ଉତ୍ତରପ୍ରଦେଶର ଗାଜିଆବାଦରେ ଘଟିଛି ଏକ ଦୁଃଖଦ ଘଟଣା, ୧୨ତମ ମହଲାରୁ ଖସିପଡ଼ି ଜଣେ ୯ମ ଶ୍ରେଣୀ ଛାତ୍ରୀଙ୍କ ମୃତ୍ୟୁ ହୋଇଛି । ଶୁକ୍ରବାର ରାତିରେ ରାଜନଗର ଏକ୍ସଟେନ୍ସନ୍‌ର ରାଜନଗର ରେସିଡେନ୍ସି ସୋସାଇଟିର ଟାୱାର-Gରେ ଏହି ଘଟଣା ଘଟିଛି । ମୃତ ଛାତ୍ରୀଙ୍କ ନାମ ପ୍ରାଚୀ ଏବଂ ତାଙ୍କ ବୟସ ୧୪ ବର୍ଷ ବୋଲି ଜଣାପଡ଼ିଛି । ସେ ସଞ୍ଜୟ ନଗରସ୍ଥିତ ଦେହରାଦୁନ ପବ୍ଲିକ୍ ସ୍କୁଲର ୯ମ ଶ୍ରେଣୀର ଛାତ୍ରୀ ଥିଲେ ।

କପଡ଼ା ଆଣିବାକୁ ଯାଇଥିବା ବେଳେ ଘଟିଲା ଅଘଟଣ
ସୂଚନା ଅନୁସାରେ, ଶୁକ୍ରବାର ରାତିରେ ପ୍ରାଚୀ ବାଲକନିରେ ଶୁଖାଇବା ପାଇଁ ଦିଆଯାଇଥିବା କପଡ଼ା ଆଣିବାକୁ ଯାଇଥିଲେ । ଏହି ସମୟରେ କୌଣସି କାରଣରୁ ସେ ୧୨ତମ ମହଲାର ବାଲକନିରୁ ତଳକୁ ଖସିପଡ଼ିଥିଲେ । ଘଟଣାର ଶବ୍ଦ ଶୁଣି ସୋସାଇଟିର ଲୋକମାନେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ । ପ୍ରାଚୀଙ୍କୁ ତୁରନ୍ତ ନିକଟସ୍ଥ ଯଶୋଦା ହସ୍ପିଟାଲକୁ ନିଆଯାଇଥିଲା । କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ପୋଲିସ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି । ପ୍ରାଥମିକ ତଦନ୍ତରୁ ଏପର୍ଯ୍ୟନ୍ତ ଘଟଣାର ପ୍ରକୃତ କାରଣ ସ୍ପଷ୍ଟ ହୋଇନାହିଁ । ପୋଲିସ ସୋସାଇଟିର CCTV ଫୁଟେଜ୍ ଯାଞ୍ଚ କରୁଛି ।

ନନ୍ଦଗ୍ରାମ ଥାନାର ପୋଲିସ ଅଧିକାରୀ ଜିଆଉଦ୍ଦିନ ଅହମ୍ମଦଙ୍କ ଅନୁସାରେ, ଶୁକ୍ରବାର ରାତି ପ୍ରାୟ ୯ଟା ସମୟରେ ଘଟଣା ସମ୍ପର୍କରେ ପୋଲିସକୁ ସୂଚନା ମିଳିଥିଲା । ସୂଚନା ପାଇବା ପରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ନିଜ ହେପାଜତକୁ ନେଇଥିଲା । ପରିବାର ସଦସ୍ୟଙ୍କ ସହ କଥାବାର୍ତ୍ତା କରି ତଥ୍ୟ ସଂଗ୍ରହ କରାଯାଉଛି ଏବଂ ଆଇନଗତ ପ୍ରକ୍ରିୟା ଜାରି ରହିଛି ।

ଏଥି ସହ ପଢନ୍ତୁ: ୫ ଘଣ୍ଟା ଛଟପଟ ଦୁଷ୍କର୍ମ ପୀଡ଼ିତା, ଚାଲିଗଲା ଜୀବନ; ସୁପ୍ରିମକୋର୍ଟ ଦେଲେ କଡ଼ା ନିର୍ଦ୍ଦେଶ

ରୋପ୍ ସ୍କିପିଂରେ ଜିତିଥିଲେ ୨ ସ୍ୱର୍ଣ୍ଣ ପଦକ
ପ୍ରାଚୀ ଜଣେ ମେଧାବୀ ଛାତ୍ରୀ ହେବା ସହ ରୋପ୍ ସ୍କିପିଂରେ ମଧ୍ୟ ଭଲ ପ୍ରଦର୍ଶନ କରୁଥିଲେ । ନିକଟରେ ଶିରଡିରେ ଆୟୋଜିତ CBSE ରୋପ୍ ସ୍କିପିଂ ନ୍ୟାସନାଲ୍ ଚାମ୍ପିଅନ୍‌ଶିପ୍‌ରେ ସେ ଦୁଇଟି ସ୍ୱର୍ଣ୍ଣ ପଦକ ଜିତି ମହାରାଷ୍ଟ୍ରରୁ ଫେରିଥିଲେ । ସେ ଡବଲ୍ ଡଚ୍ ପେୟାର୍ ଫ୍ରିଷ୍ଟାଇଲ୍’ ଏବଂ ‘ଡବଲ୍ ଡଚ୍ ସିଙ୍ଗଲ୍ ଫ୍ରିଷ୍ଟାଇଲ୍’ ବର୍ଗରେ ସ୍ୱର୍ଣ୍ଣ ପଦକ ହାସଲ କରିଥିଲେ । ତାଙ୍କ ସଫଳତା ପରେ ପରିବାରରେ ଖୁସିର ମାହୋଲ ଥିଲା । ହେଲେ ଏହି ଅଘଟଣ ପରେ ପରିବାରରେ ଶୋକର ଛାୟା ଖେଳିଯାଇଛି ।

ପ୍ରାଚୀଙ୍କ ବାପା ସୁରେଶ ଚନ୍ଦ ଜଣେ ବହୁରାଷ୍ଟ୍ରୀୟ କମ୍ପାନୀରେ ସଫ୍ଟୱେର୍ ଇଞ୍ଜିନିୟର୍ ଭାବେ କାମ କରନ୍ତି । ଘଟଣା ସମୟରେ ତାଙ୍କ ବାପା-ମାଆ, ସାନ ଭଉଣୀ ଏବଂ ଜେଜେବାପା-ଜେଜେମାଆ ଘରେ ଉପସ୍ଥିତ ଥିବା ଜଣାପଡ଼ିଛି । ପୁଲିସ ଘଟଣାର ସମସ୍ତ ଦିଗ ଯାଞ୍ଚ କରି ଆଗକୁ ଆଇନଗତ ପଦକ୍ଷେପ ନେଉଛି ।