Argus News - ଖେଳାଳିଙ୍କ ଉପରେ ବର୍ଷିଲେ ସୁନୀଲ ଗାଭାସ୍କର, କହିଲେ ଯଦି ଫିଟ୍‌ ନାହଁ ତାହେଲେ ପଳାଅ...

ପୁଣି ମୁହଁ ଖୋଲିଲେ ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ତଥା କିମ୍ବଦନ୍ତୀ ଖେଳାଳି ସୁନୀଲ ଗାଭାସ୍କର। ଆଇପିଏଲ୍ (IPL) ୨୦୨୬ ରେ ଏକ ନୂଆ ବିତର୍କର ସୂତ୍ରପାତ କରିଛନ୍ତି। ଯେଉଁ ଖେଳାଳିମାନେ ନିଜର ନିର୍ଦ୍ଧାରିତ ଭୂମିକା ସମ୍ପୂର୍ଣ୍ଣ ରୂପେ ତୁଲାଉ ନାହାଁନ୍ତି କିମ୍ବା 'ୱାର୍କଲୋଡ୍ ମ୍ୟାନେଜମେଣ୍ଟ' ବାହାନା ଦେଖାଇ ବୋଲିଂ କରୁନାହାଁନ୍ତି। ବିଶ୍ୱର ଅନ୍ୟ କୌଣସି ଟି-୨୦ ଲିଗରେ ଖେଳାଳିଙ୍କ ନିଲାମ ଅର୍ଥକୁ କ୍ରିକେଟ୍ ବୋର୍ଡ ସହ ଅଂଶୀଦାର କରିବାର ଏଭଳି ସ୍ୱତନ୍ତ୍ର ବ୍ୟବସ୍ଥା ନାହିଁ ବୋଲି ଗାଭାସ୍କର ସ୍ପଷ୍ଟ କରିଛନ୍ତି। 'ସ୍ପୋର୍ଟଷ୍ଟାର୍' ପତ୍ରିକାରେ ନିଜର ଏକ ସ୍ତମ୍ଭରେ ଗାଭାସ୍କର ଲେଖିଛନ୍ତି ଯେ, ଅଲରାଉଣ୍ଡରମାନେ ନିଜର ଉଭୟ ଦକ୍ଷତା (ବ୍ୟାଟିଂ ଓ ବୋଲିଂ) ପାଇଁ ଦଳରେ ସାମିଲ ହେଉଛନ୍ତି, କିନ୍ତୁ କେବଳ ବ୍ୟାଟର ଭାବେ ଖେଳିବାର ଟ୍ରେଣ୍ଡ୍ ଏବେ ବଢ଼ିବାରେ ଲାଗିଛି।

ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ବିସିସିଆଇ (BCCI) କୁ ଅନୁରୋଧ କରିଛନ୍ତି। ବିଶେଷ କରି କୋଲକାତା ନାଇଟ୍ ରାଇଡର୍ସର (KKR) ଅଲରାଉଣ୍ଡର କାମେରନ୍ ଗ୍ରୀନ୍ ବୋଲିଂ ନକରିବା ଘଟଣାକୁ ନେଇ ସେ ତୀବ୍ର କ୍ଷୋଭ ପ୍ରକାଶ କରିଛନ୍ତି। ଖେଳାଳିଙ୍କ ବ୍ୟତୀତ ବିଦେଶୀ କ୍ରିକେଟ୍ ବୋର୍ଡଗୁଡ଼ିକ ମଧ୍ୟ ଆଇପିଏଲରୁ କିପରି ମାଲାମାଲ୍ ହେଉଛନ୍ତି, ସେନେଇ ଗାଭାସ୍କର ବଡ଼ ଖୁଲାସା କରିଛନ୍ତି। 'ନୋ ଅବଜେକ୍ସନ୍ ସାର୍ଟିଫିକେଟ୍' (NOC) ପ୍ରଦାନ କରିବା ବାବଦକୁ ବିଦେଶୀ ବୋର୍ଡଗୁଡ଼ିକୁ ସେମାନଙ୍କ ଖେଳାଳିଙ୍କ ମୋଟ ଅକ୍ସନ୍ ମୂଲ୍ୟର ପ୍ରାୟ ୧୦ ପ୍ରତିଶତ ମିଳିଥାଏ।

ଏଥିସହ ପଢ଼ନ୍ତୁ: ପ୍ରତି IPL ସିଜିନରେ ୨୪୦୦ କୋଟି କ୍ଷତି ସହୁଛି BCCI; ଲଲିତ ମୋଦିଙ୍କ ଖୁଲାସା

ଗାଭାସ୍କର ବିସିସିଆଇକୁ ଅଧିକ କଠୋର ହେବାକୁ ପରାମର୍ଶ ଦେଇଛନ୍ତି। ଅକ୍ସନରେ ବିକ୍ରି ହେବା ପରେ ଟୁର୍ଣ୍ଣାମେଣ୍ଟରୁ ଓହରି ଯାଉଥିବା ବିଦେଶୀ ଖେଳାଳିଙ୍କ ଉପରେ ବିସିସିଆଇ ଯେପରି ୨ ବର୍ଷର ବାସନ୍ଦାଦେଶ ଲଗାଉଛି, ପ୍ରଥମ ମ୍ୟାଚରୁ ସମ୍ପୂର୍ଣ୍ଣ ଦାୟିତ୍ୱ ତୁଲାଇବାକୁ ଉପଲବ୍ଧ ନଥିବା ଖେଳାଳିଙ୍କ ପାଇଁ ମଧ୍ୟ ଅନୁରୂପ ନିୟମ ଆଣିବା ଦରକାର ବୋଲି ସେ ଯୁକ୍ତି ବାଢ଼ିଛନ୍ତି।

