ପଶ୍ଚିମବଙ୍ଗର ସୋନାରପୁରରେ ଟିଏମସି ସାଂସଦ ଅଭିଷେକ ବାନାର୍ଜୀଙ୍କ ଉପରେ ଆକ୍ରମଣ । ନିର୍ବାଚନୀ ହିଂସାରେ ପୀଡ଼ିତଙ୍କୁ ଭେଟିବାକୁ ଯାଇଥିଲେ, ହେଲେ ନିଜେ ହିଂସାର ଶିକାର ହେଲେ । ଗାଡ଼ିରୁ ଓହ୍ଲାଉ ଓହ୍ଲାଉ ହେଲା ଅଣ୍ଡାମାଡ଼ । ହଠାତ୍ ମାଡ଼ି ଆସିଲା ଭିଡ଼ । ଆଉ ଚିରିଦେଲା ଦେହର ବସ୍ତ୍ର । ଶେଷରେ ହେଲମେଟ୍ ପିନ୍ଧି ସୁରକ୍ଷାକର୍ମୀଙ୍କ ଘେର ଭିତରେ ବାହାରିଲେ ଦିଦିଙ୍କ ଲାଡଲା । ଯେତେବେଳେ ପଶ୍ଚିମବଙ୍ଗରେ ମମତା ସରକାର ଥିଲା, ସେତେବେଳେ କେନ୍ଦ୍ରମନ୍ତ୍ରୀ ହୁଅନ୍ତୁ କି ନେତା ସମସ୍ତଙ୍କ ଉପରେ ଆକ୍ରମଣ କରୁଥିଲେ ଟିଏମସି ଗୁଣ୍ଡା । ଏବେ ଶେଷରେ ଟିଏମସି ନେତା ଜନ ଆକ୍ରୋଶର ଶିକାର ହୋଇଛନ୍ତି ।

ଶନିବାର ଅପରାହ୍ନରେ ସୋନାରପୁରର କମରାବାଦ ଅଞ୍ଚଳରେ ଘଟିଛି ଏହି ଘଟଣା । ଟିଏମସି ସାଂସଦ ତଥା ବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୁତୁରା ଅଭିଷେକ ବାନାର୍ଜୀ ନିଜ ଦଳର ଜଣେ ମୃତକ କାର୍ଯ୍ୟକର୍ତ୍ତାଙ୍କ ଘରେ ପହଞ୍ଚିଥିଲେ । ପ୍ରାୟ ୪.୩୦ଟାରେ ସେ କମରାବାଦରେ ପହଞ୍ଚିଥିଲେ । ହେଲେ ହଠାତ୍ ଜନ ଆକ୍ରୋଶର ଶିକାର ହୋଇଥିଲେ ଅଭିଷେକ । ତାଙ୍କ ଉପରେ ଢେଲା ପଥର ସହ ଅଣ୍ଡାମାଡ଼ ହୋଇଥିଲା । ତାଙ୍କୁ 'ଚୋର ଚୋର' ନାରା ଦେଇ ବିରୋଧ ପ୍ରଦର୍ଶନ କରିଥିଲେ ସ୍ଥାନୀୟ ଲୋକେ ।

• କଣ କହିଲେ ଆକ୍ରମଣକାରୀ ?

ସ୍ଥାନୀୟ ଲୋକେ କହିଛନ୍ତି ଯେ ସେମାନେ ଦିନ ମଜୁରିଆ ଲୋକ । ସେମାନେ କୌଣସି ନିର୍ଦ୍ଦିଷ୍ଟ ରାଜନୈତିକ ଦଳର ନୁହେଁ । ସେହି ଅଞ୍ଚଳକୁ ଆଜି ପର୍ଯ୍ୟନ୍ତ ପକ୍କା ରାସ୍ତା ଖଣ୍ଡିଏ ନାହିଁ । ରାସ୍ତା ନିର୍ମାଣ ବାବଦକୁ ଯେତେ ଅର୍ଥ ଆସିଛି, ସବୁକୁ ଆତ୍ମସାତ କରିଛନ୍ତି ଠିକାଦାର । ସେମାନେ ଆଜି ବି ଚିନ୍ତିତ ଓ କ୍ରୋଧିତ । ପୂର୍ବ ସରକାରରେ ସେମାନଙ୍କୁ ମୌଳିକ ସୁବିଧା ମିଳିନଥିବାରୁ ଏପରି ବିରୋଧ ପ୍ରଦର୍ଶନ କରିଥିବା କହିଛନ୍ତି ।

#WATCH | Sonarpur, West Bengal: TMC MP Abhishek Banerjee was beaten up by locals during his visit to Sonarpur to meet the post-poll victims' families pic.twitter.com/zkXxLJydqe

— ANI (@ANI) May 30, 2026

• କାହିଁକି ଅଭିଷେକଙ୍କୁ ଆକ୍ରମଣ ?

ଆଉ ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ ଏହି ରାସ୍ତାର ଅବସ୍ଥା ଶୋଚନୀୟ । ପ୍ରାୟ ୧ କିଲୋମିଟର ପର୍ଯ୍ୟନ୍ତ କଚ୍ଚା ରାସ୍ତା ଲମ୍ବିଛି । ବର୍ଷାଦିନ କଥା ନ କହିଲେ ଭଲ । ରାସ୍ତାରେ ଅଣ୍ଟାଏ ପାଣି ଜମେ । ଯାତାୟାତ କରିବା କଷ୍ଟକର ହୋଇପଡ଼େ । ଯେତେବେଳେ ମମତା ମୁଖ୍ୟମନ୍ତ୍ରୀ ଥିଲେ, ତାଙ୍କୁ ଅନେକ ଥର ରାସ୍ତା ପାଇଁ ସ୍ଥାନୀୟ ଲୋକେ ଗୁହାରି କରିଥିଲେ, ଚିଠି ଲେଖିଥିଲେ । ହେଲେ ଫଳ ଶୂନ । ଯେତେବେଳେ ଆଜି ସ୍ଥାନୀୟ ସାଂସଦ ଅଭିଷେକ ବାନାର୍ଜୀ ଉକ୍ତ ଅଞ୍ଚଳରେ ପହଞ୍ଚିଥିଲେ, ତେବେ ସ୍ଥାନୀୟ ଲୋକଙ୍କ ଦୀର୍ଘ ଦିନର ଆକ୍ରୋଶ ଦେଖିବାକୁ ମିଳିଥିଲା । ଟିଏମସି ୧୫ ବର୍ଷ ଶାସନରେ ରହିବା ପରେ ମଧ୍ୟ କାହିଁକି ସେହି ଅଞ୍ଚଳର ଅବସ୍ଥା ଏପରି କହି ଲୋକେ ପ୍ରଶ୍ନ କରିଥିଲେ । ଏହାପରେ ତାଙ୍କୁ 'ଚୋର ଚୋର' ନାରାବାଜି କରି ସ୍ଥାନୀୟ ଲୋକେ ଅଣ୍ଡାମାଡ଼ କରିଥିଲେ ।

ପଢନ୍ତୁ ଏହି ଖବର: TMC ସାଂସଦଙ୍କ ବଡ଼ ବୟାନ, କିଛି ଦିନ ମଧ୍ୟରେ ଶେଷ ହୋଇଯିବ ତୃଣମୂଳ କଂଗ୍ରେସ

• ଭୋଗିଲେ କି କର୍ମଫଳ ?

ପଶ୍ଚିମବଙ୍ଗ ବିଧାନସଭା ନିର୍ବାଚନ ପ୍ରଚାର ସମୟରେ ଅଭିଷେକ ବାନାର୍ଜୀ ଅନେକ ନିର୍ବାଚନୀ ରାଲିକୁ ସମ୍ବୋଧିତ କରିଥିଲେ । ଏହି ରାଲିଗୁଡ଼ିକରେ ସେ ଅତ୍ୟନ୍ତ ଆକ୍ରମଣାତ୍ମକ ଏବଂ ଉତ୍ତେଜନାପୂର୍ଣ୍ଣ ଭାଷଣ ଦେଇଥିଲେ । ଏହି ପ୍ରସଙ୍ଗରେ ତାଙ୍କ ବିରୋଧରେ ବିଧାନନଗର ସାଇବର କ୍ରାଇମ୍ ପୋଲିସ ଷ୍ଟେସନରେ ଏକ ଏଫଆଇଆର ହୋଇଥିଲା । ତାଙ୍କ ଭାଷଣ ସମାଜରେ ଘୃଣା ପ୍ରସାର ଏବଂ ସାର୍ବଜନୀନ ଶାନ୍ତି ବିପର୍ଯ୍ୟସ୍ତ କରିବାର ସମ୍ଭାବନା ଥିବା ଅଭିଯୋଗ ହୋଇଥିଲା । ଏପରିକି ଅଭିଷେକ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ମଧ୍ୟ ଚ୍ୟାଲେଞ୍ଜ କରିଥିଲେ । ଯଦି ସାହାସ ଅଛି ତେବେ ମେ ୫ ତାରିଖରେ ପଶ୍ଚିମବଙ୍ଗରେ ରହିବାକୁ କହିଥିଲେ । ଶେଷରେ ଜନତାଙ୍କୁ ଉସୁକାଇବା ଅଭିଷେକଙ୍କ ଉପରେ ଭାରି ପଡ଼ିଛି । ଏବେ ସେ ନିଜେ ଜନତାଙ୍କ ଆକ୍ରୋଶର ଶିକାର ହୋଇଛନ୍ତି ।