ସଂସଦରେ ବଜେଟ ଅଧିବେଶନର ଆଜି ଦ୍ବିତୀୟ ଦିନ । ଅର୍ଥମନ୍ତ୍ରୀ ନିର୍ମଳା ସୀତାରମଣ ଅର୍ଥନୈତିକ ସର୍ବେକ୍ଷଣ ରିପୋର୍ଟ ଉପସ୍ଥାପନା କରିବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ସଂସଦ ପରିସରରେ ଦେଶକୁ ସମ୍ବୋଧିତ କରିଛନ୍ତି । ଗତକାଲି ରାଷ୍ଟ୍ରପତି ଦ୍ରୌପଦୀ ମୁର୍ମୁ ସେଣ୍ଟ୍ରାଲ ହଲରେ ଉଭୟ ଗୃହକୁ ମିଳିତ ଭାବରେ ସମ୍ବୋଧିତ କରିଥିଲେ । ରାଷ୍ଟ୍ରପତିଙ୍କ ଅଭିଭାଷଣକୁ ପ୍ରଶଂସା କରି ଏହା ଦେଶବାସୀଙ୍କ ସ୍ବର ବୋଲି ପିଏମ ମୋଦି କହିଛନ୍ତି । ସେହିପରି ରିଫର୍ମ, ଟ୍ରାନ୍ସଫର୍ମ, ପରଫର୍ମ ଆମ ସରକାରର ପ୍ରାଥମିକତା । ଭାରତ ବିକାଶ ଯାତ୍ରାର ଏକ ଗୁରୁତ୍ବପୂର୍ଣ୍ଣ ପର୍ଯ୍ୟାୟରେ ପ୍ରବେଶ କରିଛି ବୋଲି ମୋଦି କହିଛନ୍ତି ।

'ରାଷ୍ଟ୍ରପତିଙ୍କ ଅଭିଭାଷଣ ଦେଶବାସୀଙ୍କ ସ୍ଵର'
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଷ୍ଟ୍ରପତିଙ୍କ ଅଭିଭାଷଣକୁ ପ୍ରଶଂସା କରି କହିଛନ୍ତି, "ରାଷ୍ଟ୍ରପତିଙ୍କ ଅଭିଭାଷଣ ୧୪୦ କୋଟି ଦେଶବାସୀଙ୍କ ସ୍ବର ଥିଲା । ରାଷ୍ଟ୍ରପତି ନିଜ ଅଭିଭାଷଣରେ ୧୪୦ କୋଟି ନାଗରିକ ବିଶେଷ ଭାବରେ ଯୁବଗୋଷ୍ଠୀଙ୍କ ଆକାଂକ୍ଷାକୁ ଅତି ସଠିକ ଢଙ୍ଗରେ ରେଖାଙ୍କିତ କରିଥିଲେ । ସେହିପରି ରାଷ୍ଟ୍ରପତି ସମସ୍ତ ସାଂସଦମାନଙ୍କୁ ମାର୍ଗଦର୍ଶନ ଦେବା ପାଇଁ ଅନେକ କଥା କହିଥିଲେ ।"

ଯୁବଗୋଷ୍ଠୀ ଓ ଚାଷୀଙ୍କ ଲାଗି ବଡ଼ ସୁଯୋଗ
ପ୍ରଧାନମନ୍ତ୍ରୀ ମୋଦି ଭାରତ ଓ ୟୁରୋପୀୟ ସଂଘ ମଧ୍ୟରେ ହୋଇଥିବା ଐତିହାସିକ ଚୁକ୍ତିକୁ ମନେ ପକାଇ କହିଥିଲେ ଯେ ଏହା ଭାରତର ଯୁବପିଢିଙ୍କ ଭବିଷ୍ୟତକୁ ଚମତ୍କାର କରିବ । ଏହାସହିତ ଚାଷୀ, ମ୍ୟାନୁଫାକଚରିଂ ସେଣ୍ଟର ଓ ସେବା ସେକ୍ଟରରେ ଯୋଡ଼ି ହୋଇଥିବା ଲୋକେ ଏଥିରୁ ବେଶ ଲାଭବାନ ହେବେ । ଏହି ଚୁକ୍ତି ଆଗାମୀ ଦିନରେ ଆତ୍ମବିଶ୍ବାସୀ ଓ ଉତ୍ପାଦକ ଭାରତ ଦିଗରେ ଏକ ବଡ଼ ପଦକ୍ଷେପ ସାବ୍ୟସ୍ତ ହେବ ବୋଲି ମୋଦି କହିଛନ୍ତି ।

