ଆଇପିଏଲ ୨୦୨୬ରେ ଅରେଞ୍ଜ କ୍ୟାପ୍ ପାଇଁ ଦୌଡ଼ ବେଶ ଆକର୍ଷଣୀୟ ହେବାରେ ଲାଗିଛି। ପ୍ରତ୍ୟେକ ମ୍ୟାଚ୍ ପରେ ଅରେଞ୍ଜ କ୍ୟାପ୍ ବିଜେତା ପରିବର୍ତ୍ତନ ହେଉଛି । ୨୫ ଏପ୍ରିଲ, ୨୦୨୬ରେ ଏକ ଐତିହାସିକ ରେକର୍ଡ ଦେଖିବାକୁ ମିଳିଥିଲା। IPL ଇତିହାସରେ ଗୋଟିଏ ଦିନରେ ୩-୩ଥର ବଦଳିଥିଲେ ଅରେଞ୍ଜ କ୍ୟାପ୍ ବିଜେତା । ଦିନକ ପୂର୍ବରୁ ଯୁବ ଖେଳାଳିଙ୍କୁ ପଛରେ ପକାଇ କିଙ୍ଗ କୋହଲିଙ୍କ ମୁଣ୍ଡରେ ସଜେଇ ହୋଇଥିଲା ଅରେଞ୍ଜ ତାଜ୍ । ହେଲେ ଶନିବାର ମ୍ୟାଚରେ ଜଣକ ପରେ ଜଣେ ୩ଜଣ ଖେଳାଳି ଏହି କ୍ୟାପର ଅଧିକାରୀ ହୋଇଛନ୍ତି ।

ଶନିବାର ମୋଟ ଦୁଇଟି ମ୍ୟାଚ୍ ଖେଳାଯାଇଥିଲା । ପୂର୍ବରୁ, ବିରାଟ କୋହଲି ୩୨୮ ରନ ସହିତ ଅରେଞ୍ଜ କ୍ୟାପ୍ ର ବିଜେତା ଥିଲେ । ଅପରାହ୍ନରେ ଦିଲ୍ଲୀ କ୍ୟାପିଟାଲ୍ସ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଏକ ମ୍ୟାଚ୍ ଖେଳାଯାଇଥିଲା । ଏହି ମ୍ୟାଚରେ, କେଏଲ ରାହୁଲ ୧୫୨ ରନର ଏକ ଚମତ୍କାର ଇନିଂସ ଖେଳି ବିରାଟ କୋହଲିଙ୍କୁ ପଛରେ ପକାଇ ୩୫୭ ରନ ସହିତ ଅରେଞ୍ଜ କ୍ୟାପ୍ ଦଖଲ କରିଥିଲେ ।

• ବୈଭବ ଏବଂ ଅଭିଷେକ ମଧ୍ୟ ଅରେଞ୍ଜ କ୍ୟାପ୍ ରେସ୍

ଏହାପରେ ସନ୍ଧ୍ୟାରେ, ରାଜସ୍ଥାନ ରୟାଲ୍ସ ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଏକ ମ୍ୟାଚ୍ ଖେଳାଯାଇଥିଲା । ବୈଭବ ସୂର୍ଯ୍ୟବଂଶୀ ପ୍ରଥମ ଇନିଂସରେ ଏକ ଚମତ୍କାର ଶତକ ହାସଲ କରିଥିଲେ ଏବଂ ୩୫୭ ରନ ସହିତ ଅରେଞ୍ଜ କ୍ୟାପ୍ ଜିତିଥିଲେ । ତାଙ୍କର ଷ୍ଟ୍ରାଇକ୍ ରେଟ୍ କେଏଲ ରାହୁଲଙ୍କ ଅପେକ୍ଷା ଭଲ ଥିଲା । ଏହା ସମାନ ସଂଖ୍ୟକ ରନ ସତ୍ତ୍ୱେ ସୂର୍ଯ୍ୟବଂଶୀଙ୍କୁ କ୍ୟାପ୍ ବଜାୟ ରଖିବାରେ ସାହାଯ୍ୟ କରିଥିଲା ।

ପଢନ୍ତୁ ଏହି ଖବର: ଯୁବବର୍ଗଙ୍କୁ ପଛରେ ପକାଇ ଅରେଞ୍ଜ କ୍ୟାପ୍ ପିନ୍ଧିଲେ ବିରାଟ; ଜାଣନ୍ତୁ ରେସରେ କିଏ ?

ତଥାପି, ସେ ଅଧିକ ସମୟ ପାଇଁ ଟାଇଟଲ ବଜାୟ ରଖିପାରିଲେ ନାହିଁ । ପରବର୍ତ୍ତୀ ଇନିଂସରେ, ଅଭିଷେକ ଶର୍ମା ୫୭ ରନ କରିଥିଲେ ଏବଂ ୮ଟି ମ୍ୟାଚରେ ୩୮୦ ରନ ସହିତ ଅରେଞ୍ଜ କ୍ୟାପ୍ ବୈଭବଙ୍କ ନିକଟରୁ ଛଡ଼ାଇ ନେଇଥିଲେ । ଆଇପିଏଲ ଇତିହାସରେ ଏହା ପ୍ରଥମ ଥର ଥିଲା ଯେ ଗୋଟିଏ ଦିନରେ ଅରେଞ୍ଜ କ୍ୟାପର ବିଜେତା ତିନି ତିନି ଜଣ ଖେଳାଳି ହୋଇଥିଲେ ଅର୍ଥାତ୍ ଗୋଟିଏ ଦିନରେ ତିନି ଜଣ ଭିନ୍ନ ଖେଳାଳି ଅରେଞ୍ଜ କ୍ୟାପ୍ ଜିତିଥିଲେ ।

• ଏବେ କାହା ପାଖରେ ପର୍ପଲ କ୍ୟାପ୍ ?

ଚଳିତ ଆଇପିଏଲ ଟୁର୍ଣ୍ଣାମେଣ୍ଟରେ ପର୍ପଲ କ୍ୟାପ ଏବେ ଚେନ୍ନାଇ ସୁପରକିଙ୍ଗସ ବୋଲର ଅଂଶୁଲ କମ୍ଵୋଜଙ୍କ ନିକଟରେ ଅଛି । ସେ ୭ଟି ମ୍ୟାଚରେ ମୋଟ ୧୪ଟି ୱିକେଟ୍ ନେଇ ତାଲିକାରେ ଶୀର୍ଷରେ ଅଛନ୍ତି । ତାଙ୍କ ପଛକୁ ଅଛନ୍ତି ସନରାଇଜର୍ସ ହାଇଦ୍ରାବାଦ ଟିମର ବୋଲର ଇଶାନ ମାଲିଙ୍ଗା । ସେ ୮ଟି ମ୍ୟାଚ୍ ଖେଳି ମୋଟ ୧୪ଟି ୱିକେଟ୍ ନେଇଛନ୍ତି । ସେହିପରି ତୃତୀୟରେ ରାଜସ୍ଥାନ ରୟାଲ୍ସର ଜୋଫ୍ରା ଆର୍ଚର, ଯିଏକି ୮ଟି ମ୍ୟାଚ୍ ଖେଳି ୧୩ଟି ୱିକେଟ୍ ନିଜ ନାମରେ କରିଛନ୍ତି । ଚତୁର୍ଥରେ ଲକ୍ଷ୍ନୌର ପ୍ରିନ୍ସ ଯାଦବ, ଯିଏକି ୭ଟି ମ୍ୟାଚ୍ ଖେଳି ୧୩ଟି ୱିକେଟ୍ ଓ ପଞ୍ଚମରେ ଗୁଜରାଟ ଟାଇଟନ୍ସର ପ୍ରଶିଦ୍ଧ କ୍ରୀଷ୍ଣା ଅଛନ୍ତି, ଯିଏକି ୭ଟି ମ୍ୟାଚ୍ ଖେଳି ୧୨ଟି ୱିକେଟ୍ ହାସଲ କରିଛନ୍ତି ।