ABVP Election / ABVPରେ ବଡ଼ ପରିବର୍ତ୍ତନ — ନୂଆ ଜାତୀୟ ସଭାପତି ଓ ସାଧାରଣ ସମ୍ପାଦକ ନିର୍ବାଚିତ

ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP)ର ଜାତୀୟ ସଭାପତି ଏବଂ ଜାତୀୟ ସାଧାରଣ ସମ୍ପାଦକ ପଦ ପାଇଁ ନିର୍ବାଚନ ପ୍ରକ୍ରିୟା ନଭେମ୍ବର ୧୨ରେ ସଫଳତାର ସହ ସମାପ୍ତ ହୋଇଛି । ଏହା ସହ ମୁମ୍ବାଇସ୍ଥିତ ABVPର କେନ୍ଦ୍ରୀୟ କାର୍ଯ୍ୟାଳୟରୁ ଫଳାଫଳ ମଧ୍ୟ ଘୋଷଣା କରାଯାଇଛି । ପ୍ରଫେସର ଡକ୍ଟର ରଘୁରାଜ କିଶୋର ତିୱାରୀ ଜାତୀୟ ସଭାପତି ଭାବରେ ନିର୍ବାଚିତ ହୋଇଥିବାବେଳେ ଡକ୍ଟର ବୀରେନ୍ଦ୍ର ସିଂହ ସୋଲାଙ୍କି ପୁନର୍ବାର ABVPର ଜାତୀୟ ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି ।

ABVPର ଜାତୀୟ ସଭାପତି ଏବଂ ABVPର ଜାତୀୟ ସାଧାରଣ ସମ୍ପାଦକଙ୍କ ନିର୍ବାଚନର ଫଳାଫଳ ଘୋଷଣା କରିବା ସମୟରେ ନିର୍ବାଚନ ଅଧିକାରୀ ଏବଂ ABVPର ଜାତୀୟ କାର୍ଯ୍ୟକାରିଣୀ କମିଟିର ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ପ୍ରଫେସର ଡକ୍ଟର ମସାଦି ବାପୁରାଓ କହିଛନ୍ତି ଯେ ଉଭୟ ପଦାଧିକାରୀ ଉତ୍ତରାଖଣ୍ଡର ଡେରାଡୁନରେ ନଭେମ୍ବର ୨୮, ୨୯ ଏବଂ ୩୦ରେ ଅନୁଷ୍ଠିତ ହେବାକୁ ଥିବା ୭୧ତମ ABVP ଜାତୀୟ ସମ୍ମିଳନୀରେ ଦାୟିତ୍ବ ଗ୍ରହଣ କରିବେ ।

ପ୍ରଫେସର ଡକ୍ଟର ରଘୁରାଜ କିଶୋର ତିୱାରୀ ମୂଳତଃ ମଧ୍ୟପ୍ରଦେଶର ରେୱାର ବାସିନ୍ଦା ଅଟନ୍ତି । ସେ ଜବଲପୁରର ଜବାହରଲାଲ ନେହେରୁ କୃଷି ବିଶ୍ୱବିଦ୍ୟାଳୟରୁ କୃଷି ବିଜ୍ଞାନରେ ପିଏଚ୍‌ଡି କରିଛନ୍ତି । ବର୍ତ୍ତମାନ ସେ ସେହି ବିଶ୍ୱବିଦ୍ୟାଳୟର ରେୱା କ୍ୟାମ୍ପସରେ କୃଷି ବିଜ୍ଞାନ ବିଭାଗରେ ପ୍ରଫେସର ଭାବରେ କାର୍ଯ୍ୟ କରୁଛନ୍ତି । ସେ ୧୯୮୭ ମସିହାରୁ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ସହିତ ଜଡ଼ିତ ଅଛନ୍ତି ।

ଜଣେ ଛାତ୍ର ଭାବରେ ସେ ରେୱାର କୃଷି ମହାବିଦ୍ୟାଳୟର ଛାତ୍ର ସଂଘର ନିର୍ବାଚିତ ସଭାପତି ଏବଂ ମହାକୌଶଳ ପ୍ରାନ୍ତର ରାଜ୍ୟ ସମ୍ପାଦକ ଭାବରେ ମଧ୍ୟ କାର୍ଯ୍ୟ କରିଥିଲେ । ସେହିପରି ଶିକ୍ଷକ ଭାବରେ ସେ ଭାରତୀୟ କୃଷି ଗବେଷଣା ପରିଷଦ (ICAR) ଦ୍ୱାରା ୨୦୧୪ ମସିହାରେ ବିଶ୍ୱବିଦ୍ୟାଳୟର ଶ୍ରେଷ୍ଠ ଶିକ୍ଷକ ପୁରସ୍କାରରେ ସମ୍ମାନିତ ହୋଇଥିଲେ । ଏହା ସହ ନେପାଳର ପ୍ରତିଷ୍ଠିତ ତ୍ରିଭୁବନ ବିଶ୍ୱବିଦ୍ୟାଳୟରୁ ୨୦୧୬ରେ ବିଶିଷ୍ଟ ବୈଜ୍ଞାନିକ ପୁରସ୍କାର ପାଇଥିଲେ । ସେ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ୧୨୫ରୁ ଅଧିକ ରିସର୍ଚ୍ଚ ପେପର ପ୍ରକାଶ କରିଛନ୍ତି । ସେହିପରି ସେ କୃଷି ବିଜ୍ଞାନ ଉପରେ ତିନୋଟି ପୁସ୍ତକ ଲେଖିଛନ୍ତି ।

ମୁଖ୍ଯ ଗବେଷକ ଭାବେ, ସେ ଫିଲିପାଇନ୍ସର ଅନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ (IRRI) ରେ ଆୟୋଜିତ ଏକ ମିଳିତ ଗବେଷଣା ପ୍ରକଳ୍ପରେ ତାଙ୍କ ବିଶ୍ୱବିଦ୍ୟାଳୟର ପ୍ରତିନିଧିତ୍ୱ କରିଥିଲେ। ସେ ମଧ୍ୟପ୍ରଦେଶରେ ଜାତୀୟ ଶିକ୍ଷା ନୀତିର କାର୍ଯ୍ୟାନ୍ୱୟନ କମିଟିର ସଦସ୍ୟ ଭାବରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ପୂର୍ବରୁ, ସେ ମହାକୌଶଳ ପ୍ରଦେଶ ସଭାପତି ଏବଂ ଜାତୀୟ ଉପାଧ୍ୟକ୍ଷ ଭାବରେ କାର୍ଯ୍ୟ କରିଥିଲେ ।

ସେହିପରି ଡକ୍ଟର ବୀରେନ୍ଦ୍ର ସିଂହ ସିଂହ ସୋଲାଙ୍କି ମୂଳତଃ ମଧ୍ୟପ୍ରଦେଶ ଦେବାସ ଜିଲ୍ଲାର ଉଦୟନଗରର । ସେ ଇନ୍ଦୋରର ଶ୍ରୀ ଅରବିନ୍ଦ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ (SAIMS)ରୁ MBBS ଡିଗ୍ରୀ ହାସଲ କରିଛନ୍ତି । ବର୍ତ୍ତମାନ, ସେ ଇନ୍ଦୋରର ସରକାରୀ ସ୍ୱୟଂଶାସିତ ଅଷ୍ଟାଙ୍ଗ ଆୟୁର୍ବେଦ କଲେଜ ଏବଂ ହସ୍ପିଟାଲରେ ପାର୍ଟ ଟାଇମ୍‌ ଏଲୋପାଥିକ୍ ମେଡିକାଲ୍ ଅଫିସର୍ ଭାବରେ କାର୍ଯ୍ୟ କରୁଛନ୍ତି। ସେ ୨୦୧୪ ମସିହାରୁ ABVPରେ ସକ୍ରିୟ ଅଛନ୍ତି ।

ସେ ଇନ୍ଦୋରର ଦେବୀ ଅହଲ୍ୟା ବିଶ୍ୱବିଦ୍ୟାଳୟରେ ଏକ ସଫଳ ଅଭିଯାନର ନେତୃତ୍ୱ ନେଇଥିଲେ, ଯେଉଁଥିରେ ଦୁର୍ନୀତି ଏବଂ ପରୀକ୍ଷାରେ ଅନିୟମିତତା ଅଭିଯୋଗରେ ଭାଇସ୍ ଚାନ୍‌ସେଲରଙ୍କୁ ନିଲମ୍ବନ ଦାବି କରାଯାଇଥିଲା। ସେ ଘରୋଇ ମେଡିକାଲ୍ କଲେଜଗୁଡ଼ିକରେ ବାଣିଜ୍ୟକରଣ ଦ୍ୱାରା ଫି ବୃଦ୍ଧିକୁ ନେଇ ହୋଇଥିବା ଆନ୍ଦୋଳନର ସଫଳତାର ସହିତ ନେତୃତ୍ବ ନେଇଥିଲେ । ଏହା ସହ ପରିବାର ଦ୍ୱାରା ପରିଚାଳିତ କ୍ଲିନିକ୍ ମାଧ୍ୟମରେ ସେ ସମାଜର ବଞ୍ଚିତ ବର୍ଗକୁ କମ୍ ମୂଲ୍ୟରେ ଚିକିତ୍ସା ପରାମର୍ଶ ଏବଂ ଔଷଧ ବଣ୍ଟନ ସେବା ପ୍ରଦାନ କରୁଛନ୍ତି । ସେ ପୂର୍ବରୁ କଲେଜ ସଭାପତି, ଇନ୍ଦୋର ସହର ସମ୍ପାଦକ, MeDeVision ର ରାଜ୍ୟ ପ୍ରଭାରୀ, କେନ୍ଦ୍ରୀୟ କାର୍ଯ୍ୟ କମିଟି ସଦସ୍ୟ, MeDeVisionର ଜାତୀୟ ସଂଯୋଜକ ଏବଂ ABVPର ଜାତୀୟ ସମ୍ପାଦକ ଭଳି ଦାୟିତ୍ୱ ନିର୍ବାହ କରିଛନ୍ତି ।