'ରିଫର୍ମ, ଟ୍ରାନ୍ସଫର୍ମ, ପରଫର୍ମ ଆମର ପ୍ରାଥମିକତା'
ମୋଦି ଆହୁରି କହିଛନ୍ତି ଯେ ଦେଶର ଧ୍ୟାନ ବଜେଟ କ୍ଷେତ୍ରରେ ରହିବା ସ୍ବାଭାବିକ । ମାତ୍ର ଏହି ସରକାରର ପରିଚୟ ସର୍ବଦା ରିଫର୍ମ, ଟ୍ରାନ୍ସଫର୍ମ, ପରଫର୍ମ ରହିଆସିଛି । ଏବେ ଦେଶ ରିଫର୍ମ ଏକ୍ସପ୍ରେସରେ ବହୁ ଦ୍ରୁତ ଗତିରେ ଆଗକୁ ବଢୁଛି । ଏହି ରିଫର୍ମ ଏକ୍ସପ୍ରେସକୁ ଗତି ଦେବାରେ ସଂସଦର ସାଥୀ ସଦସ୍ୟମାନେ ସକରାତ୍ମକ ଭୂମିକା ନିର୍ବାହ କରୁଛନ୍ତି କହି ମୋଦି ସେମାନଙ୍କ ପ୍ରତି ନିଜର କୃତଜ୍ଞତା ଜଣାଇଛନ୍ତି ।

ଫାଇଲରୁ ବାହାରି ଲୋକଙ୍କ ନିକଟରେ ପହଞ୍ଚୁଛି ଯୋଜନା
ମୋଦି ଆହୁରି କହିଛନ୍ତି ଯେ, "ଏବେ ସମସ୍ତେ ସ୍ବୀକାର କରୁଛନ୍ତି ଯେ ଆମ ସରକାର ଲାଷ୍ଟ ମାଇଲ୍ ଡେଲିଭରି ଉପରେ ବିଶେଷ ଭାବେ ଧ୍ୟାନ ଦେଇଛି । ସରକାରଙ୍କ ପ୍ରୟାସ ରହିଛି ଯେ ସମସ୍ତ ଯୋଜନା କେବଳ ଫାଇଲ ଭିତରେ ସୀମିତ ନ ରହି କିପରି ଭାବରେ ଲୋକଙ୍କ ନିକଟରେ ପହଞ୍ଚିବ ।" ଆଗାମୀ ଦିନଗୁଡ଼ିକରେ ଏହି ବ୍ୟବସ୍ଥାକୁ ପରବର୍ତ୍ତୀ ପିଢିର ରିଫର୍ମ ସହିତ ରିଫର୍ମ ଏକ୍ସପ୍ରେସରେ ଆଗକୁ ବଢାଇବା ଉଚିତ ।

ଫେବୃଆରୀ ପହିଲାରେ ବଜେଟ ଆଗତ
ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ପ୍ରଥମେ ଲୋକସଭାରେ ଭାରତର ଅର୍ଥନୈତିକ ସର୍ବେକ୍ଷଣ ରିପୋର୍ଟ ଉପସ୍ଥାପନା କରିବେ । ଏହି ଅର୍ଥନୈତିକ ସର୍ଭେ ରିପୋର୍ଟଟି ଦେଶର ଅର୍ଥବ୍ୟବସ୍ଥାର ବ୍ୟାପକ ଆକଳନ ପ୍ରସ୍ତୁତ କରିଥାଏ ଏବଂ ବଜେଟ ଉପସ୍ଥାପନା ପୂର୍ବରୁ ଭାରତର ଅର୍ଥନୀତିର ସ୍ଥିତି ସମ୍ପର୍କରେ ମହତ୍ତ୍ବପୂର୍ଣ୍ଣ ସୂଚନା ପ୍ରଦାନ କରିଥାଏ । ଏହାପରେ ଫେବୃଆରୀ ୧ ତାରିଖ ପୂର୍ବାହ୍ନ ୧୧ଟାରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଲୋକସଭାରେ କେନ୍ଦ୍ର ବଜେଟ ୨୦୨୬ ଉପସ୍ଥାପନା କରିବେ । ଏହା ନିର୍ମଳାଙ୍କ ଲଗାତର ନବମ ବଜେଟ ହେବ । ସମ୍ପ୍ରତି ବିଶ୍ବରେ ଅନିଶ୍ଚିତତା ମଧ୍ୟରେ ଏହି ବଜେଟ ଆର୍ଥିକ ବିକାଶକୁ ବୃଦ୍ଧି କରିବା ଦିଗରେ ଉନ୍ନତ ଉପାୟ ସହ ଆସିବ ବୋଲି ଆଶା କରାଯାଉଛି ।