Argus News - ପ୍ରତି IPL ସିଜିନରେ ୨୪୦୦ କୋଟି କ୍ଷତି ସହୁଛି BCCI; ଲଲିତ ମୋଦିଙ୍କ ଖୁଲାସା

ଆଇପିଏଲର ପୂର୍ବତନ ଚେୟାରମ୍ୟାନ ଲଲିତ ମୋଦି ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (BCCI) ଓ ଆଇପିଏଲ ଫ୍ରାଞ୍ଚାଇଞ୍ଚଗୁଡ଼ିକ ଉପରେ ବର୍ଷିଛନ୍ତି । ପ୍ରତି ଆଇପିଏଲ ସିଜିନରେ ବିସିସିଆଇ ଓ ଆଇପିଏଲ ଫ୍ରାଞ୍ଚାଇଞ୍ଚଗୁଡ଼ିକ ପ୍ରାୟ ୨୪୦୦ କୋଟି ଟଙ୍କାର କ୍ଷତି ସହୁଥିବା ସେ ଦାବି କରିଛନ୍ତି । ଦୁଇଟି ନୂଆ ଟିମକୁ ସାମିଲ କରିବା ପରେ ମଧ୍ୟ ମ୍ୟାଚ ସଂଖ୍ୟାକୁ ୭୪ ପର୍ଯ୍ୟନ୍ତ ସୀମିତ ରଖାଯାଇଛି । ଏହାସହିତ ହୋମ୍-ଏଣ୍ଡ-ଆୱେ ଫର୍ମାଟକୁ ଲାଗୁ କରିବାକୁ ସେ ଦାବି କରିଛନ୍ତି ।

• କାହିଁକି କ୍ଷତି ସହୁଛି BCCI ?

ବିସିସିଆଇ ସହ ମିଶି ଆଇପିଏଲ ଆରମ୍ଭ କରିଥିବା ଲଲିତ ମୋଦିଙ୍କ କହିବା କଥା ହେଉଛି, ପ୍ରାରମ୍ଭରୁ ଏହା ନିଷ୍ପତ୍ତି ନିଆଯାଇଥିଲା ଯେ ପ୍ରତି ସିଜିନରେ ଟିମଗୁଡ଼ିକ ପରସ୍ପର ସହିତ ଦୁଇଟି ଲେଖାଏଁ ମ୍ୟାଚ୍ (ହୋମ୍-ଆୱେ) ଖେଳିବେ । ୨୦୨୨ ଲିଗରେ ଆଇପିଏଲ ଟିମ ସଂଖ୍ୟା ୧୦କୁ ବଢିବା ପରେ ନିୟମ ମୁତାବକ ୯୦ଟି ମ୍ୟାଚ୍ ଖେଳାଯିବା କଥା ଏବଂ ଏହାବ୍ୟତୀତ ୪ଟି ନକ୍ ଆଉଟ୍ ମ୍ୟାଚ୍ ଖେଳାଯିବାର ଥିଲା । ମାତ୍ର ଆଇପିଏଲରେ 'ହୋମ୍-ଆଣ୍ଡ-ଆୱେ' ବ୍ୟବସ୍ଥାରେ ପରିବର୍ତ୍ତନ କରାଯାଇ କେବଳ ୭୪ଟି ମ୍ୟାଚ୍ ଖେଳାଯାଉଛି ।

ପଢନ୍ତୁ ଏହି ଖବର: ଆଜି IPLରେ ହେବ ଅସଲ ଲଢ଼େଇ....ବୈଭବ ଆଜି ବିଶ୍ୱର ଶ୍ରେଷ୍ଠ ପେସ୍ ବୋଲର ବୁମରାଙ୍କୁ ଭେଟିବେ

