Police Personnel Death / ୨୦ ଟଙ୍କାର ଲାଞ୍ଚ, ୩୦ବର୍ଷର ଆଇନଗତ ଲଢେଇ; ଜେଲରୁ ବାହାରିବାର ଗୋଟିଏ ଦିନ ପରେ ମୃତ୍ୟୁ

ଗୁଜରାଟ ଅହମ୍ମଦାବାଦରୁ ଏପରି ଏକ ଘଟଣା ସାମ୍ନାକୁ ଆସିଛି, ଯାହାକି ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ଗୁଜରାଟ ହାଇକୋର୍ଟ ୨୦ ଟଙ୍କା ଲାଞ୍ଚ ନେଇଥିବା ଘଟଣାରେ ୩୦ ବର୍ଷ ଯାଏଁ ଆଇନଗତ ଲଢେଇ ଲଢିଥିବା ଜଣେ ପୋଲିସ କର୍ମଚାରୀଙ୍କୁ ଶେଷରେ ନିର୍ଦ୍ଦୋଷର ଖଲାସ କରିଥିଲେ । ଏହାପରେ ଯାହା ଘଟିଛି ତାହା ସମସ୍ତଙ୍କୁ ମର୍ମାହତ କରିଛି । ଦୀର୍ଘ ବର୍ଷ ଯାଏଁ କୋର୍ଟ କଚେରୀର ସାମ୍ନା କରିଥିବା ଏହି ପୋଲିସ କର୍ମଚାରୀ ଜଣକ ଜେଲରୁ ମୁକ୍ତ ହେବାର ଗୋଟିଏ ଦିନ ପରେ ତାଙ୍କର ମୃତ୍ୟୁ ଘଟିଛି ।

• କଣ ଥିଲା ମାମଲା ?

ମୃତ୍ୟୁ ଘଟିଥିବା ପୋଲିସ କର୍ମଚାରୀ ଜଣକ ହେଉଛନ୍ତି ଅହମ୍ମଦାବାଦର ୱେଜଲପୁରର କନେଷ୍ଟବଳ ବାବୁଭାଇ ପ୍ରଜାପତି । ୧୯୯୬ ମସିହାରେ ବାବୁଭାଇଙ୍କ ବିରୋଧରେ ୨୦ ଟଙ୍କା ଲାଞ୍ଚ ନେଇଥିବା ଅଭିଯୋଗ ହୋଇଥିଲା । ୧୯୯୭ ମସିହାରେ ଅହମ୍ମଦାବାଦ ସେସନ କୋର୍ଟରେ ଏକ ଚାର୍ଜସିଟ୍ ଦାଖଲ କରାଯାଇଥିଲା । ପରେ ୨୦୦୨ ମସିହାରେ ତାଙ୍କ ବିରୁଦ୍ଧରେ ଆନୁଷ୍ଠାନିକ ଅଭିଯୋଗ ଦାଖଲ କରାଯାଇଥିଲା । ଏହାପରେ ସେସନ କୋର୍ଟ ୨୦୦୩ ମସିହାରେ ସାକ୍ଷ୍ୟ ପ୍ରମାଣ ଗ୍ରହଣ କରିଥିଲେ ଓ ୨୦୦୪ ମସିହାରେ ବାବୁଭାଇଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା ।

ଏହାପରେ ସେସନ କୋର୍ଟ ବାବୁଭାଇ ପ୍ରଜାପତିଙ୍କୁ ୪ ବର୍ଷ ପାଇଁ କଠୋର କାରାଦଣ୍ଡାଦେଶ ଏବଂ ୩୦୦୦ ଟଙ୍କା ଜୋରିମାନା ମଧ୍ୟ ଶୁଣାଇଥିଲେ । କୋର୍ଟଙ୍କ ଏହି ରାୟ ବିରୋଧରେ ଯାଇ ବାବୁଭାଇ ପ୍ରଜାପତି ଗୁଜରାଟ ହାଇକୋର୍ଟରେ ଅପିଲ୍ କରିଥିଲେ । ପ୍ରାୟ ୨ ଦଶନ୍ଧି ପର୍ଯ୍ୟନ୍ତ ଏହି ମାମଲାଟି କୋର୍ଟରେ ଚାଲିଥିଲା । ଶେଷରେ ୨୦୨୬ ଫେବୃଆରୀ ୪ ତାରିଖରେ ହାଇକୋର୍ଟ ନିଜର ରାୟ ଶୁଣାଇଥିଲେ । କୋର୍ଟ ସାକ୍ଷୀଙ୍କ ବୟାନରେ ବିରୋଧାଭାସ ଓ ଓକିଲଙ୍କ ପ୍ରମାଣରେ ଦୁର୍ବଳତା ଦର୍ଶାଇ ବାବୁଭାଇଙ୍କୁ ନିର୍ଦ୍ଦୋଷ ବୋଲି ଘୋଷଣା କରିଥିଲେ ।

• ‘ଜୀବନର କଳଙ୍କ ଲିଭିଗଲା’

ଗୁଜରାଟ ହାଇକୋର୍ଟ ରାୟ ଶୁଣାଇବା ପରେ ବାବୁଭାଇ ପ୍ରଜାପତି ନିଜ ଓକିଲଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ସେଠାରେ କୋର୍ଟ ତାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି ବୋଲି କହିଥିଲେ ଓକିଲ । ଏହାସହିତ ସେ ଏବେ ସମସ୍ତ ସରକାରୀ ଲାଭ ଉଠାଇବା ଲାଗି ଆବେଦନ କରିବା ପାଇଁ ମଧ୍ୟ କହିଥିଲେ । କୋର୍ଟଙ୍କ ରାୟ ଶୁଣିବା ପରେ ବାବୁବାଇ ଭାବବିହ୍ବଳ ହୋଇପଡ଼ିଥିଲେ ଆଉ କହିଥିଲେ, “ଜୀବନର କଳଙ୍କ ଲିଭିଗଲା । ଏବେ ଭଗବାନ ମୋତେ ନିଜ ପାଖକୁ ନେଇଯାଆନ୍ତୁ ।“ ବାସ୍ ଏତିକି କହି ସେ ନିଜ ଘରକୁ ଯାଇଥିଲେ । ସେ କହୁଥିବା ଏହି କଥା ପଦକ ଓକିଲଙ୍କ କାର୍ଯ୍ୟାଳୟରେ ଲାଗିଥିବା ସିସିଟିଭି କ୍ୟାମେରାରେ ମଧ୍ୟ କଏଦ ହୋଇଛି । ଏହାପରେ ବାବୁଭାଇ ନିଜ ଘରକୁ ଚାଲିଯାଇଥିଲେ । ତାଙ୍କୁ ନ୍ୟାୟ ମିଳିବା ପରେ ସେ ଏତେ ଖୁସି ହୋଇଯାଇଥିଲେ ଯେ ଶେଷରେ ତାଙ୍କର ହଠାତ ମୃତ୍ୟୁ ଘଟିଥିଲା । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି ।