World Expensive Mattress / ବିଶ୍ୱର ସବୁଠାରୁ ମହଙ୍ଗା ଗଦି, ତିଆରି କରିବାକୁ ଲାଗେ ୨୫ ଦିନ, କଣ ଏଥିରେ ଖାସ୍

ଆରାମରେ ଶୋଇବା ପାଇଁ ଆମେ ଖଟ ଉପରେ ଗଦି ପକାଉ । ଆଜିକାଲି ବଜାରରେ ଭିନ୍ନ ଭିନ୍ନ ବ୍ରାଣ୍ଡର ଗଦି ମିଳୁଛି । ପୁରାତନ କାଳରେ ଲୋକେ ପୁରୁଣା କପଡ଼ାରୁ ତିଆରି କରୁଥିଲେ କନ୍ଥା । ଆଉ ତାହାକୁ ଗଦି ପରି ବ୍ୟବହାର କରୁଥିଲେ । ମାତ୍ର ଏବେ ବଜାରରେ ରେଡି ମେଡ୍ ଗଦି ମିଳୁଛି । ବିଭିନ୍ନ ବ୍ରାଣ୍ଡର ଗଦିର ଦାମ ମଧ୍ଯ ଅଲଗା । ହେଲେ ଆପଣ ଜାଣନ୍ତି କି ବିଶ୍ଵର ସବୁଠାରୁ ମହଙ୍ଗା ଗଦି କେଉଁଟି ଓ ଏହାକୁ କାହିଁକି କୋଟି କୋଟି ଦାମରେ ବିକ୍ରି କରାଯାଏ ।

ବିଶ୍ୱର ସବୁଠାରୁ ମହଙ୍ଗା ଗଦି ସ୍ୱିଡିସ୍ କମ୍ପାନୀ ହାଷ୍ଟେନ୍ସ ଦ୍ୱାରା ପ୍ରସ୍ତୁତ, ଯାହା ୧୭୪ ବର୍ଷ ପୂର୍ବେ ଅର୍ଥାତ ୧୮୫୨ରେ ପର୍ ଆଡଲଫ୍ ଜାନସନଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା । ତାଙ୍କ ବଂଶଧରମାନେ ଏବେ ବି ଏହି କମ୍ପାନୀକୁ ଚଲାଉଛନ୍ତି । କମ୍ପାନୀର ୱେବସାଇଟ୍ ଅନୁଯାୟୀ, ସେମାନେ ବର୍ତ୍ତମାନ ୧୩ ପ୍ରକାରର ଗଦି ତିଆରି କରନ୍ତି, ଯେଉଁଥିରୁ ସବୁଠାରୁ ମହଙ୍ଗା ହେଉଛି ଗ୍ରାଣ୍ଡ ଭିଭିଡସ୍ ମଡେଲ୍, ଯାହାର ମୂଲ୍ୟ ପ୍ରାୟ ୭.୩ କୋଟି ଟଙ୍କା ।

• ଘୋଡ଼ା ଲୋମର ହୁଏ ବ୍ୟବହାର

ଏହି ଗଦି ସମ୍ପୂର୍ଣ୍ଣ ହାତରେ ତିଆରି ହୁଏ । ଏଥିରେ ୬୦୦ ଘଣ୍ଟା ବା ୨୫ ଦିନ ସମୟ ଲାଗେ । ଏହାର ସବୁଠାରୁ ଖାସ୍ କଥା ହେଉଛି ଏଥିରେ ବ୍ୟବହୃତ ସାମଗ୍ରୀ । କୃତ୍ରିମ ଫୋମ୍ ବଦଳରେ ଏହି ଗଦିରେ ଘୋଡ଼ାର କେଶ, କପା ଏବଂ ଫ୍ଲେକ୍ସର ବ୍ୟବହାର କରାଯାଏ । ଘୋଡ଼ା କେଶକୁ ସମ୍ପୂର୍ଣ୍ଣ ପ୍ରାକୃତିକ ପ୍ରକ୍ରିୟା ମାଧ୍ୟମରେ ଆକାର ଦିଆଯାଏ, ଯାହାକି ଶରୀରର ପ୍ରତ୍ୟେକ ଅଂଶକୁ ଉତ୍କୃଷ୍ଟ ସମର୍ଥନ ପ୍ରଦାନ କରେ ।

• ଗଦି ଉପରେ ୨୫ ବର୍ଷର ୱାରେଣ୍ଟି

ଏହି ଗଦିରେ ବ୍ଯବହୃତ ଘୋଡ଼ା କେଶର ଖାସ୍ କଥା ହେଉଛି ଏହା ଭେଣ୍ଟିଲେସନ ଭାବରେ କାର୍ଯ୍ୟ କରେ । ଗଦିରେ ଆର୍ଦ୍ରତା ଜମା ହେବାରୁ ରୋକେ ଏବଂ ଶୋଇବା ସମୟରେ ଶରୀରର ଏକ ଉପଯୁକ୍ତ ତାପମାତ୍ରା ବଜାୟ ରଖେ । ସେହିପରି କପା ଗଦିକୁ ଶକ୍ତି ପ୍ରଦାନ କରେ । ଉଲ୍ ଏହାର ସ୍ଥାୟିତ୍ୱ ନିଶ୍ଚିତ କରେ । ଏହି କାରଣଗୁଡ଼ିକ ପାଇଁ, କମ୍ପାନୀ ଏହି ଗଦି ଉପରେ ସମ୍ପୂର୍ଣ୍ଣ ୨୫ ବର୍ଷର ୱାରେଣ୍ଟି ପ୍ରଦାନ କରେ ।

• ଗଦିର ଓଜନ କେତେ ?

କମ୍ପାନୀର ୱେବସାଇଟରେ ଥିବା ସୂଚନା ଅନୁଯାୟୀ , ଏହି ୧୮୦x୨୧୦ ସେଣ୍ଟିମିଟରର ହୋଇଥିବାବେଳେ ଏହାର ଓଜନ ୪୫୫ କିଲୋଗ୍ରାମ । କହିବାକୁ ଗଲେ, ଏହା ଏକ ଛୋଟ କାରର ଓଜନର ଅଧା ସହ ସମାନ । ଗଦିର ମୋଟ ଉଚ୍ଚତା ୭୫ ସେମି, ଯେଉଁଥିରେ ଏକ ୭ ସେମି ଉପର ଗଦି, ଏକ ୨୭ ସେମି ମୁଖ୍ୟ ଗଦି, ଏକ ୩୩ ସେମି ବେସ୍ ଏବଂ ପୂରା ତଳେ ୮ ସେମିର ପୋଡିୟମ୍ ରହେ ।

ପଢନ୍ତୁ ଏହି ଖବର: ନିଦରୁ ଉଠିବା ମାତ୍ରେ ଆପଣ ଫୋନ୍ ଖୋଜିଥାନ୍ତି ହେଲେ କାହିଁକି ଜାଣନ୍ତୁ ଏହାର କାରଣ...

• ରାଜକୀୟ ବ୍ୟକ୍ତି ଏବଂ ସେଲିବ୍ରିଟିଙ୍କ ଭାରି ପ୍ରିୟ

ହଲିଉଡ୍ ସୁପରଷ୍ଟାର ଟମ୍ କ୍ରୁଜ୍, ପପ୍ କୁଇନ୍ ବିୟୋନ୍ସ ଏବଂ ପ୍ରସିଦ୍ଧ ରାପର୍ ଡ୍ରେକ୍ ପରି ସେଲିବ୍ରିଟିଙ୍କ ଏହି ଗଦି ପ୍ରଥମ ପସନ୍ଦ । ଏହା ବ୍ୟତୀତ ଅନେକ ରାଜପରିବାର ସେମାନଙ୍କର ଉତ୍ତମ ନିଦ୍ରା ପାଇଁ ଏହି କମ୍ପାନୀର ଗଦି ବ୍ୟବହାର କରନ୍ତି । ଆଜି ହାଷ୍ଟେନ୍ସ ୪୫ରୁ ଅଧିକ ଦେଶରେ କାର୍ଯ୍ୟ କରେ । ଏହାର ଶଯ୍ୟା ବିଶ୍ୱର ଅନେକ ବିଳାସପୂର୍ଣ୍ଣ ହୋଟେଲରେ ଏକ ଭଲ ନିଦ୍ରା ସୁନିଶ୍ଚିତ କରେ ।

• ଭାରତରେ ଏହି ଗଦି ମିଳେ କି ?

ଭାରତରେ କମ୍ପାନୀର ମୋଟ ୭ଟି ଷ୍ଟୋର ଅଛି । ଦିଲ୍ଲୀର ଡିଫେନ୍ସ କଲୋନି ଏବଂ MG ରୋଡରେ କମ୍ପାନୀର ଷ୍ଟୋର ଖୋଲାଯାଇଛି । ମୁମ୍ବାଇର ଲୋକମାନେ ଏକ କଷ୍ଟମାଇଜ୍ଡ୍ ଗଦିର ଅର୍ଡର ଦିଅନ୍ତି । ଏଥିଲାଗି ସେମାନେ ମୁମ୍ବାଇର ୱର୍ଲିରେ ଥିବା କମ୍ପାନୀର ବିଳାସପୂର୍ଣ୍ଣ ଷ୍ଟୋରକୁ ଯାଇଥାନ୍ତି ।