ସ୍ପୋର୍ଟ୍ସଷ୍ଟାରରେ ଆଲୋଚନା ସମୟରେ ଲଲିତ ମୋଦି କହିଛନ୍ତି, "ପ୍ରତି ମ୍ୟାଚରେ ହେଉଥିବା ରୋଜଗାରର ୫୦ ପ୍ରତିଶତ ବିସିସିଆଇକୁ ମିଳିଥାଏ ଓ ବାକି ୫୦ ପ୍ରତିଶତ ଟିମଗୁଡ଼ିକ ମଧ୍ୟରେ ବଣ୍ଟାଯାଏ । ଏବେ ନିୟମରେ ପରିବର୍ତ୍ତନ ଯୋଗୁଁ ଟିମଗୁଡ଼ିକ ପ୍ରତି ସିଜିନରେ ୨୦ଟି ମ୍ୟାଚର ରୋଜଗାର ହରାଉଛନ୍ତି । ଏହା ଏକ ଚୁକ୍ତିନାମାର ଦାୟିତ୍ଵ ଯେ ଟିମଗୁଡ଼ିକ ଯେତିକି ଅର୍ଥ ଦେଉଛନ୍ତି, ସେହି ଅନୁସାରେ ସେମାନଙ୍କୁ ହୋମ୍-ଆଣ୍ଡ-ଆୱେ ମ୍ୟାଚ୍ ଖେଳିବାର ସୁଯୋଗ ମିଳୁ ।"

• 'ଆମେ ଏମିତି IPL ବିକିନଥିଲୁ'

ଲଲିତ ମୋଦି ଆହୁରି କହିଛନ୍ତି, "ଆଇପିଏଲର ପ୍ରକୃତ ଅର୍ଥ ହୋମ୍-ଆଣ୍ଡ-ଆୱେ ବ୍ୟବସ୍ଥାରେ ଲୁଚି ରହିଛି । ଯଦି ଆପଣଙ୍କ କ୍ୟାଲେଣ୍ଡରରେ ମ୍ୟାଚ ଲାଗି ଜାଗା ନାହିଁ, ତେବେ ଆପଣଙ୍କୁ ଟିମ ସଂଖ୍ୟା ବୃଦ୍ଧି କରିବାର ଆବଶ୍ୟକତା ନଥିଲା । ସିଧା କଥା ହେଉଛି ଆମେ ଏପରି ଆଇପିଏଲ ବିକିନଥିଲୁ । ଏହି ନୂଆ ନିୟମ ଲାଗି କଣ ସବୁ ଟିମ ରାଜି ହୋଇଛନ୍ତି କି ? ଏପରି ଆଦୌ ହୋଇନଥିବ ବୋଲି ମୁଁ ଗ୍ୟାରେଣ୍ଟି ଦେଉଛି ।"

• ୨୪୦୦କୋଟି କ୍ଷତି ସହୁଛି BCCI

ବିସିସିଆଇ ଓ ଆଇପିଏଲ ମ୍ୟାଚଗୁଡ଼ିକ ପ୍ରତି ସିଜିନରେ ୨୪୦୦ କୋଟି ଟଙ୍କା କ୍ଷତି ସହୁଥିବା ଲଲିତ ମୋଦି କହିଛନ୍ତି । ଏ ନେଇ ସେ କହିଛନ୍ତି, "ଯଦି ଆଜି ହୋମ୍-ଆଣ୍ଡ-ଆୱେ ଆଧାରରେ ୯୪ଟି ମ୍ୟାଚ୍ ଖେଳାଯାଉଥାନ୍ତା ଏବଂ ପ୍ରତି ମ୍ୟାଚରେ ରୋଜଗାର ୧୧୮ କୋଟି ହୁଅନ୍ତା ତେବେ ସମସ୍ତ ମ୍ୟାଚ୍ ଶେଷ ହେବା ପରେ କେବଳ ଗଣମାଧ୍ୟମ ଅଧିକାରରୁ ୨୪୦୦ କୋଟି ଟଙ୍କା ରୋଜଗାର ହେବ । ଏହି ୨୪୦୦ କୋଟି ଟଙ୍କା ବିସିସିଆଇକୁ ଯିବ । ଏଥିରୁ ୧୨୦୦ କୋଟି ଟଙ୍କା ୧୦ଟି ଦଳକୁ ଯିବ, ପ୍ରତ୍ୟେକ ଦଳକୁ ୧୨୦ କୋଟି ଟଙ୍କା ମିଳିବ ଏବଂ ଦଳର ମୂଲ୍ୟ ସ୍ୱୟଂଚାଳିତ ଭାବରେ ବୃଦ୍ଧି ପାଇବ ।"