ଅର୍ଗସ ବ୍ୟୁରୋ : ଆଉ କିଛି ସମୟର ଅପେକ୍ଷା । ଶେଷ ହେବ ଦୀର୍ଘ ୧୨ ଦିନର ସଂଘର୍ଷ । ନୂଆ ଜୀବନ ନେଇ ଉତ୍ତରକାଶୀର ଅନ୍ଧାରୀ ସୁଡଙ୍ଗରୁ ଆଲୋକ ଦେଖିବେ ୫ ଓଡ଼ିଆଙ୍କ ସମେତ ମୋଟ ୪୧ ଶ୍ରମିକ । ପେଟ ପାଇଁ ଟନେଲରେ କାମ କରୁଥିଲେ ଆଜି ଭାଗ୍ୟ ନେଇ ଟନେଲରୁ ବାହାରିବେ । ଆଉମାତ୍ର କିଛି ମିଟର ଦୂରରେ ରହିଛି ପାଇପ୍ । ପାଖାପାଖି ୯୦ ପ୍ରତିଶତ ଡ୍ରିଲିଂ କାମ ଶେଷ ହୋଇସାରିଛି । ଏପଟେ ଆଲର୍ଟରେ ସ୍ବତନ୍ତ୍ର ଡାକ୍ତରୀ ଟିମ । ସତର୍କ ରହିଛି ପ୍ରଶାସନ । ୫୭ ମିଟର ଦୀର୍ଘ ଟନେଲର ଖୁବ ପହଞ୍ଚିଛନ୍ତି ଉଦ୍ଧାରକାରୀ ଦଳ । ଜୀବନର ବାଜି ଜିତିବାକୁ ଓ ଜୀବନ ଜିତାଇବାକୁ ଶେଷ ପର୍ଯ୍ୟାୟରେ ଜୋରଦାର ହୋଇଛି ରେସ୍କ୍ୟୁ ଅପରେସନ୍ । ମୋଟ ୫୭ ମିଟର ଡ୍ରିଲ କରିବାକୁ ଥିବା ବେଳେ ୫୦ ମିଟରରୁ ଅଧିକ ଡ୍ରିଲ ହୋଇସାରିଛି ।  

ଅଧିକ ପଢନ୍ତୁ : ଶ୍ରମିକଙ୍କ ନିକଟରୁ 6 ମିଟର ଦୂରରେ ପାଇପ୍

ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଅନୁଧ୍ୟାନ କରିଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଓ କେନ୍ଦ୍ରମନ୍ତ୍ରୀ ବି.କେ ସିଂହ । ଶ୍ରମିକଙ୍କୁ ଉଦ୍ଧାର ପରେ ସେମାନଙ୍କୁ ତୁରନ୍ତ ଚିକିତ୍ସା ପାଇଁ ଆଲର୍ଟରେ ରହିଛି ସ୍ବତନ୍ତ୍ର ଡାକ୍ତରୀ ଟିମ୍ । ଖୁବଶୀଘ୍ର ଶ୍ରମିକଙ୍କ ନିକଟରେ ପହଞ୍ଚିବେ NDRF ଉଦ୍ଧାରକାରୀ ଟିମ୍ । ଉଦ୍ଧାରକାର୍ଯ୍ୟରେ ସାମିଲ ହୋଇଛନ୍ତି ଦିଲ୍ଲୀରୁ ଆସିଥିବା ୱେଲଡିଂ ଏକ୍ସପର୍ଟ । ରୁରକି IITର ମୁଖ୍ୟ ବୈଜ୍ଞାନିକ ତଥା ଟନେଲ ଏକ୍ସପର୍ଟ ଆର. ଡି. ଦ୍ୱିବେଦୀ । ଦୀର୍ଘ ୧୨ ଦିନ ଧରି ଟନେଲ୍ ଭିତରେ ଫସି ରହିଥିବା ୭ ରାଜ୍ୟର ୪୧ ଜଣ ଶ୍ରମିକଙ୍କୁ ସୁରକ୍ଷିତ ଉଦ୍ଧାର ପାଇଁ ଆଧୁନିକ ମେସିନ ସାହାଯ୍ୟରେ  ଡ୍ରିଲିଂ କାର୍ଯ୍ୟ ଜାରି ରହିଛି । ଆମେରିକୀୟ ମେସିନ୍ ଦ୍ବାରା ଡ୍ରିଲିଂ କାମ ଯୁଦ୍ଧକାଳୀନ ଭିତ୍ତିରେ ଚାଲିଥିବାରୁ ଖୁବଶୀଘ୍ର ଶ୍ରମିକ ବାହାରକୁ ଆସିବେ ବୋଲି କହିଛନ୍ତି ପିଏମ୍‌ଓର ପୂର୍ବତନ ପରାମର୍ଶଦାତା ଭାସ୍କର କୁଲବେ  । 

ଉଦ୍ଧାର ହେବା ମାତ୍ରେ ଶ୍ରମିକଙ୍କୁ କିଭଳି ହସ୍ପିଟାଲରେ ପହଞ୍ଚାଯିବ ଏବଂ ସେମାନଙ୍କ ପ୍ରାଥମିକ ଚିକିତ୍ସା କରାଯିବ, ସେଥିପାଇଁ ପ୍ରସ୍ତୁତ ରହିଛି ଆମ୍ବୁଲାନ୍ସ । ଅତ୍ୟାଧୁନିକ ମେସିନ ସହ ଅନ୍ୟାନ୍ୟ ଆବଶ୍ୟକୀୟ ଉପକରଣ ଆମ୍ବୁଲାନ୍ସରେ ମହଜୁଦ ରଖାଯାଇଛି । ହସ୍ପିଟାଲରେ ବେଡ୍ ମଧ୍ୟ ପ୍ରସ୍ତୁତ ରଖାଯାଇଛି । ଅଭିଜ୍ଞ ଡାକ୍ତର ଏବଂ ସ୍ୱାସ୍ଥ୍ୟକର୍ମୀ ମଧ୍ୟ ପ୍ରସ୍ତୁତ ରହିଛନ୍ତି । ଅକ୍ସିଜେନ, ଦଉଡ଼ି, ଷ୍ଟ୍ରେଚର ନେଇ ଟନେଲ ଭିତରକୁ ଯାଉଛନ୍ତି ଏନ୍‌ଡିଆର୍‌ଏଫ୍‌ ଟିମ୍‌ ।

୧୨ ଦିନ ହେଲା ଅଧାଖାଇ, ଅଧାଶୋଇ ୪୧ ଶ୍ରମିକ ଟନେଲ୍ ଭିତରେ ଫସି ରହିଛନ୍ତି । ନିର୍ମାଣାଧୀନ ଟନେଲ ଭୁଶୁଡ଼ି ପଡ଼ିବାରୁ ନଭେମ୍ବର ୧୨ ତାରିଖରୁ ବଞ୍ଚିବା ପାଇଁ ସଂଘର୍ଷ କରୁଛନ୍ତି ଶ୍ରମିକ । ସେମାନଙ୍କ ମଧ୍ୟରେ ୫ ଜଣ ଓଡ଼ିଆ ମଧ୍ୟ ଅଛନ୍ତି । ୬ ମିଟର ବ୍ୟାସ ବିଶିଷ୍ଟ ପାଇପ୍ ମାଧ୍ୟମରେ ଶ୍ରମିକଙ୍କ ପାଖକୁ ୩ ଦିନ ହେଲା ଖାଦ୍ୟ ଓ ପାନୀୟ ପଠାଯାଉଛି । ମଙ୍ଗଳବାର ଏଣ୍ଡୋସ୍କୋପି କ୍ୟାମେରା ମାଧ୍ୟମରେ ପ୍ରଥମ ଥର ପାଇଁ ୧୦ ଦିନ ପରେ ସାମ୍ନାକୁ ଆସିଥିଲା ଫସିଥିବା ଶ୍ରମିକଙ୍କ ଭିଡିଓ । ଶ୍ରମିକମାନେ ସୁରକ୍ଷିତ ଥିବା ଜାଣି ପରିବାର ଲୋକେ ଆଶ୍ବସ୍ତ ହୋଇଛନ୍ତି । ସେମାନଙ୍କ ଫେରିବା ବାଟକୁ ଚାହିଁ ରହିଛନ୍ତି ପରିବାର ଲୋକେ ।