.ଗାଭାସ୍କରଙ୍କ ରିପୋର୍ଟ ଅନୁଯାୟୀ କେଉଁ ବୋର୍ଡ କେତେ ଟଙ୍କା ପାଇଛନ୍ତି:

ଅଷ୍ଟ୍ରେଲିଆ: ୧୬ ଜଣ ଖେଳାଳି (୧୨୧.୬୫ କୋଟି ଟଙ୍କା), ଇଂଲଣ୍ଡ: ୧୨ ଜଣ ଖେଳାଳି (୬୮ କୋଟି ଟଙ୍କା), ଦକ୍ଷିଣ ଆଫ୍ରିକା: ୧୭ ଜଣ ଖେଳାଳି (୭୧ କୋଟି ଟଙ୍କା), ୱେଷ୍ଟଇଣ୍ଡିଜ୍: ୮ ଜଣ ଖେଳାଳି (ପ୍ରାୟ ୫୯ କୋଟି ଟଙ୍କା), ନ୍ୟୁଜିଲାଣ୍ଡ: ୧୨ ଜଣ ଖେଳାଳି (୩୩ କୋଟିରୁ ଅଧିକ ଟଙ୍କା)।"ଫ୍ରାଞ୍ଚାଇଜିମାନେ ଖେଳାଳିଙ୍କ ପଛରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି, ତେଣୁ ସେମାନେ ଖେଳାଳିଙ୍କଠାରୁ ୧୦୦% କମିଟମେଣ୍ଟ୍ (Commitment) ପାଇବାର ହକ୍‌ଦାର" ବୋଲି ସେ ଦର୍ଶାଇଛନ୍ତି।

.'ଫିଟ୍ ନଥିଲେ ଖେଳନ୍ତୁ ନାହିଁ':

ସେ ପ୍ରଶ୍ନ କରିଛନ୍ତି, "ଗୋଟିଏ ମ୍ୟାଚରେ ଜଣେ ବୋଲରଙ୍କୁ ମାତ୍ର ୪ ଓଭର ବୋଲିଂ କରିବାକୁ ପଡ଼େ। ଏତିକି କରିବାକୁ ସେମାନଙ୍କୁ କିଏ ଅଟକାଉଛି?"ଗାଭାସ୍କର ସ୍ପଷ୍ଟ କରିଛନ୍ତି ଯେ, ଯେଉଁ ଖେଳାଳିମାନେ ସମ୍ପୂର୍ଣ୍ଣ ଫିଟ୍ ନାହାଁନ୍ତି, ସେମାନେ ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ଓହରିଯିବା ଉଚିତ୍। "ଯଦି ଜଣେ ଖେଳାଳି ପ୍ରଥମ ଦିନରୁ ଫିଟ୍ ନାହାଁନ୍ତି, ତେବେ ତାଙ୍କୁ ଖେଳିବା ଦରକାର ନାହିଁ। ଏହାଦ୍ୱାରା ଫ୍ରାଞ୍ଚାଇଜି ଅନ୍ୟ କୌଣସି ଖେଳାଳିଙ୍କୁ ବାଛିବାର ସୁଯୋଗ ପାଇବ।" "ଫ୍ରାଞ୍ଚାଇଜିକୁ ପୂର୍ବରୁ ଜଣାଇ ଦିଆଯାଇଥିଲା" ବୋଲି ଯେଉଁ ଯୁକ୍ତି ବଢ଼ାଯାଉଛି, ତାହାକୁ ଗାଭାସ୍କର ଏକ 'ବଡ଼ ବାହାନା' ବୋଲି କହିଛନ୍ତି। ସୂଚନାଯୋଗ୍ୟ ଯେ, କାମେରନ୍ ଗ୍ରୀନ୍ ବୋଲିଂ ନକରିବା ପ୍ରସଙ୍ଗରେ ଆଜିଙ୍କ୍ୟ ରାହାଣେ 'କ୍ରିକେଟ୍ ଅଷ୍ଟ୍ରେଲିଆ (CA) କୁ ପଚାର' ବୋଲି ମନ୍ତବ୍ୟ ଦେବା ପରେ କ୍ରିକେଟ୍ ଅଷ୍ଟ୍ରେଲିଆ ସ୍ପଷ୍ଟୀକରଣ ଦେଇ କହିଥିଲା ଯେ ଏ ସମ୍ପର୍କରେ ଫ୍ରାଞ୍ଚାଇଜିକୁ ଆଗରୁ ଜଣାଯାଇଥିଲା।

ଅଧିକ ପଢ଼ନ୍ତୁ ଖେଳ ଖବର: