ୧ ରନରେ ପରାଜିତ ହୋଇଛି ।